I Korintos 9 - Ashiri Aeuitaknup Iyohaichish Yona 1897

9 Ik.

¹ Rengaine an ambe shomo ku ne ruwe he an? Apostoro shomo ku ne ya? Chikoro Utarapa ne Yesu shomo ku nukan nisa ruwe he an? Utarapa oshiketa ku ki ikip shomo echi ne ruwe he an?

² Moshima okai utara epeka apostoro shomo ku ne a yakka, echi utara gusu poka nei no ku an ruwe ne: samata, Utarapa oshiketa ku ki Apostoro kunip gusu an han echi ne ruwe ne.

³ En koipishi utara otta ku ki yaikikkara itak tambe ne ruwe ne.

⁴ Ibe hene ki iku hene ki kuni rengaine an mondum shomo chikon ruwe he an?

⁵ Samata, moshima okai apostoro utara iki korachi, Utarapa koro iriwak utara iki korachi, shui Kepas iki korachi eishokoro wa okai machihi ekeshne ani wa apkash kuni rengaine an mondum shomo chikon ruwe he an?

⁶ Shui, ouse kuani newa Barnabas patek shomo monraige kuni rengaine an mondum shomo kon ruwe he an?

⁷ Pumma uk shomoki tumi-koro guru inan guru ne ruwe? Hat-toi etoita wa orowa hetuku ibehe shomo e guru inan guru ne ruwe? Samata, chikoikip reshpa wa nei tope shomo ibe guru inan guru ne ruwe he an?

⁸ Ainu ye-hi korachi tapan okaibe ku ye ya?

⁹ Tuitak ne yakka ukorachi shomo itak ruwe he an? Inambe gusu ne yakun, Mose sange tuitak kata ene chieshinnuye wa an, — Mungi ibehe aoshinge beko otta iteki para-saranip unu yan. Nei beko esanniyo gusu Kamui anak ne ene ye ya?

¹⁰ Chi utara gusu ene aye ya? Buwe un, chi utara gusu chieshinnuye wa an na: inambe gusu ne yakun, toi-pushu guru anak ne chipachipa wa pushu kunip ne, samata, ibehe aoshinge guru anak ne koro kuni chipachipa wa iki kunip ne ruwe ne.

¹¹ Echi utara gusu ramat unbe chi etoita chiki anak ne echi koro kam unbe chi nange yak porobe ne ruwe he an?

¹² Moshima okai utara anak ne auk kunip ne okaibe an gusu echi korobe uina chiki, chi utara naa kasu no ruwe ne. Yakka nei iki kunip ne a an mondum eiwange ash shomoki nisa ruwe ne; koroka, Kiristo koro pirika shongo iteki shinneatush kuni ne nep ne yakka chi utara yaishiporore ruwe ne.

¹³ Ashkannep otta yaishieiwangere utara anak ne Kamui kora kenru ta okaibe ibe ruwe ne, orowa, yange set otta yaishieiwangere utara anak yange set ta okai aeimekbe uina ruwe ne sekorʼambe shomo echi eraman ya?

¹⁴ Tap korachi pirika shongo eupaskuma ki utara ne yakka pirika shongo gusu an okaibe gusu shiknu kusu ne-hi Utarapa esanniyo nisa ruwe ne na Koroka,

¹⁵ tap okaibe pon no ka ku eiwange shomoki nisa ruwe ne: orowa, en gusu nei no aki kuni ne tap okaibe shomo ku nuye ruwe ne: inambe gusu ne yakun, nenka ku ki yaiomonnure ambe raka-sakte kasu no ku rai yakne pirika ruwe ne.

¹⁶ Pirika shongo ku eupaskuma chiki, yaiomonnure ushike isam; ene akari ka isam no an wa a en kire an ruwe ne gusu ne na; aige, pirika shongo ku eupaskuma shomoki yakun, ku yaisambepokash humi?

¹⁷ Inambe gusu ne yakun, kuani ku rengaine tambe iki yakun, iwayehe ku goro: koroka, ku rengaine shomo ne no ku ki yakun, otta aeyaishieiwangere kunip a en shikkashimare an na.

¹⁸ Yakun, ku uk iwayehe nepta? Pirika shongo ku eupaskuma ita oro isam no nei pirika shongo ku ki kuni ambe ne, okese pakno pirika shongo gusu an ku atarimaye shomo ku eiwange kuni gusu ne ruwe ne na.

¹⁹ Obitta no okai utara gusu kuani ahonnere wa an a yakka, naa ku eyaiepirikare kuni gusu, obitta no okai utara gusu ku yaiusshiunere nisa ruwe ne.

²⁰ Yudea un utara ku epirika gusu, Yudea un guru ne kuni ku yaikan nisa; orowa, tuitak choropoketa okai utara gusu, yaikota tuitak choropoketa shomo ku an a yakka, tuitak choropoketa nepkoro ne, nei tuitak choropoketa okai utara ku epirika kuni nep ne ruwe ne;

²¹ tuitak sak utara gusu, Kamui epeka tuitak sak no shomo ku an a koroka, Kiristo gusu tuitak an, yakka, tuitak sakno okai utara ku epirika kuni gusu, tuitak sakno korachi nep.

²² Katchak utara ku epirika gusu katchakbe nepkoro ku ne: nekon a ka arage an utara ku kaobiukire kuni gusu, inan guru gusu ne yakka nep ne yakka korachi ku yaikan nisa.

²³ Orowa, pirika shongo gusu nep ne yakka ku ki, nei ambe uweukouk kuni gusu ne na.

²⁴ Hoyuppa uwetushmak ushiketa hoyuppa utara anak ne obitta hoyuppa, koroka, ouse Shinen aungeraitere ari an ambe shomo echi eraman ya? Echi utara eungeraitep aukte kuni ne hoyuppa yan.

²⁵ Uwetushmak wa iki gurʼanak ne nep nep ne yakka gusu yaishikashima ruwe ne. Onnere yan, nei utara anak ne munin kuni sapa-umbe eungerai gusu ki ruwe ne, chi utara anak shomo muninbe eungerai gusu ki ruwe ne na.

²⁶ Tambe gusu, kuani anak ne noratchitara korachi, shomo ku hoyupu; rera shirikik korachi shomo ku koiki: koroka, ku netobake ku shirikik wa nei ambe usshiunere:

²⁷ ikineipeka moshima utara otta eupaskuma ku ki orowa no shomo kuani yaikota aemakap ne kuni gusu ne na.