I Korintos 6 - Ashiri Aeuitaknup Iyohaichish Yona 1897

6 Ik.

¹ Echi tumugeta aun guru epeka no aeiyonnupbap an chiki, ashkanne utara shomo ne no okai oupekasak utara kotchake un tak wa koipishi pakno an wenrametokbe koro guru an a?

² Samata, ashkanne utara anak ne moshiri koipishi kusu ne ambe shomo echi eraman ya? Orowa, moshiri anak ne echi orowa no akoipishi chiki, iyotta saure ambe gusu koipishi kuni echi oupak shomoki ruwe he an?

³ Chi utara anak ne Kamui hauturumbe koipishi kusu ne ambe echi erampeutek ruwe he an? Yakun, naa hemanda pakno tane an ishu-i gusu an ambe gusu shomoki ya?

⁴ Tambe gusu, tane an ishu ambe gusu an orushpe echi koipishi kunip ne a yakun, karisia orowa no nepka aramu shomo ne okai utara koipishi kuni ne echi ashte ruwe he an?

⁵ Echi yainikoroshmare gusu tambe ku ye ruwe ne.

⁶ Koro iriwak uturu esanniyo eashkai shine wayashnu guru anukara eaikap gusu eishokoro shomoki utara kotchake un echi paye wa koipishire poka pakno echi ki ya?

⁷ Ruwe un, utashpa atak wa ukoipishire ambe anak ne tane ne yakka echi utara gusu ara eikohaye ambe ne ruwe ne. Hemanda gusu nei iki ambe shirihine aeyaiwendere shomoki ya? Hemanda gusu nei ambe shirihi ne korobe akoukte shomoki ruwe he an?

⁸ Ruwe un, koroka, echi utara yaikota wen no iki wa koro iriwak utara korope kouk ruwe ne.

⁹ Samata, oupeka sak utara Kamui moshiri shomo eikeshkoro kusu ne ambe echi erampeutek ruwe he an? Iteki yaikokandama yan: hoiyo utara hene, potoki ko-ongami utara hene, omoinu ikichi utara hene, kuroma buri ki utara hene, okkai turu wen-buri iki utara hene,

¹⁰ ikka utara hene, yaikoshipuinere utara hene, ihoshki utara hene, kosakayokara utara hene, ehekem utara hene, Kamui moshiri eikeshkoro shomoki kusu ne na.

¹¹ Echi sereke utara anak ne deeda nei no okai utara echi ne a koroka, tane echi ayashke okere, koroka, echi aashkannere an na, koroka, chikoro Kamui kon Ramat newa Utarapa ne Yesu Kiristo kon reihei otta echi utara aoupekare nisa ruwe ne na.

¹² Nep okaibe ne yakka en gusu ikashpaotte kopakeat ruwe ne, koroka, obitta no okaibe en gusu pirika kunip shomo ne. Nep okaibe ne yakka en gusu ikashpaotte kopakeat; koroka, nep okaibe koro mondum ne yakka kuani en esapanere ash shomoki kusu ne na.

¹³ Honihi gusu aep, aep gusu honihi; koroka, Kamui anak ne netobake ne yakka nei okaibe ne yakka isamka kusu ne. Koroka, netobake anak ne hoiyo gusu an ambe shomo ne, koroka, Utarapa gusu an ambe ne; orowa, Utarapa ne yakka netobake gusu an ambe ne ruwe ne:

¹⁴ awa, Kamui anak ne Utarapa hetopo-shiknure nisa ruwe ne, samata, Shinuma koro kiroro ani un hetopo-shiknure kusu ne na.

¹⁵ Echi kon netobake anak ne Kiristo koro awehe ne sekorʼambe echi erampeutek ruwe he an? yakun, kuani anak ne Kiristo koro awehe ku uk wa hoiyo ki shiwentep koro awehe ne kara kusu ne ya? Oara shomo ruwe ne.

¹⁶ Samata, hoiyo ki shiwentep otta koan gurʼanak ne shine netobake ne sekorʼambe echi erampeutek ruwe he an? Inambe gusu ne yakun, — Nei tun anak ne shine kam ne, ari Shinuma itak nisa ruwe ne na.

¹⁷ Koroka, Utarapa otta koan gurʼanak ne shine ramat ne ruwe ne.

¹⁸ Hoiyo wano shaot yan. Ainu iki obitta no okai chikokatpak auak ne netobake soige an; koroka, hoiyo ki guru anak ne yaikota kon netobake epeka chikokatpak ki ruwe ne.

¹⁹ Orosama, echi kon netobake anak ne Kamui orowa no akore echi onnaigeta an Ashkanne Ramat kora kenru ne ari an ambe echi erampeutek ruwe he an? Aige, echi utara anak ne yaikota yaikorobe shomo ne;

²⁰ oro ani echi ahok okere ruwe ne gusu ne na: tambe gusu echi kon netobake otta an Kamui ko-oripak yan.