I Timoteos 6 - Ashiri Aeuitaknup Iyohaichish Yona 1897

6 Ik.

¹ Rekut unbe pokta ausshiune wa okai utara yaikota koro nishpa aainukoro kunip ne sekoro esanniyo yak pirika, tambe anak ne Kamui reihei newa nei epakashi shomo akoatcha kuni gusu ne na.

² Orowa, eishokor-i atte nishpa utara koro utara anak ne, iteki nei utara pange yak pirika, iriwak utara ne ruwe ne gusu ne na; torota, makangane otta yaishieiwangere yak pirika, inambe gusu ne yakun, nei pirika ikip koro utara anak ne eishokoro utara ne, omap ki utara ne ruwe ne. Tap okaibe epakashnu wa onishnishi yan.

³ Moshima okai epakashi epakashnu hine, nisashnu itak, chikoro Utarapa ne Yesu Kiristo koro itak otta hemhem Kamui kooripak korachi an epakashi otta hemhem ramuoshma shomoki guru an chiki:

⁴ nei guru anak nep ne yakka erampeutek wa pittaranne, koroka, Kamui kooripak ambe anak ani eyaiepirikare kunip ne sekoro yainu wa eyaitunnap keutum hemhem, upaore ambe hemhem, Kamui koatcha ambe hemhem, wenbe eyainu ambe hemhem, keutura munin wa

⁵ sonep sak wa oheuge upahunara hemhem patek iki guru ne ruwe ne.

⁶ Koroka, Kamui kooripak wa yaiyainuwere ambe anak ne poro aepirikarep ne:

⁷ nep ne yakka koro wa moshirʼotta araki ash shomoki, samata nep ne yakka koro wa moshiri kohoppa eaikapbe ne ruwe ne gusu ne na:

⁸ koroka, aep newa amip chi koro hine yaiyainuwere ki kusu ne na.

⁹ Koroka, yaieoteknure rusui utara anak ne, isamka ambe newa wen ushike ta utara esumba wa aronnu korachi an akoramnukara ambe newa akbe newa inne no okai ohaita iwende ibeporore ambe oro-oshma ruwe ne.

¹⁰ Inambe gusu ne yatun, ichen omap ambe anak ne usa okai wenbe koro shinrit ne ruwe ne: sereke okai utara anak ne nei ambe epa kuni iki hine eishokor-i wano ashiren, aige, inne no okai shirikirap ani yaiotke kushna nisa ruwe ne na.

¹¹ Koroka, Kamui koro ainu e ne gusu, tap okaibe eshaot yan; aige, oupeka ambe, Kamui kooripak ambe, eishokor-i atte ambe, omap ambe, yaiyupupu ambe,

¹² ramushiroma ambe keseamba yan. Eishokor-i gusu an pirika tumi iki yan, otusashuishiri pakno an inotu shikkashima yan, nei ambe gusu e nishuk an okere, samata, inne utara shik-samata pirika paweteshu ambe e ki nisa ruwe ne.

¹³ Obitta no okaibe shiknu kuni ne koshiratki Kamui tek-samata ne yakka, Pontio Pirato kotchaketa pirika paweteshu ambe iki Kiristo Yesu shik-samata ne yakka e kashpaotte ash na;

¹⁴ chikoro Utarapa ne Yesu Kiristo anukara pak no, echi sak no, aekot kuni ushike isam no,

¹⁵ nei ikashpaotte shikkashima yan: yaikota koro pakihi ta Shinuma nei ambe nukare kusu ne, Shinuma anak ne shinnunuke an patek Sapanep ne Ahekote nishpa utara ok kashi an Ahekote Kamui ne, utarapa utara ok kashi an Utarapa ne ruwe ne;

¹⁶ Shinuma patek shomo rai-ambe koro hine otta karange no arapa eaikap shiripekere ta oshiroma ruwe ne; inan guru ne yakka naa shomo Shinuma nukara, samata, Shinuma nukara eaikap ruwe ne; Shinuma orun otusashuishiri wano otusashuishiri pakno an aainukorobe newa kiroro an na. Amen.

¹⁷ Tan moshiri ta okai wa oteknu utara anak ne iteki yaiesanniyorire hene ki, iteki autumotne an ikoro eyaikopashte hene ki, koroka, ani eyainupetnere kuni gusu nuye an no obitta no okaibe un kore Kamui eyaikopashte kuni ikashpaotte yan;

¹⁸ nei utara pirikap iki,

¹⁹ pirika iki ambe gusu nuye an no iki, eimek wa utara tura no koro hine iyoshi no ek kusu ne pakihi gusu, yaikota gusu pirika asamaha ande wa nei inotu, son no inotu, aeumashnure kuni ne kashpaotte yan.

²⁰ Aa Timoteos, e shikkashimare an okaibe epungine hine momok an oha-hawe orowa no hene shunge no aye eramushbe epokbap orowa no hene yaiohaitare yan;

²¹ sereke okai utara anak ne nei okaibe eishokoro kunak ye wa eishokor-i ohaita nisa ruwe ne na. Irenga e otta an kuni akoramkon na.