I Tessaronike 4 - Ashiri Aeuitaknup Iyohaichish Yona 1897

4 Ik.

¹ Orosama iriwak utara echi utara, nekon a arabe ani apkash wa Kamui nupetnere kusu ne a ambe ne ya, un otta echi nu a gusu, nei no korachi echi apkash kuni ne — naa naa echi nuye an no okai kuni gusu — Utarapa ne Yesu Kiristo gusu koramkoro wa echi onishnishi ash ruwe ne.

² Echi utara anak ne nekon a ikashpaotte ani Utarapa ne Yesu gusu chi utara echi kashpaotte nisa ruwe ne ya, echi eraman ruwe ne gusu ne na.

³ Kamui keutura anak ne ene ani ne, echi turu-sak wa shomo hoiyo ki;

⁴ pishno pishno echi utara anak koro aeramhekotep turu-sak no aeoripak an no shikkashima arabe echi eraman wa,

⁵ shomo Kamui eamkiri oya utara nei no wenbe ki rusui yainu-hi koro shomoki no okai:

⁶ inan guru ne yakka tap ambe otta iteki eikaunu ki hine koro iriwak ika kokandama na: inambe gusu ne yakun, chi utara teeda anu no chi ye wa nure ash korachi, tap okaibe gusu Utarapa anak ikemnu ki ambe ne ruwe ne gusu ne na.

⁷ Kamui anak ne ichakkere ambe un kire gusu un nishuk shomoki, un turu-sakte gusu un nishuk nisa ruwe ne.

⁸ Tambe gusu, emaka gurʼanak ne ainu emaka shomoki, koroka, echi otta Ashkanne Ramat koropare Kamui emaka ruwe ne na.

⁹ Koroka, iriwak utara otta omap ki ambe gusu anak, shomo echi orun kambi ku omande yak pirika ruwe ne: inambe gusu ne yakun, echi yaikota anak uwe-utashpa uwe-omap kuni ne Kamui orowa no aepakashnu wa an ruwe ne gusu ne na;

¹⁰ son no poka Makedonia moshiri ta obitta no okai iriwak epeka echi iki shiriki okai ruwe ne na. Koroka, iriwak utara, naa naa echi nuye an no okai kuni ne echi onishinishi ash;

¹¹ samata, echi kashpaotte korachi koro teke ani monraige hine yaikota koro moni esanniyo wa mo no okai kuni ne ramepakari;

¹² samata shui, nep ne yakka echi eishiramne ushike isam wa soita okai utara epeka oupeka keutum kon no apkash kuni ne echi onishnishi ash na.

¹³ Koroka, iriwak utara, mokonnoye utara gusu echi erampeutek-hi chi kopan; aechipachipa kuni ushike sak no moshima no okai utara korachi iteki echi ok keutum koro kuni gusu ne na.

¹⁴ Inambe gusu ne yakun, Yesu rai wa hetopo-shiknu sekorʼambe chi eishokoro yakun, nei no korachi Yesu ankushkerai mokonnoye utara anak Shinuma tura Kamui ani wa ek kusu ne.

¹⁵ Utarapa itak ani tambe echi orun chi ye, shiknu wa okai chi utara, Utarapa ek-hi pakno okai utara anak, son no poka mokonnoye utara etokota paye shomoki kusu ne.

¹⁶ Inambe gusu ne yakun, Utarapa yaikota anak ne hawe ashte, sapane an hauturumbe koro hawe ani, Kamui rappa koro wa kando orowa no ran kusu ne: aige, Kiristo oshiketa rai utara hoshiki no hetopo-shiknu:

¹⁷ orowa no, shiknu wa okai utara, ahoppa wa okai utara anak, rik-mau tumta Utarapa uwetunangara kuni ne nei utara tura no nishkuru orun auk kusu ne: aine, ramma pakno Utarapa tura no okai kusu ne na.

¹⁸ Tambe gusu, tap okai itak ani uwe-utashpa onishnishi yan.