I Petros 2 - Ashiri Aeuitaknup Iyohaichish Yona 1897

2 Ik.

¹ Tambe gusu obitta no okai wenbe hene, obitta no okai kokandama ambe hene, kankapkapeka ambe hene, eyaitunnap ki ambe hene, obitta no okai wen itak sange ambe hene oyakta ande yan;

² kashiaobiuki gusu echi shukup kuni ne, tane shiko aiai korachi,

³ Utarapa anak ne irenga an ambe ne sekoro echi sapke wa nu okere chiki, wenbe sak no an ramu oma tope ekatnu yan:

⁴ utara orowa no aemaka yakka, Kamui numge shiknu wa an aeoripak an shuma ne Shinuma orota araki yan;

⁵ echi utara ne yakka shiknu shuma ne korachi, Yesu Kiristo ani Kamui nupetnere ramat oma yangep yange kuni ne, Kamui otta yaishieiwangere ashkanne utara echi ne kuni gusu, ramat oma chisei ne echi kara an na.

⁶ Inambe gusu ne yakun, Kamui kambi kata ene an na; — Ingarʼan, Zion otta anumge, aeoripak an sapane shikkiu nep Ku ande ruwe ne: Nei ambe eishokoro gurʼanak ne shomo ayainikoroshmare kusu ne na.

⁷ Tambe gusu, eishokoro ki echi utara gusu tan aeoripak ambe an: koroka, shomo eishokoro ki utara gusu, Chisei kara utara emaka shuma anak ne, Nei shuma anak shikkiu sapane shuma ne akara nisa ruwe ne;

⁸ Orowa, Eshitchiure kuni shuma, epetchiure kuni watara ne akan nisa ruwe ne: inambe gusu ne yakun, nei utara itakkashi wa eshitchiu ruwe ne; nei ambe gusu poka nei utara anak ne aashte nisa ruwe ne.

⁹ Koroka, kunne-i wano koro iyokunnure an pekere otta echi tak Kamui koro pirika ambe assuru ashte kuni ne echi utara anak ne anumge an utara echi ne, esapane guru koro Kamui otta yaishieiwangere utara echi ne, ashkanne uirup echi ne, Kamui yaikota shikkashima kuni utara echi ne ruwe ne:

¹⁰ etokota anak ne uirup utara shomo echi ne, koroka, tane anak Kamui utara echi ne ruwe ne: etokota anak erampokiwen wa akore shomoki, koroka, tane aerampokiwen wa okai na.

¹¹ Aomap an utara, echi utara anak ne payekai utara ne, irukai reushi utara korachi echi ne wa gusu, ramat kotumikoro wa okai kam oma ibeporore ambe shomo echi ki kuni echi onishnishi ash na;

¹² Oya utara tumugeta okai rapoketa yairamatte wa okai yan: nei utara echi iyohaigekara wa wenbe ki guru echi ne sekoro ye chiki, echi ki pirika ikip nukara hine aesanniyo toho ta nei utara Kamui ramye kuni ne nei no kara yan.

¹³ Utarapa gusu utara aashtep otta koitaknu yan;

¹⁴ iyotta pase Ahekote nishpa otta hene, wen-buri ki utara panakte hemhem ki, pirikap ki utara ramye hemhem ki kuni Shinuma orowa no aette epungine utara otta hene ne yakka ki yan.

¹⁵ Inambe gusu ne yakun, echi utara anak ne pirikap ki-hi ani ramu-sak utara erampeutekbe raore kuni ambe anak ne, Kamui irenga ne ruwe ne:

¹⁶ rengaine an mondum koro yakka wenbe akamurep ne gusu iteki nei a echi koro rengaine an mondum koro yan; koroka, Kamui usshiune utara korachi echi okai yan.

¹⁷ Obitta no okai utara ko-oripak yan. Iriwak ne utara omap yan. Kamui koishitoma yan. Ahekote nishpa ko-oripak yan.

¹⁸ Auitek utara, ishitoma ki wa koro nishpane utara otta koitaknu yan; ouse pirikap newa rotcha guru otta patek shomo ne, koroka, niwen guru otta ne yakka ki yan.

¹⁹ Nen ka Kamui ko-oripak an gusu ikkewe sak no ayairamshitnere, aige, nei sarabe oknatara ambe eyaishiporore yakun, tambe anak ne irenga ne ruwe ne.

²⁰ Katpak echi ki gusu shirikik an wa echi yaishiporore yakka, nekon a airamye kuni ambe an a? Koroka, pirikap echi iki wa gusu echi ayairamshitnere hine eyaishiporore chiki, tambe anak Kamui gusu an irenga ne ruwe ne.

²¹ Tambe gusu, echi anishuk nisa ruwe ne; inambe gusu ne yakun, Kiristo ne yakka echi utara gusu ayairamshitnere, awa, nei kochi otta echi kari kuni ne, echi utara gusu aikoikarabe ande nisa ruwe ne:

²² Shinuma anak ne katpak seenne ki, koro paro otta kokandama ambe ne yakka anukara shomoki nisa ruwe ne:

²³ Shinuma, aiyoitakushi ita, shomo tasa oitakushi ki; ayairamshitnere ita kosakayokara shomoki; koroka, oupeka no koipishi guru otta yaikoropare nisa ruwe ne:

²⁴ Shinuma yaikota kon netobake oshiketa chikoro chikokatpak koro hine chikuni otta sei wa arapa, nei ambe anak ne chi utara katpak otta rai wa oupekap otta shiknu gusu ne a ambe ne; Shinuma akore shirikik-hi gusu echi utara aiwangere nisa ruwe ne.

²⁵ Hitsuji chikoikip korachi echi ru turainu shiriki wa okai, awa, tane echi kon ramat anak ne koro shiure guru ne echi epungine guru otta hoshipi wa an ruwe ne na.