I Korintos 16 - Ashiri Aeuitaknup Iyohaichish Yona 1897

16 Ik.

¹ Tane, ashkanne utara gusu eungeraitep umomare ambe gusu, Garatea un karisia utara otta ku ikashpaotte korachi,

² nei no echi iki yan. Kuani ku ek ita eungeraitep iteki umomare kuni ne, echi utara pishno aeyaiepirikare an nei no mawari atpake an toho ta eumashnu yan.

³ Orowa, ku ek ita, kambi ani echi numge utara, nei utara Yerusarem kotan orun echi sange eungeraitep koro wa paye kuni ku payere kusu ne:

⁴ orowa, kuani ne yakka oman kuni oupak ne chiki, en tura no paye kusu ne na.

⁵ Koroka, Makedonia moshiri akush okere chiki echi orota ku ek kushki;

⁶ Makedonia moshiri ku kush kusu ne gusu ne na: koroka, echi tura no ku reushi hene, mata riya hene poka ku ki ya aerampeutek a yakka ku oman ushike echi en omande kuni gusu nep ruwe ne.

⁷ Inambe gusu ne yakun, ouse payekai rapoke patek echi nukara ash rusui shomoki, koroka, Utarapa ramuoshma chiki, irukai echi tura no an kuni ku chipachipa ruwe ne.

⁸ Koroka, Pentekoste pakno Epesos kotan ta ku riya kusu ne;

⁹ inambe gusu ne yakun, en gusu poro newa iki kuni eashkai apa asarare wa an, samata, epokba utara inne ruwe ne gusu ne na.

¹⁰ Temoteos ek chiki, shinuma ishitoma shomoki no an kuni kara yan; inambe gusu ne yakun, kuani poka iki korachi, shinuma ne yakka Utarapa moni iki ruwe ne:

¹¹ tambe gusu inan guru ne yakka shomo shinuma epange yak pirika. Koroka, shinuma en orun ek eashkai kuni ne, itomo an no payekaire wa en kore yan: iriwak utara tura shinuma an kuni ku chipachipa ruwe ne gusu ne na.

¹² Koroka, iriwak ne Aporros gusu anak, utara tura no echi orun shinuma ek kuni shiarikiki no ku onishnishi nisa ruwe ne: a koroka, tane ek kuni ambe anak ne aeaikapbe ne; yakka, eashkai ita ek kusu ne na.

¹³ Shiruwande yan, eishokor-i atte wa nishuwamne no roshki yan, okkaiyo ramkoro yan, yaitumashnure yan.

¹⁴ Nep ne yakka echi ikichi ambe anak ne omap ki gusu ikichi yan.

¹⁵ Iriwak utara, (Stepanas chisei un utara anak ne Akaya moshiri un aro-ibehe ne, orosama, nei utara anak ne ashkanne utara gusu yaishieiwangere kuni gusu yaiatte nisa ruwe ne sekorʼambe echi eraman,)

¹⁶ nei no okai utara otta hene, tap ikip gusu iki wa monraige pishno an guru otta hene echi itaknu kuni kuani echi onishnishi ash ruwe ne.

¹⁷ Orowa, Stepanas newa Portunatos newa Akaikos hene araki an gusu ku yaikopuntek ruwe ne: inambe gusu echi utara gusu an eikohayep anak ne nei utara sange nisa ruwe ne na.

¹⁸ Inambe gusu ne yakun, nei utara anak ne ku ramat ne yakka echi kon ramat ne yakka sambe shiturire nisa: tambe gusu nei no okai utara orun ramuoshma yan.

¹⁹ Asia un karisia utara echi ekap na. Akiras newa Priska anak ne koro chisei ta an karisia tura poron no echi ekap na.

²⁰ Obitta no okai iriwak utara echi ekap. Ashkanne chopsekara ambe ani utashpa uwekap yan.

²¹ Kuani ne Pauros anak ne yaikota koro teke ani echi ekap na.

²² Utarapa shomo ko-omap guru an chiki, aiyoitakushi an na.

²³ Utarapa ek. Utarapa ne Yesu Kiristo korʼirenga echi tura no an kuni ku koramkoro.

²⁴ Kiristo Yesu oshiketa echi utara obitta orun ku omap-i an na. Amen.