Mattaios 9 - Ashiri Aeuitaknup Iyohaichish Yona 1897

9 Ik.

¹ Orowa, Shinuma chip otta ahun; aige, atui tomotuye wa koro kotan orota ek nisa ruwe ne.

² Awa, utara anak ne hotke wa an tusushke tashum ki shine ainu Shinuma otta sei wa araki ruwe ne: orowa, Yesu nei utara koro eishokor-i nukara koro tusushke tashum ki guru otta ene itak-hi :— Poho, keutum ritetkere yan, e koro chikokatpak atusare ruwe ne gusu ne na.

³ Orowa, kambi-nuye utara tumugeta okai utara anak ne koro keutum ta, tan guru Kamui koatcha ruwe ne, ari itak.

⁴ Yesu nei utara yainu-hi eramu an wa ene itak-hi :— Hemanda gusu echi utara keutumu ta wen no echi yaikoshiramse ya?

⁵ E koro chikokatpak atusare wa an sekoro itak ye, newa, e hopuni wa apkash, sekoro itak ye-hi anak ne, inambe ye katu isaika itak ne ruwe he an?

⁶ Koroka, Ainu Poho shiri kata an wa chikokatpak tusare mondum koro wa an ani ambe echi eramu an kuni gusu (tusushke tashum ki guru otta ene itak-hi:—) e hopuni hine e koro shotki chupu wa e uni un hoshipi, sekoro itak.

⁷ Orowa, nei guru hopuni wa koro chisei orun arapa nisa ruwe ne.

⁸ Koroka, inne utara tap ambe nukara chiki ishitoma shiriki, orowa, tap korachi an mondum ainu otta koropare Kamui ko-oripak nisa ruwe ne na.

⁹ Yesu tewa no oman wa shirikush, aine, yaku etaye chisei otta a wa an Mattaios ani aye ainu nukara hine orota ene itak-hi :— En osh ek yan, Orowa, nei guru hopuni wa Shinuma osh oman nisa ruwe ne na.

¹⁰ Orowa, Shinuma ibe gusu chisei ta a rapoketa, yaku etaye utara hene chikokatpak utara hene inne no Yesu newa koro koikara utara tura rok wa okai nisa ruwe ne.

¹¹ Aige, Parisee un utara anak ne tap ambe nukara chiki nei koikara utara orun ene itak-hi :— Echi epakashnu guru nep gusu yaku etaye utara hemhem chikokatpak utara hemhem tura aep e ya? ari itak.

¹² Koroka, Shinuma tap ambe nu chiki nei utara otta ene itak-hi :— Iwange no okai utara anak ne potara guru irannakka ruwe ne, ouse tashum koro utara patek kon rusui ruwe ne.

¹³ Koroka, Kuani rampoken Ku kon rusui wa ayange kunip kon rusui shomoki na, sekorʼan itak ambe nekon a ikkewehe an itak ne ya? ani echi paye wa ramepakari yan: Kuani oupeka utara hotuyekara kuni gusu ek ka shomoki, katpak koro utara hotuyekara gusu Ku ek nisa ruwe ne gusu ne na.

¹⁴ Nei ita Yoannes koro koikara utara Shinuma orun araki wa ene itak-hi :— Chi utara hemhem Parisee un utara hemhem kanna-kanna shomo ramnu ki, koroka, e koro koikara utara shomo ramnu ki ka shomoki ambe anak ne inambe gusu ne ya? ari itak.

¹⁵ Orowa, Yesu nei utara otta ene itak-hi :— Tane matakore guru an rapoketa, nei marapto gusu an utara anak ne yaituwashkarap eashkai ruwe he an? Okaketa tane matakore guru auk toho ek kusu ne, nei ita shomo ramnu ki kusu ne na.

¹⁶ Chiworo-at ani fushko amip utapke guru isam: nei no ki yakun, autapke ambe anak ne fushko ambe orowa no yara,

¹⁷ orowa, nei yara ushike naa poro ne ruwe ne Shui, ashiri tonoto fushko kapu-pukuru ta omare guru isam: nei no ki yakun, pukuru patke wa tonoto echikiki, orowa, kapu-pukuru aisamka ruwe ne: koroka, ashiri tonoto anak ne ashiri kapu-pukuru ta aomare, yakun, tup ne kane akoro wa okai.

