I Timoteos 3 - Ashiri Aeuitaknup Iyohaichish Yona 1897

3 Ik.

¹ Nei itak ambe sonep ne. Nen ka episkopos moni gusu yaishieiwangere-hi hunara guru an chiki, shinuma pirika ambe kon rusui ruwe ne.

² Tambe gusu episkopos anak ne aekot kuni ushike sak, ouse shine mat koro, yairamatte wayashnu keutum koro, irammakaka an, ikateomare ki, epakashnu eashkai, shomo iku-sakayo ki,

³ ainu kokik shomoki guru ne kunip ne; koroka, yaikatanu keutura koro, koiki kopan, aetunne kuni ani eyaiepirikare ambe shomo ko-omap guru ne kunip ne:

⁴ pirika no yaikota kot chisei epungine hine nep yaikatanu ambe tura koro poho itaknure;

⁵ (koroka, ainu anak ne nekon a yaikota koro uni epungine ambe erampeutek chiki, hemanda iki wa Kamui karisia shikkashima eashkai ruwe he an? tanebo baptisma akore guru shomo ne,)

⁶ ikineipeka shinuma pakesara wa nitne kamui nei no aesanniyo korachi aesanniyo kusu ne na.

⁷ Naa moshima, soita okai utara anak shinuma gusu pirika paweteshu ambe koro kunip ne; ikineipeka shinuma aesapse wa nitne kamui koro akbe oro-oshma kusu ne na.

⁸ Diakonos utara ne yakka yaikatanu kunip ne, iteki tu parumbe koro, iku rui shomoki, aetunne kuni ani yaiepirikare ambe kon rusui shomoki;

⁹ turu-sak keutum ani eishokor-i gusu an mukke ambe shikkashima.

¹⁰ Tan utara hoshiki no aeshiruwande yara; orowa, wen-buri sak yakun, diakonos korachi yaishieiwangerere yan.

¹¹ Shiwente utara ne yakka yaikatanu kunip ne, shomo ohaigekara, yairamatte, nep ne yakka gusu son no ambe ki kunip ne ruwe ne.

¹² Diakonos utara anak ne ouse shine mat koro wa irammakaka yaikota koro uni newa poho utara epungine.

¹³ Inambe gusu ne yakun, diakonos ki kuni moni epeka pirika no yashieiwangere okere utara anak ne yaikota gusu pirika assuru koro, samata, Kiristo Yesu otta an eishokor-i gusu shi no rametok kon no an kusu ne ruwe ne gusu ne na.

¹⁴ Naa pon no okaketa e orun ku oman kuni ku chipachipa wa tapan okaibe ku nuye ruwe ne;

¹⁵ koroka, ohon no uturuta shomo ku ek yakun, Kamui kora kenru ta ainu utara anak ne nekon a iki yak pirika ya e eraman kuni gusu ne na, nei ambe anak ne ishu Kamui koro karisia ne, sonep gusu an ikushpe newa asamaha ne ruwe ne.

¹⁶ Orowa, shomo aye a yakka, Kamui kooripak gusu an mukke ambe anak ne poro ruwe ne; Shinuma anak ne kam oshiketa anukara, ramat oshiketa oupekap ne aesanniyo, Kamui hau-turumbe orowa no anukara, moshiri uirup tumuge ta aeupaskuma, moshiri kata aeishokoro an, arakuru orun auk okere na.