I Tessaronike 1 - Ashiri Aeuitaknup Iyohaichish Yona 1897

1 Ik.

¹ Pauros newa Sirounos newa Timoteos anak ne Michi ne Kamui oshiketa an Tessaronike un karisia otta kambi omande na: irenga newa itomo echi utara gusu anro.

² Chi utara anak ne inonno-itak ki ita echi korʼorushpe ye hine ramma-kane obitta no okai echi utara gusu Kamui koyaiiraige na;

³ aige, Michi ne chikoro Kamui kotchaketa an eishokor-i oma ikip newa omap oma monraige ambe newa chikoro Utarapa ne Yesu Kiristo oshiketa chipachipa oma yaiyupupu ambe newa chi eshkarun wa iki na;

⁴ aine, Kamui orowa no aomap an iriwak utara, echi anumge an ambe eraman shiriki,

⁵ inambe gusu ne yakun, chikoro pirika shongo anak ne ouse itak ani patek echi otta ek ka shomoki, koroka, kiroro ani ne yakka, Ashkanne Ramat ani ne yakka, shi no aeshikno an ambe ani ne yakka ek nisa ruwe ne; echi tumugeta chi okai rapoketa echi rengap gusu echi epeka no nekon a ainu chi ne ya echi eraman poka korachi ne ruwe ne na.

⁶ Orowa, echi utara anak ne poron no aeramchuptek ambe newa Ashkanne Ramat oma yaikopuntek-hi tura itak uk hine chi utara newa Utarapa a un eikoisamba utara ne akan ruwe ne;

⁷ Makedonia newa Akaya kotan ta obitta no okai eishokoro utara gusu aikoikarabe echi ne pakno ne ruwe ne.

⁸ Inambe gusu ne yakun, Utarapa koro itak echi orowa no assuru-aashte okere, ouse Makedonia newa Akaya otta patek shomo ne, koroka, inan ushiketa ne yakka Kamui epeka no an echi koro eishokor-i anak ne assuru an na; tambe gusu nepka chi ye shomoki yakka aeraman ruwe ne.

⁹ Inambe gusu ne yakun, nei utara yaikota ye wa nekon a chi ki hine echi tumugeta ahup ash ya un gusu assuru ashte ruwe ne: samata, ishu newa son no an Kamui gusu yaishieiwangere hemhem ki, kando orowa no ek Shinuma koro Poho untere hemhem ki kuni ne potoki echi emakba wa Kamui orun hosari an ambe ye nisa ruwe ne;

¹⁰ Kamui anak ne rai i orowa no Shinuma hetopo-shiknure nisa ruwe ne, tambe anak, ek kusu ne irushka-i orowa no un ohaitare Yesu ne ruwe ne na.