Mattaios 18 - Ashiri Aeuitaknup Iyohaichish Yona 1897

18 Ik.

¹ Nei ita anak ne koikara utara Yesu orota araki wa ene itak-hi :— Yakun, kando moshiri ta hunna iyotta pase guru ne ruwe he an? ani itak.

² Orowa, Yesu shine pon guru shihekote hotuyekara wa nei utara noshiteta ande wa ene itak-hi :—

³ Son no echi otta Ku ye, echi utara hosari wa pon utara okai-i korachi ne shomoki yak anak ne, oara Kando moshiri ahup eaikap kusu ne.

⁴ Tambe gusu, nen ne yakka tan pon poho an i korachi yaieoripakka guru anak ne nei guru anak Kando moshiri ta iyotta pase guru ne ruwe ne.

⁵ Orowa, nen ne yakka Ku reihei ankushkerai gusu tap korachi an shine pon guru uk gurʼanak ne En uk ruwe ne:

⁶ koroka, En eishokoro wa an shine pon guru epetchiure guru an chiki, nei guru poro shuma-nishu rekuchi aunu wa ooho atui otta arende-i anak, nei guru gusu pirika ruwe ne.

⁷ Epetchiure-i an gusu moshiri yaisambe-pokash humi; inambe gusu ne yakun, epetchiure-i anak ne ek gusu ne ap ruwe ne; koroka, gusu epetchiure ambe hetuku guru yaisambepokash ruwe ne.

⁸ Orowa, e teke hene e chikiri hene e epetchiure yak anak ne oattuye wa osura yan: inambe gusu ne yakun, tu teke hene tu chikiri hene koro wa hembara pakno ne yakka ush shomoki abe otta aeyapkiri ambe kasu no hera hene yaiewen hene ne wa ishu-i otta ahun katu eani gusu naa pirika ruwe ne.

⁹ Orowa, e shikihi e epetchiure yak anak ne oashinge wa osura yan: inambe gusu ne yakun, tu shikihi koro wa Gehenna un abe otta aeyapkiri ambe kasu no shine shiki koro wa ishu-i otta ahun katu eani gusu naa pirika ruwe ne.

¹⁰ Tap pon utara tumuge un shinen ka iteki etunne:

¹¹ inambe gusu ne yakun, echi otta Ku ye, nei utara koro hauturunbe anak ne hembara ne yakka kando otta an Ku Michi nanuhu nukan ruwe ne.

¹² Nekon a echi yainu ya? ashikne hotne hitsuji chikoikip koro ainu an wa nei shinep ru turainu chiki, shinepesambe ikashima wan e ashikne hotnep are wa nupuri otta oman hine nei aturainu hike hunara shomoki ruwe he an?

¹³ Orowa, pa yak anak ne, son no echi otta Ku ye, aturainu shomoki shinepesambe ikashima wan e ashikne hotne hike gusu kasu no nei a turainu hike naa enupetne ruwe ne.

¹⁴ Tap korachi tan okai pon utara shinen ne yakka isam kuni ambe anak ne, kando otta an echi koro Michi korʼirenga shomo ne ruwe ne.

¹⁵ Orowa, e koro iriwak anak ne e epeka no chikokatpak an chiki, e oman wa tun patek echi an ita otta nure; e ye itak nu chiki, eani anak ne koro iriwak epirika ruwe ne.

¹⁶ Koroka, e ye itak nu shomoki yak anak ne tun hene ren hene paweteshu guru gusu obitta no okai itak asonnere kuni ne moshima shinen tun tura yan.

¹⁷ Orowa, nei paweteshu utara ye itak nu shomoki chiki, karisia otta ye; karisia ye itak ne yakka nu shomoki yak anak ne shinuma yaku-etaye guru hene oya guru hene korachi otta iki yan.

¹⁸ Son no echi otta Ku ye, nep ne yakka kanna moshiri ta echi tupetupep anak ne kando otta ne yakka atupetupe kusu ne; orowa, nep ne yakka kanna moshiri ta echi pitap anak ne kando otta ne yakka apita kusu ne.

¹⁹ Shui, echi otta Ku ye, nep ne yakka echi ikoramkorobe gusu echi tun ne wa ukoramkoro eramushinne chiki, kando otta an Ku Michi anak ne nei no ki kusu ne.

²⁰ Inambe gusu ne yakun, Ku reihei ankushkerai tun ren uwekarapa wa okai ita, Kuani nei utara tumugeta an ruwe ne.

²¹ Orowa, Petros ek wa shinuma otta ene itak-hi :— Utarapa, En epeka no ku iriwak anak ne katpak ki chiki, hembak shui ku tusare kusu ne ya? arawan shui pakno kusu ne ya? sekoro itak.

²² Orota Yesu ene itak-hi :— Arawan shui pakno tusare yan sekoro Ku ye shomoki, koroka, arawan shui ikashima wan e ine hotne shui pakno ki yan, sekoro Ku ye ruwe ne.

²³ Tambe gusu, Kando moshiri anak ne koro usshiune utara tura esanniyo ki shine moshiri esapane guru ukoherayere ruwe ne.

²⁴ Orowa, esanniyo heashire koro ashikne shine wan hotne taranton sange kunip ne a guru shinen nei sapane guru otta atura wa ek ruwe ne.

²⁵ Koroka, sange kuni kani sak ruwe ne gusu, kon nishpa orowa no nei guru hemhem koro machi hemhem po utara hemhem korope hemhem obitta aeihokte wa nei ataye sange kuni ne akashpaotte nisa ruwe ne na.

²⁶ Tambe gusu, nei ausshiunere guru shiri-kamu wa ongami hine ene itak-hi :— Utarapa en gusu yaiyupupu wa en kore, yakun, obitta ku sange kusu ne na, ari itak.

²⁷ Orowa, sapane guru anak ne nei ausshiunere guru gusu erampokiwen wa kore hine omande wa nei a shosep tusare nisa ruwe ne.

²⁸ Koroka, nei ausshiunere guru oman wa yaikota ashikne hotne denaria shosere tura no iki auitek guru nukara wa, nei guru uk wa rekuchi kishima hine ene itak-hi :—

²⁹ Ku shoserep sange yan, ari itak. Aige, tura no auitek guru shiri-kamu wa koramkoro hine ene itak-hi :— En gusu yaiyupupu wa en kore, yakun, nei shosep ku sange kusu ne, sekoro itak.

³⁰ Nei guru kopan: koroka, oman wa sange kunip asange pakno upakashnu chisei otta ahunge nisa ruwe ne.

³¹ Tambe gusu, tura aeiwangere utara nei iki ambe nukara koro shi no oknatara wa araki hine aki orushpe obitta kon nishpa otta nure nisa ruwe ne.

³² Orowa, kon nishpa anak ne nei no iki guru shihekote hotuyekara wa ene itak-hi — Wen ausshiunere guru e ne, eani en koramkoro gusu nei a shose ambe obitta ku tusare;

³³ kuani e erampokiwen wa kore korachi eani ne yakka tura auitek guru otta erampokiwen wa kore kusu ne ap shomo ne ruwe he an? sekoro itak.

³⁴ Orowa, kon nishpa irushka wa nei a shosep obitta sange pakno ipanakte guru otta omande nisa ruwe ne na.

³⁵ Echi utara ne yakka pishno pishno ramu-osshi wano echi koro iriwak tusare shomoki chiki, kando otta an Ku Michihi ne yakka nei no echi otta ki kusu ne na.