I Petros 3 - Ashiri Aeuitaknup Iyohaichish Yona 1897

3 Ik.

¹ Tap korachi, machi ne echi utara, yaikota koro hoku otta itaknu yan: nei utara poka itak otta ko-nu shomoki no,

² nei itak sak no an a yakka, echi puri pirikap ne oripak ambe nukara hine, koro machi ki buri ani aitaknure kuni gusu ne na.

³ Yaitomte kara chiki, shomo anukara kuni sapa shiocha hene ki, shomo kongani an tombe unu hene ki, mipihi utomchiure hene shomo ki, koroka,

⁴ Kamui tek-samata shi no ataye nupuru, keutum oshiketa anuina wa an guru, munin shomoki ramu-shiroma newa rotcha keutum ani yaitomte kara yan.

⁵ Inambe gusu ne yakun, tap korachi fushkotoi ta okai Kamui gusu chipachipa ashkanne shiwentep utara anak ne yaikota koro hoku otta ko-itaknu wa yaitomte kan nisa ruwe ne:

⁶ Sara anak Abraham otta itaknu wa nishpa ari an itak ani porose ruwe ne: echi utara anak ne pirikap echi ki wa, nep ashitomare ambe gusu shomo ishitoma chiki, tane shinuma koro poho echi ne ruwe ne.

⁷ Tap korachi hoku ne echi utara, echi koro inonno-itak shomo aerannakbe ne kuni gusu, eraman no koro machi tura oshiroma, aige, echi utara ukotura shiknu irenga koro wa okai gusu, shinuma turasak awehe ne aesanniyo wa ko-oripak yan.

⁸ Orosama okeseketa, echi utara obitta keutum shineatkire, utashpa uwerampokiwen wa kore, uiriwak korachi omap ki, uweiyeramuhauge an keutum koro,

⁹ yaieoripakka wa okai yan: wenbe gusu iteki wenbe hekiru, akowenpashuipa gusu iteki kowenpashuipa ambe hekiru, koroka, makangane nunuke yan; inambe gusu ne yakun, nunuke ambe echi eikeshkore kuni gusu echi anishuk nisa ruwe ne gusu ne na.

¹⁰ Inotu omap wa, Pirika toho nukan rusui gurʼanak ne, Wenbe wano koro parumbe eshishire, Koro patoi iteki irarabe ye kuni kara yan:

¹¹ Nei guru wenbe eshishi wa pirikap ki; Itomo hunara wa nei ambe noshpa kuni ki yan.

¹² Inambe gusu ne yakun, Utarapa shikiki anak ne oupeka utara kashiketa an, Nei utara koro inonno-itak otta koro kisara ikokanu wa okai: Koroka, wenbe ikichi guru kashiketa Kamui nanuhu an ruwe ne gusu ne na.

¹³ Orowa, echi utara pirikap ki kuni echi kiroro yupu chiki,

¹⁴ echi wende guru nen ne ruwe he an? Koroka, oupekap gusu echi ayairamshitnere an yakun, echi anunuke ne: iteki nei utara ashitoma ambe gusu ishitoma yan, iteki yaikota eyairamusarakka yan; koroka,

¹⁵ Kiristo anak ne Utarapa ne sekoro echi keutura ta esanniyo yan: echi oshiketa okai chipachipa ambe ikkewehe ramu-rotcha wa ishitoma an no nen ne yakka otta ese-itak sange kuni ne ramma-kane etokooiki wa okai yan:

¹⁶ echi ohaigekara an wa, Kiristo otta echi iki pirikap wen no ye utara anak ne ayainikoroshmare kuni gusu, katpak isam no an keutum koro yan.

¹⁷ Kamui rengaine nei no esanniyo chiki, echi utara wenbe echi ki gusu aeramshitnere kasu no, pirikap echi ki wa gusu aeramshitnere-hi anak ne naa pirika ruwe ne.

¹⁸ Inambe gusu ne yakun, Kiristo anak ne Kamui otta un tura kuni ne arashui no katpak gusu ramshitnere nisa ruwe ne, tambe anak oupeka sak utara shirine oupeka an guru aeyairamshitnere ambe ne; Shinuma anak ne kara gusu araige, koroka,

¹⁹ ramat gusu ashiknure; nei ambe ani Shinuma upakashnu ushike ta okai ramat otta oman wa upaskuma ki,

²⁰ nei ramat anak ne fushkotoita, Noa okai wa shinuma kara chip aetokooiki wa an Kamui ramushiporore ki wa untere rapoketa itakkashi utara ne; nei chip otta moyo utara, tupesan niu ne utara wakka gusu kashiaobiuki nisa ruwe ne na;

²¹ nei wakka anak ne tane un kashiobiuki baptisma koro son no nokaha ne ruwe ne, tambe anak ne kara oma ichakkerep isamka gusu shomo ne, koroka, Yesu Kiristo hetoposhiknu-hi an gusu Kamui epeka no keutum yaikowepekere shomoki-i gusu an ambe ne ruwe ne;

²² Shinuma anak ne kando otta ahun wa Kamui shimon tek-samata an ruwe ne; orowa, Kamui hauturumbe hene, raondum korobe hene, kiroro umbe hene, Shinuma gusu akoitaknure an ruwe ne na.