I Timoteos 1 - Ashiri Aeuitaknup Iyohaichish Yona 1897

1 Ik.

¹ Chikoro un kashiobiukip ne Kamui ikashpaotte newa, gusu echipachipa ash Kiristo Yesu ankushkerai Kiristo Yesu koro Apostoro ne akara Pauros ku ne anak ne,

² eishokor-i gusu son no an ku poho ne Timoteos otta kambi ku omande na: Michi ne Kamui newa chikoro Utarapa ne Kiristo Yesu orowa no irenga hemhem, rampoken hemhem, itomo hemhem echi kore an kuni akoramkon na.

³ Etokota Makedonia moshirʼotta ku arapa ita eani anak ne Epesos kotan ta riya hine, okai an utara anak ne moshima an epakashi iteki epakashnu, samata, eishokor-i oma Kamui orowa no ashikkashimare ambe shomo ne no an,

⁴ koroka, makangane upahunara ambe hetukure uwepekere newa ainu ikiri reihei gusu an orushpe iteki ekotanu wa esanniyo kuni ne ku ikashpaotte ash korachi, tane ne yakka ku iki na.

⁵ Koroka, nei ikashpaotte eramushinnere ambe anak turu-sak sambe wano omap-hi oashinge ambe hemhem, aotkeotke shomo ne an keutura korobe hemhem, kankapkapeka sak no an eishokor-i atte ambe hemhem ne ruwe ne:

⁶ tapan okaibe gusu sereke okai utara ihaita wa oha-itak eun eshirihoshi henoye nisa ruwe ne;

⁷ nei utara anak ne yaikota sange itak hene shiyuppa no ye orushpe ikkeu hene erampeutek a yakka, tuitak epakashnu utara ne rusui ruwe ne.

⁸ Koroka, ainu anak ne oheuge sak no nei tuitak eiwange yakun, tuitak anak pirikap ne sekoro chi eraman;

⁹ tambe ka chi eraman, tuitak anak ne oupeka utara gusu akarape shomo ne, koroka, ihaita keutura koro utara newa itakkashi utara gusu Kamui kooripak shomoki utara newa chikokatpak utara gusu, turu-ush utara newa momok utara gusu, michihi raige utara newa unuhu raige utara gusu, keweuk utara gusu,

¹⁰ hoiyo utara gusu, ukokateaikap utara gusu, ainu eikka utara gusu, shunge utara gusu, ikoshunge utara gusu, samata, nep ne yakka nisashnu epakashi kopakeat shomo ne ambe an chiki, nei ambe gusu tuitak akan na;

¹¹ tambe anak en shikkashimare shinnunuke an Kamui arakuru gusu an pirika shongo nei no an ap ne ruwe ne na.

¹² En eashkaire chikoro Utarapa ne Kiristo Yesu ku koyaiiraige na, Shinuma anak ne ikipniukesh guru ku ne sekoro esanniyo hine otta ku yaishieiwangere kuni ne en atte nisa ruwe ne gusu ne na;

¹³ etokota Kamui koatchap ku ne, keshke guru ku ne, shomo yaikatanu ki guru ku ne a yakka: aige, ku eumbipka wa erampeutek no nei no ku iki nisa ruwe ne gusu aerampokiwen wa a en kore an na;

¹⁴ orowa, chikoro Utarapa korʼirenga anak Kiristo Yesu oshiketa an eishokor-i newa omap ambe tura shi no nuye an no an nisa ruwe ne na.

¹⁵ Kiristo Yesu anak ne katpak koro utara kashiobiuki gusu moshirʼotta ek nisa ruwe ne ari an itak anak ne son no ambe ne, utara shikkashima kuni an itak ne ruwe ne na; nei utara tumuge ta iyotta wenbe ku ne ruwe ne!

¹⁶ Yakka, tapan ikkewehe an gusu a en erampokiwen wa akore ruwe ne, tewa no shiokere shomoki inotu aoma kuni ne Shinuma eishokoro utara epeka shiroshi ne gusu iyotta wenbe ne en otta Yesu Kiristo anak ne obitta no okai koro ramushiporore ambe nukare kuni gusu ne na.

¹⁷ Tane, otusashuishiri pakno an, munin shomoki, anukara eaikap, patek Kamui ne, Moshiri shikkashimap otta aeoripakbe newa arakuru newa ramma-ramma an na. Amen.

¹⁸ Ku poho ne Timoteos, ani pirika tumi e kotumikoro iki kuni ne, teeda e kashita etoko arapa uweingarape an korachi,

¹⁹ ku e ikashpaotte ash na; aotke-otke shomo ne an keutura ani korachi eishokor-i atte yan; sereke okai utara anak ne nei ambe epeka eyaikoemaka hine eishokor-i gusu mimam-awende okere ruwe ne:

²⁰ nei utara tumugeta Humenaios newa Areksandros okai; aige, nei utara iteki Kamui koatcha kuni ne aepakashnu gusu, Satan otta ku arapare nisa ruwe ne na.