Mattaios 12 - Ashiri Aeuitaknup Iyohaichish Yona 1897

12 Ik.

¹ Nei ita Yesu anak ne shini toho ta mungi toi kush wa oman; aige, koro koikara utara ibe rusui gusu

² mungi upush tuiba wa ibe heashi koroka Parisee un utara tap ambe nukara chiki Shinuma otta ene itak-hi :— Ingarʼan, E koro koikara utara anak ne shini tobo ta aki yak ne chikokatpak nep ki koro okai ruwe ne, ani itak.

³ Koroka, nei utara otta Shinuma ene ye-hi :— Dabid newa tura no okai utara ibe-rusui ita hemanda ki orushpe;

⁴ nei guru Kamui kora kenru orun ahun wa Kamui otta yaishieiwangere utara moshima okai utara e ko chikokatpak ne sekoro Kamui otta ayangep uk wa yaikota newa tura no okai utara ibe ambe echi oro-oitak shomoki ya?

⁵ Shui, shini toho ta Kamui kora kenru un utara anak ne shini toho otereke yakka katpak isam ruwe ne a ambe ne yakka Kamui tuitak kashiketa echi oro-oitak shomoki ruwe he an?

⁶ Koroka, echi otta Ku ye, Kamui kora kenru kasu no porobe teda an ruwe ne.

⁷ Koroka, Kuani anak ne ramu-hauge ambe Ku kon rusui wa ayange kunip Ku kon rusui shomoki ruwe ne sekorʼan anuye wa an itak ikkewehe echi eramu an wa okai yakun, katpak sak utara kokatpakte shomo echi ki nangoro kusu ne.

⁸ Ainu Poho anak ne shini toho koro Utarapa ne ruwe ne.

⁹ Orowa Shinuma nei oro ekohopi wa oman, aige, nei utara koro uwekari chisei ta ahun nisa ruwe ne:

¹⁰ awa, ingarʼan, oatteke shipeshte shine ainu an. Orowa, eiyonnuppa ika hunara rusui gusu utara uwepekennu wa otta ene itak-hi :— Shini toho ta iwangere ambe anak ikashpaotte an i korachi ne ruwe he an? ari itak ruwe ne.

¹¹ Nei utara otta Shinuma ene itak-hi :— Echi utara tumugeta inan guru shine hitsuji chikoikip koro wa an wa nei ambe shini toho ta shui oro-oshma chiki kishima wa yange shomoki ya?

¹² Hitsuji kasu no ainu anak ne nep oro an-i aesanniyop humi! Tambe gusu shini toho ta pirikap ki ambe anak ne pirikap an i ne ruwe ne na, ari itak.

¹³ Orowa, nei ainu otta :— E teke turi yan, ani Shinuma ye. Orowa, aturi, aige, moshima an ambe korachi atumashnure nisa ruwe ne.

¹⁴ Koroka, Parisee un utara soyumba wa Shinuma raige kuni eukoramkon nisa ruwe ne,

¹⁵ Aige, Yesu tambe eraman gusu nei kotan wano ekohopi wa oman:

¹⁶ aine, inne utara nei osh paye. Orowa, Shinuma nei utara obitta iwangere, aige, moshima utara otta shomo iamkirire kuni ne kashpaotte nisa ruwe ne.

¹⁷ Ku numge wa ku uitek ainu; Ku omap wa Ku keutum enupetne ainu ingara yan: Shinuma kashiketa Ku ramat Ku ande wa, Oya uirup otta Ku ikashpaotte nure kusu ne.

¹⁸ Nei guru etushmak shomoki, rui hau sange ka shomoki: Orowa machiya otta koro hau nen ne yakka orowa no ami ka shomoki kusu ne

¹⁹ Orowa, ikashpaotte akire pakno piri o rapembe kaye shomoki,

²⁰ Epuipuise hai ushka ka shomoki. Orowa, Oya moshirʼun utara nei ainu kon reihei ankushkerai chipachipa kusu ne,

²¹ sekoro uweingara guru Isaya aitakte hawehe auweomare kuni gusu ne na.

²² Tande imakake nitne kamui shikatkari gusu shiknak shomo-itak guru shinen Shinuma otta atura, awa, Shinuma nei guru ingara hemhem ki, itak hemhem ki

²³ kuni ne iwangere nisa ruwe ne. Orowa inne utara tambe nukara, aige, eoyamokte wa ene itak-hi :— Tan guru anak ne Dabid koro poho ne ruwe he an? sekoro itak.

²⁴ Koroka, Parisee un utara nei ambe nu, aige, ene itak-hi :— Tan guru anak ne ouse Beeruzeboru ani aporose nitne kamui esapanep ani nitnep soyumbare ruwe ne, ari itak.

²⁵ Shinuma nei utara yainu-hi eramu an wa otta ene itak-hi :— Inan moshiri uirup ne yakka yaikota gusu utashpa uwekopi yak anak ne, nei moshiri ahokushte kusu ne; shui, inan machiya hene inan chisei hene ne yakka, yaikota gusu uwekopi yakun okai eaikap kusu ne na: orowa, Satan anak ne Satan soyumbare yakun,

²⁶ Satan yaikota gusu yaiekopi ruwe ne; yak anak ne nekon a shinuma koro moshiri ash eashkai ya?

²⁷ Shui, Kuani anak ne Beeruzeboru ani nitnep soyumbare yakun, echi poho utara inan guru ani nei ambe soyumbare ruwe he an? Tambe gusu nei utara anak ne echi koipishi kusu ne ruwe ne na.

²⁸ Koroka, Kuani anak ne Kamui Ramat ani nitnep soyumbare yakun, Kamui moshiri echi orota ek wa an ruwe ne.