¹⁸ Shinuma tan okai itak nei utara otta, ye rapoketa, ingarʼan, shine sapane guru ek wa ongami hine ene itak-hi :— Ku matnepo tane poka rai etokooiki wa an; koroka, Aokai ek wa kashiketa tekehe ande wa en kore, yak anak ne shiknu kusu ne, sekoro itak.

¹⁹ Orowa, Yesu hopuni wa koikara utara tura no nei guru osh oman ruwe ne.

²⁰ Orowa, ingarʼan, tu pa ikashima, wan pa kemnu tashum ki shiwentep Yesu oshmaketa ek wa koro anrip chingi tomooshma nisa ruwe ne,

²¹ inambe gusu ne yakun, Shinuma mipi ouse tomooshma yak ne a en kaobiuki kusu ne, ani keutum ta yainu nisa ruwe ne gusu ne na.

²² Koroka, Yesu hosari wa nei shiwentep nukara hine ene itak-hi :— Matkachi, keutum ratchire, e koro eishokoro i anak ne e kashiobiuki nisa ruwe ne na, sekoro itak. Aige, nani nei shiwentep kaobiuki wa an ruwe ne na.

²³ Orowa, Yesu nei sapane guru uni ta ahun chiki, top rekte utara newa inne utara sakayo hau nukara koro anak ne ene itak-hi; —

²⁴ Makta paye yan: matkachi rai shiri shomo ne, ouse mokon ruwe ne, ani itak. Aige, nei utara emina esapse nisa ruwe ne na.

²⁵ Koroka, inne utara asoyumbare okaketa, Shinuma ahun wa nei matkachi koro teke kishima; awa,

²⁶ matkachi hopuni nisa ruwe ne na. Nei assuruhu anak ne nei kotan ebitta shipirasa nisa ruwe ne.

²⁷ Orowa, Yesu tande oro oman, aige, tu shiknak utara Shinuma osh araki wa hawe ashte hine ene itak-hi :— Dabid koro Poho Aoka, un erampokiwen wa un kore, ari itak.

²⁸ Orowa, Shinuma chisei orun ahun chiki, nei shiknak utara Shinuma orota araki: awa, Yesu nei utara otta ene itak-hi :— Kuani tap ambe Ku kara eashkai ani echi eishokoro ya? ari itak; orota nei utara, Utarapa, ruwe un, ani ese wa ye ruwe ne.

²⁹ Tata otta Shinuma nei utara koro shikihi tomooshma wa ene itak-hi :— Echi eishokor-i an korachi akara na, sekoro itak.

³⁰ Orowa, koro shikihi makke. Aige, Yesu yupke no nei utara ikashpaotte wa ene itak-hi :— Yaitubare no moshima guru iteki nu kuni ki yan, ari itak.

³¹ Koroka, nei utara paye wa shiri ebitta Yesu assuru ashte nisa ruwe ne na.

³² Nei utara soyumba, aige, nitne kamui shikatkari wa an shine shomo-itak guru Shinuma otta atura wa ek.

³³ Nei nitne kamui aoshinge chiki, shomo-itak guru itak: orowa, inne utara iyokunnure wa ene itak-hi :— Israeru un utara tumugeta naa shomo tap ne kane okaibe anukara eramushkare na, ari itak.

³⁴ Koroka, Parisee un utara anak ne, Shinuma nitne kamui esapanep ani nitne kamui oashinge ruwe ne na, sekoro itak.

³⁵ Orowa, Yesu shiri ebitta machiya hene kotan hene okari oman wa uwekarapa chisei ta epakashnu, aige, moshiri gusu an pirika orushpe eupaskuma, samata, usa okai tashum ne yakka usa okai shiyeye ne yakka iwangere nisa ruwe ne.

³⁶ Koroka, Shinuma inne utara nukara chiki, gusu erampokiwen wa kore na, oreshpa guru sak no an hitsuji chikoikip korachi yairamhekonro wa shitchari wa okai ruwe ne gusu ne na.

³⁷ Nei ita koro koikara utara otta Shinuma ene itak-hi; — Anange kunip anak ne nuye an, koroka, monraige utara moyo ruwe ne.

³⁸ Tambe gusu, anange kuni ushi koro Utarapa anak ne monraige gusu an utara kot toi orun payere kuni gusu koramkoro yan, ari itak.