Roma 11 - Ashiri Aeuitaknup Iyohaichish Yona 1897

11 Ik.

¹ Yakun, tambe ku ye :— Kamui anak ne koro utara osurupa nisa ruwe he an? Ara shomo. Kuani ne yakka Israeru un guru ku ne, Abraham sanikiri ne, Benyamin iri un guru ku ne ruwe ne gusu ne na.

² Kamui anak ne etoko wano eraman koro utara shomo osurupa nisa ruwe ne na. Shui, Ericha kambi kata aye itak echi erampeutek ruwe he an? Shinuma Kamui otta Israeru utara eiyonnuppa ki :—

³ Utarapa, nei utara anak ne E koro uweingara utara ronnu hemhem ki, E koro yange set ouri-hokushte hemhem ki nisa: orowa, kuani shinen ne po an, aige, ku ramat uk kuni hunara shiriki.

⁴ Koroka, shinuma orun Kamui ese-itak nekon a? Baaru orun kokka-komo shomoki utara arawan sen nin ne ainu Kuani yaikota gusu ku are nisa ruwe ne.

⁵ Tambe gusu, tane ne yakka, irenga gusu an anumge-hi nei no, sereke an ruwe ne na.

⁶ Orowa, irenga gusu ne chiki tane Iri ikip ankushkeraipo shomo ne: shomo ne yakun, irenga anak ne tane irenga shomo ne na.

⁷ Yakun, nekon a? Israeru hunarape shomo shinuma koro: koroka, anumgep nei ambe kon nisa ruwe ne, aige, moshima okai utara anak ne anishtere nisa ruwe ne na:

⁸ chieshinnuye wa an korachi ne :— Kamui anak ne nei utara otta rene ramat hene, shomo nukara kuni shikihi hene, shomo nu kuni kisara hene tane an toho pakno koropare nisa ruwe ne.

⁹ Orowa, Dabid ene itak-hi :— Nei utara koro set kutek newa akbe newa

¹⁰ Ureepetchiure kunip ne akara, orowa, gusu iwayehe ne akara; Iteki nukara kuni ne koro shikihi kunnere, Orowa, ramma koro seturu hotkure wa en kore.

¹¹ Tambe gusu ku ye-hi :— Nei utara anak ne hachiripa kuni ne epetchiu nisa ruwe he an? Ara shomo: koroka, aeyaitunnapte kuni gusu, nei utara hachiripa ambe ankushkerai Oya un utara orun kashiobiuki-hi an ruwe ne.

¹² Aige, nei utara eikohaye ambe anak ne moshiri oteknure ambe ne chiki, orowa, nei utara so no ki-hi anak Oya un utara oteknure ambe ne a chiki; naa kasu no hembak pakno nei utara aeupakte-hi?

¹³ Koroka, Oya un echi utara otta ku itak. Kuani anak ne Oya un utara gusu an Apostoro ku ne a gusu, otta aeyaishieiwangere-hi ku pasere ruwe ne:

¹⁴ nei uni poka, nekon a ka kam gusu ku iri utara aeyaitunnapte hine sereke utara kashiobiuki kuni gusu ne na.

¹⁵ Inambe gusu ne yakun, nei utara aosurupa ambe anak ne moshiri aeramuritenka nep ne chiki, nei utara ahupkara ambe anak, rai orowa no an inotu moshima, nekon a ambe ne ya?

¹⁶ Orowa, nei aro-ibehe ashkanne chiki, epunipushpe ne yakka ashkanne ruwe ne: orowa, shinrit ashkanne ne chiki,

¹⁷ awehe ne yakka ne ruwe ne na. Koroka, okai sereke awehe okayepa hine, aige, nupuri ta an kanran chikuni ne aokai anak ne nei uturuta aukonishishkere wa tura no nei kanran gusu an shinrit oma mimi echi koro yakun;

¹⁸ nei awehe gusu iteki yaiomonnure yan: koroka, e yaiomonnure chiki, aokai anak ne shinrit sei shomoki, koroka, shinrit anak ne e sei ruwe ne.

