I Petros 1 - Ashiri Aeuitaknup Iyohaichish Yona 1897

1 Ik.

¹ Yesu Kiristo koro apostoro ne Petros anak ne, Michi ne Kamui etoko wano eraman korachi, Yesu Kiristo koro kem aota ambe newa itaknu ambe gusu Ramat ani aashkannere wa,

² Pontus, Garatia, Kappadokia, Asia newa Bitunia ta chichari hine riya wa okai anumge utara otta kambi omande: irenga newa itomo echi gusu aporore an na.

³ Okese an ita eishokor-i ani kashiaobiuki wa okai kunak anukara kuni ne aetoko-oiki wa okai Kamui kiroro ani aepungine echi utara,

⁴ kando oshiketa eumashnu wa an munin shomoki, turu-sak wa, shomo shumumge eikeshkorobe shikkashimare kuni ne, rai orowa no Yesu Kiristo hetopo-shiknure ambe ani koro poro rampoken gusu ishu chipachipa kuni ambe otta hetopo un shikore,

⁵ chikoro Utarapa ne Yesu Kiristo koro Michi newa Kamui anak ne airamye an na.

⁶ Tambe otta, echi koro eishokor-i akoramnukara ambe anak ne, abe ani turu-sakte yakka munin kongani kasu no nupuru wa, Yesu Kiristo anukara ita airamye, anupekte, aeoripakka an kuni ne, tane irukai aki etokosh yakun,

⁷ inne no okai auwande ambe an gusu echi oknatara yakka, poron no chi utara nupetne ruwe ne.

⁸ Shomo Shinuma echi nukara yakka ko-omap ruwe ne; tane shomo echi nukara yakka, Shinuma eishokoro wa nupeki ani aeshik aye eaikap pakno an nupetne ambe ani echi poron no enupetne ruwe ne: aige,

⁹ gusu echi eishokoro ki ambe, echi kon ramat kashiaobiuki ambe echi kon ruwe ne na.

¹⁰ Nei kashiobiuki-hi gusu, echi utara gusu an irenga gusu uweingara ki uweingara utara anak ne shiarikiki no hunara wa uwepekennu nisa ruwe ne; nei utara onnaigeta an Kiristo kon Ramat anak ne,

¹¹ etoko wano Kiristo ayairamshitnere ambe hene, okaketa an kusu ne nupeki ambe paweteshu ki ita nekon a paha epeka ruwe he an? nei utara chimchimi nisa ruwe ne.

¹² Kando orowa no aette Ashkanne Ramat ani echi orota pirika shongo eupaskuma ki utara ankushkerai echi anure tan okaibe yaikota gusu ki shomoki no, echi utara gusu ki ruwe ne ambe nei utara aeramande nisa ruwe ne na; Kamui hauturumbe nei okaibe esanniyo rusui nisa ruwe ne na.

¹³ Tambe gusu, echi koro keutum ta kut koro wa yairamatte yan, orowa, Yesu Kiristo anukara ita echi utara gusu hetuku irenga utumashi shomoki no echipachipa yan;

¹⁴ itaknu poho utara korachi ki wa eramushkare ita ki korachi iteki ibeporore ambe otta yaikoropare yan;

¹⁵ koroka, echi tak Kamui anak ne turu-sak korachi, nep ne yakka gusu echi utara ne yakka turu-sak no okai yan;

¹⁶ kuani anak ne ashkanne ruwe ne gusu, echi utara ne yakka ashkanne ne kusu ne, sekoro chieshinnuye wa an ruwe ne gusu ne na.

¹⁷ Orowa, ainu kashiramu shomoki no pishno pishno an guru koro ikip an korachi koipishi Kamui, Michi nep koro korachi echi konishuk yak anak ne

¹⁸ ishitoma an on teda oshiroma yan: aige, tambe onnere yan, echi utara anak ne echi koro ekashi epakashnu raka isam no an ki buri orowa no, munin kuni shirokani ani hene kongani ani hene echi kikiaraye shomo ne,

¹⁹ koroka, turu-sak no echi-sak no an pon hitsuji korachi an Kiristo koro nupuru kem ani poka echi kikiaraye an na:

²⁰ Shinuma anak ne moshiri asama aande etoko wano aeramu ambe ne, koroka, echi utara gusu pakihi okeseketa anukare nisa ruwe ne;

²¹ echi utara anak ne Kamui otta eishokoro hene ki chipachipa hene ki kuni ne, Shinuma rai-i orowa no hetopo-shiknure wa otta nupeki koropare Kamui otta, Shinuma gusu eishokor-i ki utara echi ne ruwe ne.

²² Echi utara anak ne oheuge sak no iriwak utara omap hemhem ki, sonep otta itaknu hemhem echi ki-i ani kon ramat echi turu-sakte okere gusu, orowa,

²³ munin kuni piyehe ani shomo ne, koroka, shiknu wa okai Kamui itak ani munin shomoki piyehe ani echi hekatu wa an gusu, shiarikiki no ramuosshi wano utashpa uweomap yan.

²⁴ Inambe gusu ne yakun, Obitta no okai kam anak ne mun korachi ne. Nei tombe-i anak ne mun ponno ukorachi ne ruwe ne. Mun auak ne shumumge, nei nonno rapapse:

²⁵ Koroka, Utarapa itak anak ne otusashuishiri pakno an ruwe tapan na. Orowa tan itak anak ne echi utara otta eupaskuma an pirika shongo ne ruwe ne na.