Pirimon 1 - Ashiri Aeuitaknup Iyohaichish Yona 1897

¹ Kiristo Yesu koro apakashnu guru Pauros newa akoro iriwak ne Timoteos anak ne, un tura no iki aomap an akoro Pirimon otta hemhem, akoro matiriwak ne Appia otta hemhem,

² akoro tura no iki tum-koro guru ne Arkippos otta hemhem, orowa, e kot chisei ta an karisia otta hemhem kambi omande na:

³ chikoro Michi ne Kamui newa Utarapa ne Yesu Kiristo orowa no irenga newa itomo echi otta an kuni akoramkon na.

⁴ Ramma-kane ku goro Kamui ku koyaiiraige wa ku ki inonno-itak otta e reihei ku ye ruwe ne; e ki omap ambe gusu ne yakka,

⁵ Utarapa ne Yesu epeka e atte eishokor-i gusu ne yakka, orowa, ashkanne utara epeka e iki ambe gusu ne yakka ku nu ruwe ne;

⁶ aige, echi onnaigeta an pishno okai pirikap eramu an ambe Kiristo orun tura no e atte eishokor-i anak ne iki kuni kiroroashnup ne kuni gusu ne na.

⁷ Inambe gusu ne yakun, e koro omap ambe gusu poron no ku nupetne wa aomaoma an, ku iriwak ne guru, e ankushkerai ashkanne utara koro keutum sambe-shiturire nisa ruwe ne gusu ne na.

⁸ Tambe gusu, oupak no an ambe e ikashpaotte ash kuni,

⁹ Kiristo oshiketa, nep rametokkorobe ka ku goro yakka, omap ambe ankushkerai ku onishnishi ash ruwe ne, onne Pauros ku ne gusu, samata, tane Kiristo Yesu koro epashkanu guru ku ne wa gusu ne na:

¹⁰ atupetupe wa an rapoketa ku shikore ku poho ne Onesimos gusu e orun ku koramkon ruwe ne, shinuma anak ne etoko wa en gusu raka-sak guru ne,

¹¹ koroka, tane anak ne en gusu ne yakka aokai gusu ne yakka rak an gun ne ruwe ne: nei guru yaikota,

^12-13 ku keutum tura, e orun ku hoshipire na: kuani anak ne pirika shongo gusu an tupep a en eokte wa an rapoketa e shirihine Shinuma en otta yaishieiwangere kuni ku reushire rusui, a koroka, e keutum shomo ku nu chiki nep ne yakka shomo ku iki;

¹⁴ e koro pirika keutum anak asangere gusu an ambe shomo ne wa rengaine hetuku ambe ne kuni gusu ne na.

¹⁵ Ramma pakno aokai anak ne shinuma koro kuni gusu, an pakihi uturu shinuma oyakta an nangora;

¹⁶ tewa no ausshiunere wa an guru korachi shomo ne, koroka, ausshiunere wa an guru kasu no pasep korachi ne, aomap an iriwak ne guru korachi, makangane en gusu, koroka, kara otta ne yakka Utarapa otta ne yakka naa kasu no aokai gusu ne na.

¹⁷ Kua-ni anak ne e tura no iki guru ku ne kunak e esanniyo chiki,

¹⁸ en korachi shinuma uk wa en kore. Koroka, shinuma e kowende hene ki chiki, e orun shohose hene an chiki, ku goro sanniyo kambi kata nuye wa

¹⁹ en kore yan; Pauros ku ne anak ne yaikota ku goro teke ani ku nuye ruwe ne, nei ambe ku sange kusu ne na: aige, aokai yaikota anak ne nei a moshima yaikota en orun sange kunip ne sekoro shomo ku ye kuni gusu ne na.

²⁰ Ruwe un, iriwak ne guru, aokai gusu Utarapa oshiketa a en kaobiuki kuni ne ki yan: Kiristo oshiketa ku sarabe shiturire wa en kore yan.

²¹ Aokai anak ne itaknu ki kuni ku eishokoro gusu e orun kambi ku nuye ruwe ne, ku ye-hi kasu no poka e ki kusu ne sekoro ku eraman ruwe ne na.

²² Koroka, moshima shui, reushi kuni ushike ne yakka en gusu etokooiki wa en kore: inambe gusu ne yakun, e ki inonno-itak ankushkerai e orun a en omande kusu ne sekoro ku chipachipa ruwe ne gusu ne na.

²³ Kiristo Yesu oshiketa en tura apakashnu wa an Epapras e ekap na;

²⁴ samata, en tura no iki Markos hemhem, Aristarkos hemhem, Demas hemhem, Roukos hemhem ne yakka.

²⁵ Chikoro Utarapa ne Yesu Kiristo e kon ramat tura no an kuni akoramkon na. Amen.