I Korintos 2 - Ashiri Aeuitaknup Iyohaichish Yona 1897

2 Ik.

¹ Orowa, iriwak utara, echi otta ku ek ita anak ne pawetokkoro itak ani hene wayashnu itak ani hene Kamui nuinap echi orun eupaskuma shomoki nisa ruwe ne.

² Inambe gusu ne yakun, Yesu Kiristo newa utasa chikuni otta akungi kokikkikbe moshima, echi tumugeta nep ne yakka ku erampeutek kuni ku ramuoshitchiu nisa ruwe ne.

³ Orowa, echi tura no ku an ita, katchak no, ishitomo wa shiri tusushke wa an ruwe ne.

⁴ Aige, echi koro eishokor-i anak ne utara koro wayashnu ambe ta an shomoki, koroka, Kamui kiroro ta an kuni ne,

⁵ ku ye itak newa upaskuma anak wayashnu an onishnishi itak gusu an ambe ani shomo ne, koroka, Ramat newa kiroro gusu ashte kuni an itak ani ne ruwe ne.

⁶ Yakka aeramushinne okere utara tumugeta wayashnu ambe chi ye, aine, nei wayashnu-hi anak ne tan moshirʼun wayashnu ambe shomo ne, shui, isam kushki tan moshirʼun epungine utara korobe shomo ne ruwe ne:

⁷ koroka, anuina no an ambe ani Kamui wayashnu ambe chi ye, nei ambe anak ne anuina wa an, awa, chikoro nupeki gusu moshiri etoko wano aesanniyo okerep ne:

⁸ tan moshiri epungine utara obitta erampeutek ruwe ne: inambe gusu ne yakun, nei utara eraman chiki, nupeki koro Utarapa utasa chikuni otta kungi kokikkik shomoki a nangon na:

⁹ koroka, chieshinnuye wa an korachi, Shikihi shomo nukara, kisaraha shomo nu, Ainu keutum ta shomo ahunbe anak, I-omap utara gusu nep ne yakka Kamui etokooiki okaibe ne.

¹⁰ Koroka, Kamui anak ne Ramat ankushkeraipo nei okaibe un eramande nisa: inambe gusu ne yakun, Ramat anak ne obitta no okaibe chimichimi, ruwe un,

¹¹ Kamui ooho-i chimichimi ruwe ne gusu ne na. Inambe gusu ne yakun, utara tumugeta, ainu oshiketa an ainu ramat moshima, ainu gusu an orushpe eraman guru inambe ne ruwe he an? Tap korachi Kamui Ramat moshima Kamui gusu an orushpe eraman guru oara isam ruwe ne.

¹² Koroka, chi utara anak ne moshiri kon ramat shomo uina, koroka, Kamui orowa no an ramat a un kore an; nei ambe anak Kamui orowa no a un eungeraite ambe chi eraman kuni gusu ne na.

¹³ Nei okaibe ka chi ye, ainu wayashnu ambe epakashnu itak ani shomo ne, koroka, Ramat epakashnup ani ye ruwe ne; ramat oma okaibe ani ramat oma okaibe ukonukara wa iki ruwe ne na.

¹⁴ Rengaine an ainu anak ne Kamui Ramat gusu an okaibe shomo uk ruwe ne: shinuma gusu nei okaibe ramusakbe ne ruwe ne gusu ne na; shui, shinuma nei ambe eraman eaikap, ramat ani koipishi kuni gusu an okaibe ne ruwe ne gusu ne na.

¹⁵ Koroka, ramat, oma gurʼanak ne obitta no okaibe koipishi; aige, shinuma yaikota inan guru orowa no ne yakka akoipishi shomoki ruwe ne.

¹⁶ Inambe gusu ne yakun, Utarapa epakashnu kuni gusu Shinuma koro keutum eraman guru nen ne ruwe? Koroka, chi utara anak ne Kiristo koro keutum kon ruwe ne.