Mattaios 10 - Ashiri Aeuitaknup Iyohaichish Yona 1897

10 Ik.

¹ Orowa, Shinuma anak ne koro koikara utara ne tun ikashima wa niu shihekote hotuyekara, aige, ichak-kere ramat oashinge kuni mondum hemhem nep tashum ne yakka nep shiyeye ne yakka iwangere kuni mondum hemhem koropare nisa ruwe ne.

² Orowa nei tun ikashima wan koikara utara reihei anak ne tambe ne ruwe ne: Hoshiki, Petros ari an reihei koro Simon newa koro iriwak Andreas an; Zebedaios poho Yakob newa koro iriwak ne Yoannes an;

³ Pirippos newa Bartoromaios an; Tomas newa yaku etaye guru ne Mattaios an; Arpaios koro poho Yakob an; Taddaios an; Kanaan moshirʼun guru ne

⁴ Simon newa Yesu ekoshi Kariot kotan un Youdas an ruwe ne.

⁵ Yesu anak ne tan tun ikashima wa niu payere hine kashpaotte wa ene itak-hi :—

⁶ Oya uirup koro ru oro-peka iteki paye yan, samata, Samaria un utara koro kotan orota ne yakka iteki ahup: koroka, ouse Israeru chisei un ru turainu wa okai hitsuji chikoikip otta paye yan.

⁷ Orowa, echi paye, aige upaskuma ki wa — Kando moshiri ehange no an ruwe ne, — ari an itak ari itak yan.

⁸ Tashum utara iwangere, rai utara hetopo-shiknure, munin tashum ki utara ashkannere, nitne kamui oashinge yan: oro isam no echi eungerai, oro isam no koropare yan.

⁹ Kongani hene, shirokani hene, shiuninkani hene echi koro kani o pukuru otta iteki omare; orowa, payekai pusaru iteki koro,

¹⁰ tu amip hene, keirehe hene, kuwa bene iteki koro yan: inambe gusu ne yakun, monraige guru anak ne aep uk kunip ne ruwe ne.

¹¹ Orowa, nep machiya ta hene nep kotan ta hene ne yakka echi kush chiki, nei ushiketa okai pirika guru hunara yan; orowa, ehopiru wa oman pakno nei guru otta reushi yan.

¹² Orowa chisei ta echi ahup chiki ko-ongami yan.

¹³ Orowa, chisei koro guru echi korʼirenga kon rusui yakun, kore yan: koroka, shomoki yak anak ne, echi koro irenga kanna boshipire yan.

¹⁴ Orowa, nen ne yakka echi uk shomoki no echi ye itak shomo nu yakun, nei chisei hene nei machiya hene orowa no echi ehopiru wa paye chiki, echi chikiri ush koponchi tuituye yan.

¹⁵ Son no echi otta Ku ye, koipishi toho ta Sodom newa Gomoron kotan akore panakte-i anak ne nei kotan kasu no kasush kusu ne.

¹⁶ Ingarʼan, Kuani echi payere ash katu anak ne hitsuji horokeu tumu un ahupte korachi ne: tambe gusu, okokko pakno wayashnu no okai, kusuwep puri-ratchi pakno puri-ratchi wa okai yan.

¹⁷ Koroka, utara yaitubare yan: inambe gusu ne yakun, utara anak ne ukoramkoro utara otta echi sange, orowa, koro uwekari chisei ta echi koshirkik kusu ne gusu ne na;

¹⁸ ruwe un, Ku rengap gusu moshiri esapane utara shik-samata hene, moshiri epungine utara tek samata hene echi nimba an kusu ne, tambe anak ne nei utara gusu hene, oya moshirʼun utara gusu hene shirosh ne kusu ne na.

¹⁹ Koroka, echi asange ita, nekon a, hemanda an itak ani itak ya gusu iteki nishomap yan: hemanda gusu ne yakun, nei ita echi ye kuni itak anak ne akoropare kusu ne gusu ne na.

²⁰ Echi yaikota ye itak shomo ne wa, echi koro Michi kon Ramat echi keutura oshiketa itak hawe ne ruwe ne.

²¹ Orowa, iriwak anak ne iriwakihi araigere gusu ekoshi, michihi anak ne koro poho sange kusu ne: samata, po utara anak ne koro ona koro unu koiyonnuppa wa raigere kusu ne.

