I Korintos 7 - Ashiri Aeuitaknup Iyohaichish Yona 1897

7 Ik.

¹ Tane, gusu echi nuye okere orushpe: Okkai-ainu anak ne mat-ainu shomo tomooshma ambe anak pirika ruwe ne:

² koroka, hoiyop an gusu ainu pishno koro machi yaikota koro yan, shui, shiwentep pishno koro hoku yaikota koro yan.

³ Akore kuni ambe hoku anak ne koro machi otta kore yan: shui, machi ne yakka koro hoku otta shem korachi ki yan.

⁴ Machi anak ne yaikota kon netobake gusu mondum shomo koro, koroka, koro hoku kon ruwe ne: shui, hoku anak shem korachi yaikota kon netobake gusu mondum shomo koro, koroka, koro machi kon ruwe ne.

⁵ Ouse iruka an pakihi gusu inonno-itak gusu moshima iteki utashpa uwe ehunara yan, orowa, echi yai-yaishik-kashima eaikapbe gusu Satan anak ne iteki echi koramnukara gusu kanna-shui ukotura koan yan.

⁶ Koroka, tambe anak ku ikashpaotte wa aye-hi shomo ne, koroka, akoramuoshma gusu ku ye ruwe ne.

⁷ Inambe gusu ne yakun, obitta no okai ainu utara en korachi poka an kuni ku kon rusui. Yakka, ainu pishno Kamui orowa no an aikrap koro, Shinen nei no an ambe koro Shinen tapne an amire kon ruwe ne.

⁸ Koroka, umurek guru ne a shomo ne utara newa shiyompiyara shiwentep otta tap ku ye, nei utara en korachi okai ambe anak ne nei utara gusu pirika ruwe ne.

⁹ Koroka, yaishikkashima eaikap chiki, umurek ne akara yan: inambe gusu ne yakun, paraparase kasu no an ambe anak ne uahupkara chiki pirika ruwe ne.

¹⁰ Koroka, uahupkara an utara otta ikashpaotte ku ki, ku ikip shomo ne, koroka, Utarapa ikip ne.

¹¹ Machi anak ne iteki koro hoku osurupa yan, (koroka, osurupa chiki, iteki kanna-shui hoku ahupkara, shomo ne yakun, koro hoku tura irenga usaraye wa okai yan), shui, hoku anak ne iteki koro machi osurupa yan.

¹² Koroka, moshimap gusu kuani yaikota ku ye, Utarapa shomo: Nep iriwak ne yakka shomo eishokoro machi koro chiki, aige, nei shiwentep

¹³ shinuma tura no oshiroma kuni ambe konoburu yakun, nei ainu iteki shinuma osurupa yan. Shui, shiwentep anak ne shomo eishokoro hoku koro chiki, aige, nei ainu shinuma tura no oshiroma kuni ambe konoburu yakun, nei shiwentep iteki shinuma osurupa yan.

¹⁴ Inambe gusu ne yakun, shomo eishokoro hoku anak ne koro machi gusu aashkannere, orowa, shomo eishokoro machi anak ne nei iriwak gusu aashkannere ruwe ne: shomo ne chiki echi koro poho utara turu-ushbe ne, koroka, tane ashkanne utara ne ruwe ne.

¹⁵ Yakka, shomo eishokoro guru paye chiki, paye yak pirika: nei ainu-iriwak ne yakka mat-iriwak ne yakka nei no okaibe gusu ausshiunere ambe shomo ne: koroka, Kamui anak ne itomo an gusu un hotuyekara nisa ruwe ne na.

¹⁶ Machihi, eani anak ne e koro hoku kashiobiuki kusu ne ya nekon a e eraman ya? Shui, hokuhu, eani anak ne e koro machi kashiobiuki kusu ne ya nekon a e eraman ruwe he an?

¹⁷ Ouse, Utarapa anak ne pishno an ainu otta eimek nei no, Kamui anak ne pishno an guru hotuyekara nei no, ene koracki apkash yan. Obitta no okai karisia gusu nei no ku ipawetenge ruwe ne.

¹⁸ Okarituye-buri akbe an no nenka ahotuyekara nisa ruwe he an? Yakun, iteki nei okarituye-buri ani shomo okarituye-buri ne kara yan. Okarituye-buri akire shomo ne an no nenka ahotuyekara ya? Yakun, iteki okarituye-buri akire yan.

¹⁹ Okarituye-buri anak ne nepka shomo ne, shui, shomo okarituye-buri akire-hi ne yakka nep ka shomo ne; koroka, Kamui ikashpaotte shikkashima ambe anak ne nepka ne ruwe ne.

²⁰ Ani ahotuyekara an ap otta ainu pishno an yan.

