I Petros 5 - Ashiri Aeuitaknup Iyohaichish Yona 1897

5 Ik.

¹ Tura no iki ekashi, samata, Kiristo iki yairamshitnere-hi gusu paweteshu ki, samata anukara kusu ne nupeki ne yakka tura no koro guru ku ne anak ne, tambe gusu,

² echi tumugeta okai ekashi utara onishnishi ash na: Echi tumugeta okai Kamui koro topaha reshpa yan, nekon a ka akire wa an gusu shomo ne wa, koroka, Kamui an gusu eyaitupa keutum koro wa esapane yan; samata, aetunne kuni yaiepirikare ambe gusu shomo ne no, etoko-oiki wa an keutum koro wa ki yan;

³ shui, echi epungine kuni gusu akorep enishpane shomo ne, koroka, nei topaha gusu aekoikarape gusu yaikara yan.

⁴ Orowa, nei esapane reshpa guru anukara ita echi utara anak ne nin shomoki nupeki oma sapa umbe echi akore an kusu ne na.

⁵ Samata, echi okai upeure utara, ekashi otta koitaknu yan. Ruwe un, echi utara obitta uweutashpa ukoyaishieiwangere gusu oripak ambe ani yai koshaye wa okai yan: inambe gusu ne yakun, Kamui anak ne shiokunnure utara eshishi, koroka, oripak an utara otta irenga sange wa koropare ruwe ne gusu ne na.

⁶ Tambe gusu pakihi epa kuni ita echi rikta aande kuni gusu, Kamui kiroro un teke choropoketa echi okai wa yaioripakka yan;

⁷ echi ki nishomap ambe obitta Shinuma otta seire, Shinuma echi esanniyo ruwe ne gusu ne na.

⁸ Yaishikkashima wa yairamatte yan; echi epokba nitnep anak ne hawe ashte shishi korachi e kuni guru hunara gusu apkash korʼan ruwe ne:

⁹ ukorachi an aeramshitnere ambe anak ne moshiri otta okai echi iriwak utara otta ne yakka an sekoro echi eraman wa, utumashi shomoki no eishokoro wa nei ipokbap shisamchashnure yan.

¹⁰ Orowa, Kiristo oshiketa koro aokere shomoki nupeki otta echi tak obitta no okai irenga koro Kamui anak ne, pon no uturuta echi eramusarak okaketa, Shinuma yaikota echi ramushinnere, echi roshkire, echi tumashnure kusu ne.

¹¹ Shashuishiri wano shashuishiri pakno Shinuma otta kiroro an na. Amen.

¹² Chikoro ikipniukesh iriwak ne sekoro ku esanniyo Sirouanos ani takne no echi gusu kambi ku nuyere yara, aine, onishnishi ku ki, samata, tambe anak ne Kamui son no irenga ne sekoro, paweteshu ku ki ruwe ne; nei ambe otta utumashi shomoki no roshki yan.

¹³ Echi tura no anumge Babironia kotan ta okaibe echi ekap ruwe ne; shui, ku poho ne Markos ne yakka nei no ki na.

¹⁴ Onrap an chopchopse ambe ani uweutashpa uwekap yan. Kiristo oshiketa obitta no okai echi utara gusu itomo an a an na.