I Timoteos 5 - Ashiri Aeuitaknup Iyohaichish Yona 1897

5 Ik.

¹ Ekashi ne chiki iteki kopashirota, koroka, michi korachi onishnishi yan;

² upen utara ne yakun; uiriwak utara korachi; rupne shiwentep utara ne yakun, habo korachi, upen mat ne yakun, nep turu-ushbe sak no, turesh korachi iki yan.

³ Son no okai shiyompiyara shiwentep kooripak yan.

⁴ Koroka, nei shiyompiyara shiwentep anak poho hene mitpo hene koro yakun, nei utara anak ne yaikota koro uni un utara epeka hoshiki no kooripak ki hene koro eshikop utara tasa kore kuni iki yak pirika; tambe anak ne Kamui nupetnerep ne ruwe ne gusu ne na.

⁵ Koroka, son no newa shiyompiyara ne hine shinen ne po an shiwentep anak ne Kamui echipachipa, aige, kunne to ta ne yakka tokap to ta ne yakka ramma-kane Kamui koramkoro hemhem ki inonno-itak hemhem ki ruwe ne.

⁶ Koroka, shiniwe patek gusu iki shiyompiyara shiwentep anak ne shiknu rapoketa rai wa an ruwe ne.

⁷ Nei utara anak ne aekot kuni ushike isam kuni ne tap okaibe ne yakka kashpaotte yan.

⁸ Koroka, inan ainu ne yakka yaikota korobe gusu, makangane yaikota koro uni un utara gusu, etoko-oiki shomoki yakun, shinuma anak aeishokor-i eshikashke ruwe ne, aige, eishokoro shomoki guru kasu no wen guru ne ruwe ne na.

⁹ Ouse shine ainu kon machi ne, samata, pirika buri gusu pirika assuru koro hine hotne pa pokashnu pa an yakun, iteki shiyompiyara oma kambi kata sapa nuye yan,

¹⁰ nei guru anak ne poho utara reshpa yakun, atchi un utara ayando kore yakun, ashkanne utara chikiri uraye yakun, yairamhekonro utara kaobiuki yakun, shiarikiki no obitta no okai pirika ikip nei no iki yakun, sapaha nuye yan.

¹¹ Koroka, upen shiyompiyara shiwentep gusu iteki sapaha nuye yan: inambe gusu ne yakun, nei utara Kiristo gusu keutum ehaita chiki,

¹² shui soshipi rusui; aige, nei utara anak ne atpakta koro eishokor-i atte keutum eyaikoemaka gusu ekokatpakte ruwe ne na.

¹³ Samata, nei no okai utara anak ne toranne iki wa chisei pishno shioyapkire apkash; toranne patek shomo ne koroka paro-rui ne yakka ki, moshima guru orushpe orun isaikako, aige, shomo aye kuni itak ye ruwe ne.

¹⁴ Tambe gusu, upen shiwentep utara anak ne hoku koro wa poho shikore, orowa, epokba guru oitakushi gusu an ika shomo kore hine koro uni shikkashima kuni ku kon rusui ruwe ne;

¹⁵ inambe gusu ne yakun, sereke an utara anak ne tane ne yakka Satan orun henoye okere ruwe ne.

¹⁶ Eishokoro iki shiyompiyara shiwentep koro shiwentep an chiki, shinuma nei utara kaobiuki yak pirika, aige, son no an shiyompiyara kaobiuki eashkai kuni ne iteki karisia seire yan.

¹⁷ Pirika no epungine puresbuteros utara eusamanu aainukoro kunip ne sekoro esanniyo yan, makangane nei itak gusu ne yakka epakashnu ambe gusu ne yakka monraige utara epeka nei no iki yan.

¹⁸ Inambe gusu ne yakun, amam ibehe oashinge beko otta iteki etukarip eunu yan, sekorʼambe Kamui kambi kata anuye wa an ruwe ne gusu ne na. Samata, monraige guru anak ne koro pummaha akore kunip ne ruwe ne na.

¹⁹ Tun ren paweteshu guru iki ambe shomo ne yakun, puresbuteros epeka eiyonnuppa ambe iteki uk yan.

²⁰ Chikokatpak utara okai chiki, moshima okai utara ishitoma kuni ne obitta no okai utara shik-samata pakashnu yan.

²¹ Oheuge sak no tap okaibe e iki, ainu kashiramu gusu shomo ki no nep ne yakka ki kuni ne Kamui tek-samata newa Kiristo Yesu teksamata newa anumge wa okai Kamui hauturumbe tek-samata newa e ikashpaotte ash na.

²² Yaitunashka wa ainu kata iteki teke ande, shui, moshima guru tura iteki chikokatpak koro: yaituru-sak no e an kuni ki yan.

²³ Tewa no ouse wakka patek shomo iku, koroka, e honihi gusu hemhem kanna-kanna e etashumka ambe gusu tonoto pon no ka eiwange yan.

²⁴ Sereke okai utara koro chikokatpak anak ne etoko wano aeramanbe ne, aige, aesanniyo kuni ne hoshiki no arapa; orowa, sereke okai utara korobe gusu anak, nei ambe iyoshi no arapa ruwe ne.

²⁵ Tambe nei no ne yakka anukarape ne pirika ikip okai; orowa, pirika shomo ne ambe anak anuina eaikap ruwe ne.