I Korintos 3 - Ashiri Aeuitaknup Iyohaichish Yona 1897

3 Ik.

¹ Orowa, iriwak utara, kuani anak ne ramat oma utara otta korachi echi otta ku ye eaikap, koroka, kam oma utara otta korachi Kiristo gusu aiai utara otta korachi ku ye nisa.

² Kam ani shomo ne, koroka, tope ani kuani echi ere ash nisa; naa echi utara nei kam uk eaikap ruwe ne gusu ne na: ruwe un,

³ tane poka ne yakka echi uk eaikap ruwe ne; inambe gusu ne yakun, echi utara tane ne yakka kam oma utara echi ne: echi tumugeta eyaitunnap newa upaore ambe an chiki, kam echi oma wa ainu utara korachi shomo echi apkash ruwe he an?

⁴ Kuani anak ne Pauros otta an Shinen ye; moshima an guru anak kuani Aporros otta an sekoro echi ye chiki, ainu utara shomo echi ne ruwe he an?

⁵ Yakun, Aporros anak ne nep ta? Pauros nep ta ruwe he an? Ankushkerai echi eishokoro yaishieiwangere utara ne ruwe ne; pishno pishno Utarapa shinuma kore korachi ne ruwe ne na.

⁶ Kuani anak ne etoita, Aporros wakka chari; koroka, Kamui anak ne shipiraspare nisa ruwe ne.

⁷ Tambe gusu, etoita guru ne yakka wakka chari guru ne yakka nep ne ka aramu kunip shomo ne, koroka, shipiraspare Kamui anak aramu kunip ne ruwe ne.

⁸ Etoita guru newa wakka chari guru anak ne shinep ne: koroka, pishno pishno yaikota iki ikip an nei no yaikota koro pummaha akore kusu ne.

⁹ Inambe gusu ne yakun, chi utara anak ne Kamui tura no ikip iki utara chi ne: echi utara anak Kamui kara kot toi ne, Kamui aashtep ne ruwe ne.

¹⁰ En koropare an Kamui irenga nei no kuani anak ne wayashnu chisei kara esapane guru korachi asamaha ku ande nisa, aige, nei kashiketa moshima guru iki wa kan ruwe ne. Koroka, utara pishno hemanda nei kashiketa iki wa kara ya yairamatte yan.

¹¹ Inambe gusu ne yakun, aande okere asamaha moshima inan guru ne yakka asamaha ande eaikap ruwe ne gusu ne na; nei asamaha anak Yesu Kiristo ue ruwe ne.

¹² Koroka, nei asamaha kata iki wa kongani hene, shirokani hene, oro an no shuma hene, chikuni hene, mun hene, kina hene ashte guru an chiki; pishno an guru iki ikip anukare kusu ne:

¹³ inambe gusu ne yakun, nei toho anak nei ambe sarare, abe ani anukare kusu ne gusu ne na; orowa, abe yaikota anak ne pishno an guru iki ikip nekon a ambe ne ya anukara gusu uwande kusu ne na.

¹⁴ Kashiketa akara inan ainu iki ikip ne yakka shiroma yakun, pummaha akore kusu ne.

¹⁵ Ainu iki ikip inan korope ne yakka uhuye wa isam yakun, nei guru akoisamka kusu ne, a koroka, shinuma yaikota anak kashichiobiuki, yakka, abe orowa no an korachi nep.

¹⁶ Echi utara anak ne Kamui kora kenru echi ne wa Kamui Ramat echi oshiketa oshiroma ambe echi erampeutek ruwe he an?

¹⁷ Kamui kora kenru isamka inan guru ne yakka an chiki, Kamui anak shinuma isamka kusu ne; inambe gusu ne yakun, Kamui kora kenru anak ne ashkannep ne, nei ambe echi ne ruwe ne.

¹⁸ Inan guru ne yakka, iteki yaikota yaikokandama yan. Tan moshirʼotta echi tumugeta nen ka wayashnu ne sekoro yaikota gusu yai-yainu guru an chiki, wayashnu guru ne kuni ne, ramu-isambe ne kuni gusu yai-kara yan.

¹⁹ Inambe gusu ne yakun, tan moshirʼun wayashnu ambe anak ne Kamui kotchaketa ramu-isambe ne ruwe ne gusu ne na. Ene chieshinnuye wa an na :— Koro irarabe gusu Shinuma anak ne wayashnu utara kishima ruwe ne: orowa shui, —

²⁰ Wayashnu utara upaure ambe anak ne raka isambe ne sekoro Utarapa eraman ruwe ne.

²¹ Tambe gusu inan guru ne yakka iteki ainu utara gusu yaiomonnure yan. Inambe gusu ne yakun, obitta no okaibe echi korobe ne;

²² Pauros hene, Aporros hene, Kepas hene, moshiri hene, inotu hene, rai ambe hene, tane an okaibe hene, ek kushki okaibe hene, obitta no okaibe echi korobe ne;

²³ echi utara anak ne Kiristo korobe ne; Kiristo anak ne Kamui korobe ne ruwe ne na.