Mattaios 20 - Ashiri Aeuitaknup Iyohaichish Yona 1897

20 Ik.

¹ Kando moshiri anak ne koro hat toi otta monraigere kuni ne aro-kunneiwano monraige utara nishuk gusu soine chisei-koro guru koheraye ruwe ne.

² Orowa, shine to range shine denaria sange kusu ne sekoro nei monraige utara tura ukoramkoro okere chiki, koro hat toi otta payere ruwe ne.

³ Orowa, ku ji pakita shui soine wa usa okaibe ehok ushi ta moshima okai utara toranne wa roshki wa okai-i nukara wa,

⁴ echi utara ne yakka hat toi otta ahup yan: orowa, nep echi uk kunip yakka echi kore ash na, sekoro itak.

⁵ Orowa no nei utara paye nisa ruwe ne. Shui, ju ni ji pakita hene san ji pakita hene soine wa kanna-shui nei a-i korachi ki nisa ruwe ne.

⁶ Orowa, go ji pakita soine wa moshima okai utara roshki wa otai-i nukara, awa, orota ene itak-hi :— Nep gusu echi utara ramne to toranne wa teda roshki ruwe he an? sekoro itak.

⁷ Orota nei utara ene itak-hi :— Un nishuk guru isamma gusu ne, sekoro itak. Nei guru, echi utara ne yakka bat toi otta ahup yan, ani itak.

⁸ Orowa, onuman an koro hat toi kon nishpa anak ne korobe epunginere ainu otta ene itak-hi :— Monraige utara hotuyekara wa, iyoshi no anishuk utara orowa no hoshiki anishuk utara pakno pumma kore yan, ari itak.

⁹ Orowa, go ji pakita anishuk utara araki wa shinen range shine denaria uk nisa ruwe ne.

¹⁰ Orowa, hoshiki anishuk utara araki koro, naa kasu no akore nangoro ani yainu wa okai, awa, nei utara ne yakka shinen range shine denaria uk nisa ruwe ne.

¹¹ Orowa, nei ambe akore okere chiki chisei koro guru orun oromam wa ene itak-hi :—

¹² Tan okai iyoshi no araki utara ouse shine ichi ji kan uturuta patek monraige, awa, chi utara anak kunneiwano orowa no tokap popkemau eyaishiporore, awa, orota ukorachi ki ruwe ne, sekoro itak.

¹³ Koroka, chisei-koro guru ese wa nei utara shinen otta ene itak-hi :— Ainu, eani gusu wenbe shomo ku ki: shine denaria gusu en tura ukoramkoro shomoki ya?

¹⁴ E korobe uk wa oman; e kore ash pakno tan iyoshi no araki utara otta ne yakka ku kore-hi anak ne ku keutura ne ruwe ne.

¹⁵ Kuani anak ne yaikota korobe ani rengaine ku ki yakun wen ya? Kuani pirika ne ruwe ne gusu e shikihi wen ya?

¹⁶ Tambe gusu, iyoshi no ambe hoshiki ne, hoshiki no an ambe iyoshi ne kusu ne.

¹⁷ Orowa, Yesu Yerusarem kotan orun oman ita, tun ikashima wan koikara utara tura wa ainu isam ushi kush wa orota ene itak-hi :—

¹⁸ Ingarʼan, chi utara anak ne Yerusarem kotan orun paye; orowa, Ainu Poho Kamui kora kenru esapane utara newa kambi-nuye utara orota aekoshi kusu ne; orowa, Shinuma araige kuni ne nei utara orowa no aesanniyo, samata, aemina-esapse, akoshirikik, utasa chikuni otta a kungi

¹⁹ kokikkik kuni ne oya utara otta ekoshi kusu ne; orowa, rereko an ita hetopo-a-shiknure kusu ne na, ari itak.

²⁰ Orowa, Zebedee koro poho unuhu anak ne po utara tura wa shine eikoramkoro-i an gusu Shinuma otta ek wa ko-ongami nisa ruwe ne.

²¹ Orowa, nei shiwentep otta Shinuma ene itak-hi :— Nep e kon rusui ya? Orota shiwentep ene itak-hi :— E koro moshiri ta tan ku tu poho anak ne shinen E shimon tek samata, shinen E hariki tek samata a kuni kashpaotte wa en kore.

²² Koroka, Yesu ese wa ene itak-hi :— E eikoramkorobe e erampeutek ruwe ne. Echi utara anak ne tane Ku iku tusu ne itangi echi iku eashkai ya?

²³ Orota nei utara :— Iku ash eashkai ruwe ne ari itak. Otta Shinuma ene itak-hi :— Son no newa Ku iku itangi echi iku kusu ne: koroka, Ku shimon tek samata a hene, Ku hariki tek samata a hene anak ne Ku kore kunip shomo ne; koroka, Ku Michihi orowa no aetotooiki gusu an utara otta akore kusu ne, sekoro itak.

²⁴ Orowa, wa niu ne koikara utara tap ambe nu chiki nei tu uiriwak utara koirushka ruwe ne.

²⁵ Koroka, Yesu nei utara shihekote hotuyekara wa ene itak-hi :— Oya utara esapane utara anak ne shiram-niukesh yara wa epungine, orowa, nei pase utara ishioushi ko-ki ruwe ne.

²⁶ Echi okai tumugeta nei no an shomoki kusu ne: koroka nen ne yakka echi tumugeta pase rusui guru anak ne echi auitek guru ne kusu ne;

²⁷ orowa, nen ne yakka echi tumugeta esapane rusui guru anak ne echi usshiune guru ne kusu ne:

²⁸ tambe korachi Ainu Poho anak ne moshima guru eiwange kuni ne ek ka shomo ne, yaishieiwangere kuni gusu ek ruwe ne; orowa, inne utara kikiraye gusu kon ramat kore gusu ek nisa ruwe tapan na.

²⁹ Orowa no, Yeriko machiya orowa no paye koro poro inne utara Shinuma oshi paye nisa ruwe ne.

³⁰ Aige, ru parugeta rok wa okai tu shiknak ainu an awa, Yesu shirikush shiri humi nu chiki hawe ashte hine ene itak-hi :— Dabid koro Poho ne Utarapa, un erampokiwen wa un kore, ari itak.

³¹ Orowa, inne utara nei guru hawe more kuni ne kopao nisa ruwe ne: korota, nei utara naa naa hawe ashte wa Dabid koro Poho ne Utarapa, un erampokiwen wa un kore, ani itak nisa ruwe ne.

³² Orowa, Yesu ash hine nei utara hotuyepakara wa ene itak-hi :— Kuani anak ne echi utara gusu nepi iki ambe eikoramkoro, ya?

³³ Orota nei utara ene itak-hi:— Utarapa, chitoro shiki amaka kuni chi koramkoro ash.

³⁴ Orowa, Yesu erampokiwen wa kore hine shikihi tomooshma: orowa, nani nei utara aingare, orowa, Yesu oshi paye nisa ruwe ne.