I Timoteos 2 - Ashiri Aeuitaknup Iyohaichish Yona 1897

2 Ik.

¹ Obitta no okai utara gusu koramkoro itak hemhem, inonno-itak hemhem, Kamui anishuk itak hemhem, yaiiraige an ambe hemhem, hoshiki no aye kuni kuani e onishnishi ash na;

² Moshiri shikkashima utara newa pase nrondum koro utara gusu ne yakka; tambe anak nekon a ka Kamui kooripak an no yaikatanu hine ratchitara wa itomo kon no oshiroma kuni gusu ne na.

³ Nei no ikichi ambe anak ne un kashiobiukip ne Kamui tek-samata pirika newa nupetnere ambe ne;

⁴ obitta no okai utara kashiaobiuki wa sonep eraman kuni ambe anak ne Shinuma koro keutum ne ruwe ne.

⁵ Inambe gusu ne yakun, shine Kamui an, Kamui newa ainu uturu shine iyuturuoma guru an, ainu ne,

⁶ Kiristo Yesu ne, Shinuma anak ne obitta no okai utara kikiraye gusu yaikota yaiyange nisa ruwe ne; aige, yaikota koro pakihi ta aepaweteshu an ambe ne na;

⁷ nei ambe assuru ashte guru newa Apostoro ne kuni gusu a en atte okere (sonep ku ye, ku shunge shomoki,) eishokor-i newa sonep Oya un utara epakashnu gusu a en atte an na.

⁸ Tambe gusu nei ita ne yakka okai utara anak ne kimakara newa utumashi keutum isam no turu-sak tekehe puni hine inonno-itak ki kuni ku kon rusui ruwe ne.

⁹ Tambe nei no shiwente utara oripak an hine yaikatanu wa pirikap kopakeat amip ani yaimire; otop oshke ambe ani hene kongani ani hene ikani ani hene ataye yupke amip ani hene iteki ki yak pirika; koroka,

¹⁰ (Kamui kooripak sekoro ye shiwente utara kopakeat korachi) pirika ikip ani ki yan.

¹¹ Shiwente guru anak ne itaknu wa eyaihannokkara yak pirika.

¹² Koroka, shiwentep anak ne epakashnu wa okkai esapane ambe ku ramuoshma shomoki, koroka, mo no an yak pirika Inambe gusu ne yakun,

¹³ Adam anak ne hoshiki no akara, okaketa Hefa; shui, Adam akokandama shomoki,

¹⁴ koroka, nei shiwentep akokandama wa chikokatpak ki okere ruwe ne:

¹⁵ koroka, nei utara yaikatanu ambe tura eishokor-i atte hemhem ki, omap ambe hemhem ki, aturu-saktep otta an hemhem iki yakun, poho shikore ita akaobiuki kusu ne na.