²² Orowa, echi utara anak ne Ku reihei ankushkeraipo obitta no okai utara orowa no aetunne kusu ne: koroka, okese pakno yaishiporore gurʼanak ne, nei gurʼanak kashiaobiuki kusu ne.

²³ Koroka, tan machiya ta utara echi keshke chiki, nei samake an machiya orun kira yan: son no echi otta Ku ye, — Echi utara Israeru un machiya ebitta kush shomoki, aine, Ainu Poho ek kusu ne na.

²⁴ Koikara guru anak ne epakashnu guru kasu no an ambe shomo ne, ausshiunere guru anak ne kon nishpa kasu no an ambe shomo ne ruwe ne.

²⁵ Koikara guru anak ne koro epakashnu guru nei no an, ausshiunere guru kon nishpa nei no an ambe anak ne pakno ne ruwe ne: chisei kon nishpa Beeruzeboru ani reikore yakun, kasu no nei chisei un utara ne yakka shomoki kusu ne ya?

²⁶ Tambe gusu iteki nei utara koishitoma yan; inambe gusu ne yakun, akamure wa anukare shomoki ambe isam, anuina wa asarare shomoki ambe shinep ka isam ruwe ne.

²⁷ Kuani kunne ita echi nure ash ambe, pekere otta ye yan: orowa, kisara ani pi-nu no echi nup anak ne, chisei kitaige wa rui hawe ani shiassuru ashte yan.

²⁸ Netobake raige eashkai, koroka ramat raige eaikap utara iteki koishitoma yan: koroka, ramat hemhem netobake hemhem tup ne kane Gehenna orota isamka eashkaibe koishitoma yan.

²⁹ Tu amam e chikap anak ne shine issen gusu shomo aeiyok ruwe he an? yakka, shinep ne yakka echi koro Michi eramushkare no shiri kata hachiri shomoki ruwe ne:

³⁰ koroka, echi sapaha ush otop-tu katap obitta apishki wa an na.

³¹ Tambe gusu, iteki ishitoma yan, echi utara anak ne inne aman e chikap kasu no oro an ambe ne.

³² Tambe gusu, nen ne yakka moshima guru tek-samta en eyaipushi wa ye guru an chiki Kuani ne yakka kando otta an Ku Michi tek-samta nei guru eyaipushi wa ye kusu ne.

³³ Koroka, nen ne yakka moshima guru tek-samta en eshikashke guru an chiki, Kuani ne yakka kando otta an Ku goro Michi tek samta nei guru eshikashke kusu ne na.

³⁴ Kuani anak ne moshiri otta itomo sange kuni gusu Ku ek shiri iteki yainu yan; itomo sange gusu Ku ek shomoki, emush asange gusu Ku ek ruwe ne.

³⁵ Inambe gusu ne yakun, Ku ek katu anak ne ainu koro michi eukopire, matne poho ne yakka koro habo eukopire, koshmat koro shiuto-habo eukopire kuni gusu Ku ek nisa ruwe ne:

³⁶ orowa, ainu epokba utara anak ne yaikota koro uni un utara ne kusu ne ruwe ne.

³⁷ En akkari koro michi hene koro habo hene kasu no ko-omap gurʼanak ne, En ko-oripak shomoki ruwe ne; orowa, En akkari koro okkai poho hene matne po hene kasu no koomap gurʼanak ne, En ko-oripak shomoki gunʼne.

³⁸ Orowa, koro utasap uk wa En osh shomo ek gurʼanak ne En ko-oripak shomoki guru ne ruwe ne.

³⁹ Kon ramat pa gurʼanak ne, nei ambe turainu kusu ne; orowa, Ku rengap gusu kon ramat turainu gurʼanak ne, ramat pa kusu ne ruwe ne na.

⁴⁰ Echi uk gurʼanak ne En uk ruwe ne, orowa, En uk gurʼanak ne En omandep uk ruwe ne na.

⁴¹ Uweingara guru ne gusu uweingara guru uk gurʼanak ne uweingara guru koro pummaha uk kusu ne; orowa oupeka guru ne gusu oupeka guru uk gurʼanak ne oupeka guru koro pummaha uk kusu ne ruwe ne.

⁴² Orowa, nen ne yakka En koikara guru ne gusu teda okai shine nokan guru otta nam wakka shine itangi patek poka kure gurʼanak ne, son no echi otta Ku ye, nei guru anak koro pummaha earikimre turainu shomoki kusu ne ruwe ne na.