²¹ Ausshiune an guru an rapoketa e ahotuyekara an ruwe he an? Yakun, nei ambe nep ne ka shomo aramu yan: koroka, aehonnere eashkai chiki,

²² nei ambe eiwange yan. Inambe gusu ne yakun, ausshiunere wa an, aine, Utarapa gusu ahotuyekara gurʼanak ne, Utarapa koro ahonnere wa an gunʼne: nei no korachi, ahonnere wa an, aine, ahotuyekara gurʼanak ne Kiristo koro usshiune guru ne ruwe ne.

²³ Oro an no echi utara ahok nisa; iteki moshima an guru gusu aeyausshiunere nei no akara yan.

²⁴ Iriwak utara, otta aehotuyekara pishno an gurʼanak ne nei ambe otta oshiroma yan.

²⁵ Tane, umurek guru shomo ne utara gusu Utarapa orowa no an ikashpaotte shomo ku kon ruwe ne: koroka, ikipniukeshbe ne kuni gusu Utarapa orowa no akore rampoken koro guru korachi aesanniyop ku sange na.

²⁶ Tane an shirikirap gusu ainu anak ne tane an korachi an kuni ambe shinuma gusu pirika ruwe ne sekoro ku yainu ruwe ne.

²⁷ Machi gusu eani ahekote ya? Yakun, iteki ahonnere kuni hunara. Machi gusu e ahonnere an a? Yakun, iteki machi hunara yan.

²⁸ Koroka, mat e ahupkara yakka chikokatpak isam; shui, shiwentep hoku ahupkara yakka chikokatpak isam ruwe ne na Yakka, nei no okai utara anak ne kam gusu aeramchuptekka kusu ne; orowa, kuani echi shihopinupka ash ruwe ne.

²⁹ Koroka, tambe ku ye, iriwak utara, pakihi anak ne ataknere wa an, tambe gusu, tewa no machi koro utara anak ne mat sak korachi ne;

³⁰ orowa, chish utara anak ne shomo chish korachi ne; nupetne utara anak shomo nupetne korachi ne;

³¹ hok utara shomo koro korachi ne; orowa, moshiri eiwange mashkin korachi ne kuni gusu an ap ne: inambe gusu ne yakun, tan moshiri katuhu auak ne isam kusu ne gusu ne na.

³² Koroka, echi utara gusu aenishomap ambe isam kuni ku kon rusui. Mat sak guru anak

³³ ne Utarapa nupetnere kuni ne Utarapa korope gusu nishomap ruwe ne, mat koro guru anak ne kon machi nupetnere kuni ne tan moshirʼunbe gusu nishomap ruwe ne.

³⁴ Shui, hoku koro shiwentep newa hoku sak shiwentep uturu uwechutko no an ushike an. Hoku sak shiwentep anak ne netobake gusu ne yakka ramat gusu ne yakka ashkanne kuni ne Utarapa korope gusu nishomap ruwe ne: koroka, hoku koro guru anak ne koro hoku nupetnere kuni ne tan moshirʼunbe gusu nishomap ruwe ne.

³⁵ Orowa, echi aeyaiepirikare kuni ne tambe ku ye; echi utara kata tupep ku omare gusu shomo ne, koroka, echi aeoripak kuni, echi akokurusere keutum isam no Utarapa otta pirika no yaishieiwangere kuni gusu, ku iki ruwe ne na.

³⁶ Koroka, ainu anak ne koro matnep epeka oupeka ambe shomo ki korʼan ari yainu chiki, aige, nei matnep paha epa okere yakun, samata, koro shomoki chiki wen yakun, shinuma keutum rengaine ki yak pirika; chikokatpak isam; ahupkara yak pirika ruwe ne.

³⁷ Koroka, koro kuni ika isam wa gusu koro keutum atte hine, yaikota koro rengaine an mondum gusu kiroro koro wa koro matnep shikkashima kusu ne ari an ambe koro sambe ta oshitchiu yakun, pirika ruwe ne.

³⁸ Tambe gusu, aahupkara kuni gusu koro matnep kore gurʼanak ne pirikap ki; orowa, aahupkara kuni ne shomo kore gurʼanak ne naa kasu no pirikap ki ruwe ne na.

³⁹ Koro hoku shiknu wa an pakno machihi anak ne ahekote an na; koroka, koro hoku rai chiki, rengaine shui hoku ahupkara yak pirika; ouse Utarapa oshiketa korachi ruwe ne.

⁴⁰ Koroka, an korachi an yakun naa irammakaka an kusu ne ari ku esanniyo; aine, kuani ne yakka Kamui Ramat kon ruwe ne ari ku yainu.