²⁹ Shui, Ainu anak ne hoshiki no okirashnu guru tupetupe shomoki yakun, nekon a iki wa shinuma kot chisei ta ahun wa nei okirashnu guru korope akoisamka kusu ne ya? Atupetupe okere chiki kot chisei koisamka kusu ne na.

³⁰ En tura no iki shomoki gurʼanak ne En epokba gunʼne; orowa, En tura no uwekarapare shomoki gurʼanak ne chieshitchari ruwe ne.

³¹ Tambe gusu echi otta Ku ye, nep chikokatpak ne yakka, nep koatchap ne yakka utara gusu atusare kusu ne, koroka, Ramat epeka no an koatchap anak ne atusare shomoki kusu ne ruwe ne.

³² Orowa, nen ne yakka Ainu Poho epeka sempiroitak ki guru an yakka atusare kusu ne, koro-ka, nen ne yakka Ashkanne Ramat epeka sempiroitak ki guru anak ne, tan moshirʼotta ne yakka, ek kushki moshirʼotta ne yakka atusare shomoki kusu ne ruwe ne.

³³ Chikuni anak ne koro nikaop tura pirika ruwe ne ani ye yan: shomo ne yakun, chikuni nikaop tura wen ruwe ne ari ye yan: inambe gusu ne yakun, chikuni anak ne koro nikaop gusu aeraman ruwe ne.

³⁴ Paskuru okokko koro san tek utara, echi wen wa gusu nekon a echi iki wa pirikap ye eashkai ya? Keutura oshiketa nuye an no an-i wano paroho itak sange ruwe ne gusu ne na.

³⁵ Pirika ainu anak ne pirika ikoro an ushike wano pirikap sange ruwe ne, wen ainu anak ne wen ikoro an ushike wano wenbe sange ruwe ne.

³⁶ Orowa, echi otta Ku ye, nep ikkewe sak no an itak ani ye yakka, akoipishi toho ta nei ambe gusu aesanniyo kusu ne.

³⁷ E ye itak gusu eani aopekare kusu ne, orowa e ye itak gusu akokatpakte kusu ne gusu ne na.

³⁸ Orowa, kambi-nuye utara tumugeta okai utara newa Parisee un utara tumugeta okai utara anak ne Shinuma orun ese wa ene itak-hi :— Epakashnu guru, chi okai utara anak ne E ki shirosh shinep anukan rusui ruwe ne, ari itak.

³⁹ Koroka, Shinuma nei utara otta ese wa ene itak-hi :— Wen newa omoinu koro ainu ikiri anak ne shirosh hunara ruwe ne; aige uweingara guru Yona koro shirosh moshima anak shirosh akore shomoki:

⁴⁰ Yona anak ne tokap-to rereko kunne-to re anchikara uturuta poro rep un chikoikip honi oshiketa an korachi, tambe nei no Ainu Poho ne yakka tokap-to rereko kunne-to re anchikara uturuta toitoi sambe oshiketa an kusu ne.

⁴¹ Ninepe kotan un utara anak ne tane okai ainu ikiri gusu hopumba hine koipishi wa kokatpakte kusu ne; inambe gusu ne yakun, nei utara anak ne Yona ki upaskuma gusu yaikokatpak nisa ruwe ne, awa, ingarʼan, Yona kasu no pase guru teda an ruwe ne.

⁴² Pikata un moshiri esapane shiwentep anak ne hopuni wa tane okai ainu ikiri gusu koipishi wa kokatpakte kusu ne: inambe gusu ne yakun, shinuma anak ne Soromon koro wayashnu ambe nu kuni gusu moshirigesh wano ek nisa ruwe ne;

⁴³ awa, ingarʼan, Soromon kasu no pase guru teda an ruwe ne. Koroka, ichak-kere ramat anak ne ainu orowa no soine chiki shini ushike hunara gusu wakka-sak ikush wa oman, aige, pa shomoki ruwe ne.

⁴⁴ Orowa no ene ye-hi :— Kuani anak ne orowa Ku soine chisei shui orun Ku hoshipi kusu ne, ari itak; orowa, ek, aige, nei chisei oha, achashnure wa an, atomtere ruwe ne — ari nukan ruwe ne.

⁴⁵ Orowa no shinuma oman wa moshima an yaikasu no wen arawan ramat uina wa tura no ahup wa okai ruwe ne; orowa, nei ainu hoshiki no an katu kasu no iyoshi no an katuhu anak ne naa wen ruwe ne. Tane okai wen ainu ikiri otta ne yakka tambe nei no an kusu ne na.

⁴⁶ Shinuma anak ne inne topaha utara orota itak rapoketa, ingarʼan, koro habo koro iriwak utara tura Shinuma otta itak rusui gusu soita roshki wa okai.

⁴⁷ Awa, shine ainu Shinuma otta ene itak-hi :— Ingarʼan, E koro habo E koro iriwak utara tura E otta itak rusui gusu soita roshki wa okai ruwe ne, ani itak.

⁴⁸ Koroka, nei guru otta Shinuma ese wa ene itak-hi :— Ku goro habo nen ne? Ku goro iriwak utara nen ne ruwe he an? — ari itak.

⁴⁹ Orowa, Shinuma koro koikara utara oro un tekehe turi wa ene itak-hi :— Ingarʼan, Ku goro habo Ku goro iriwak utara!

⁵⁰ Inambe gusu ne yakun, inan guru ne yakka kando otta an Ku goro Michi irenga ki gurʼanak ne shinuma anak Ku okkai ainu iriwak ne, Ku mat ainu iriwak ne, Ku habo ne ruwe ne na.