¹⁹ Kuani aukonishishkere kuni gusu, nei awehe okayepa nisa ruwe ne, ani e ye kusu ne ya?

²⁰ Pirika, nei utara eumbipka gusu okayepa nisa ruwe ne, orowa, aokai anak ne eishokor-i gusu ash shiriki ruwe ne.

²¹ Iteki yaiesanniyorire, koroka, ishitoma yan: inambe gusu ne yakun, Kamui anak ne nei rengaine gusu hetuku kuni awehe shihopinupka shomoki chiki, shui, aokai ne yakka aeshihopinupka shomoki kusu ne na.

²² Tambe gusu, Kamui pirika irenga newa yupke irenga ingara: hachiripa utara epeka, yupke irenga; koroka, aokai epeka, Shinuma sange pirikap otta e an chiki, Kamui pirika irenga an na: shomo ne chiki aokai aotuye kusu ne na.

²³ Orowa, nei utara ne yakka, naa shomo eumbipka shik shiriki chiki, aukonishishkere kusu ne: Kamui anak ne shui nei utara ukonishishke eashkai ruwe ne gusu ne na.

²⁴ Inambe gusu ne yakun, rengaine an buri gusu nupuri un kanran chikuni orowa no aotuye, aige, gusu shomo rengaine an kunip an no pirika kanran chikuni otta e aukonishishkere chiki: hemanda naa kasu no tan rengaine gusu an ap yaikota koro kanran chikuni otta aukonishishkere shomoki ya?

²⁵ Iriwak utara, ika yaikota gusu echi yaikowayashnure kuni gusu tan anuinap aerampeutek kuni ku kopan, Oya un aahupte utara aeramushinnere pakno Israeru un sereke utara ana kne aenishtere ruwe ne;

²⁶ orowa, Israeru un utara obitta kashiaobiuki kusu ne: ene chieshinnuye wa an korachi ne :— Zion orowa no Kashiobiukip ek kusu ne; Shinuma anak ne Yakob orowa no shomo Kamui kooripak ambe shishire kusu ne

²⁷ Orowa, nei utara koro katpak ku isamka ita, Tambe anak ku ki aeuitaknup ne ruwe ne na,

²⁸ Pirika Shongo gusu, nei utara anak ne echi utara gusu epokba utara ne: koroka, anumge-hi gusu, ekashi utara ankushkerai aomap wa okai ruwe ne.

²⁹ Kamui eikrap newa konishuk ambe anak ne aeyaikokatpakbe shomo ne ruwe ne gusu ne na.

³⁰ Inambe gusu ne yakun, teeda echi utara anak ne Kamui koitakkashi korachi, koroka, tane nei utara itakkashi ambe gusu erampokiwen wa akore nei no,

³¹ tambe nei no echi aerampokiwen wa akore ankushkerai gusu nei utara ne yakka aerampokiwen wa akore gusu, tane itakkashi ne yakka ki nisa ruwe ne.

³² Kamui anak ne obitta no okai utara itakkashi utara ne sekoro esanniyo nisa, tambe anak obitta no okai utara korampokiwen wa kore kuni gusu an ambe ne ruwe ne na.

³³ Aa Kamui aeoteknu an wayashnu ambe newa eramushbe ooho ambe! Shinuma esanniyop hemanda aehunara eaikapbe, Shinuma ruhu nep chimichimi

³⁴ eramu eaikap kashpap humi! Utarapa keutum eramu an guru nen ne ruwe?

³⁵ Shinuma tura eukoramkoro guru hunna ruwe he an? Shui, hunna hoshiki no Shinuma orun kore, aine, otta aeyaiyattasa guru nen ne ruwe?

³⁶ Inambe gusu ne yakun, Shinuma orowa, Shinuma gusu, Shinuma otta obitta no okaibe okai ruwe ne na. Otusashuishiri pakno ne yakka Shinuma otta arakuru an na. Amen.