I Korintos 15 - Ashiri Aeuitaknup Iyohaichish Yona 1897

15 Ik.

¹ Orowa, iriwak utara, echi otta eupaskuma ki a pirika shongo echi eramande ash na, nei ambe echi koro;

² otta echi roshki, gusu ka echi kashiaobiuki ruwe ne, nekon a itak ani echi otta nei ambe eupaskuma ku ki-hi ani, raka isam no echi eishokoro shomoki no nei ap echi shikkashima chiki echi nure ash na.

³ Echi utara otta iyotta hoshiki no ku sangep anak, Kamui kambi-sosh kata chieshinnuye wa an korachi, Kiristo anak ne chikoro katpak gusu rai wa iyurui orota aomare;

⁴ orowa shui, Kamui kambi-sosh kata anuye wa an korachi rereko an ita hetopo-a-shiknure;

⁵ awa, Kepas otta yainukara; okaketa, nei tu niu ikashima wa niu otta hemhem;

⁶ orowa, ashikne ik ikashima an iriwak utara arashuianda yainukara, nei utara poro sereke tane pakno okai, koroka, nei utara tumugeta okai sereke mokonnoye ruwe ne;

⁷ nei okaketa Yakob otta yainukara; okaketa, obitta no okai Apostoro otta yainukara;

⁸ orowa, iyotta okaketa, epa kuni an ita hetuku an korachi en otta ne yakka yainukara nisa ruwe ne.

⁹ Inambe gusu ne yakun, kuani anak ne Apostoro un utara iyotta ponbe ne. Apostoro ani a en ye kuni ka eikohaye guru ku ne ruwe ne, Kamui koro karisia epokba nisa ruwe ne gusu ne na.

¹⁰ Koroka, Kamui irenga gusu kuani ku an korachi okaibe ku ne ruwe ne; orowa, a en koropare Shinuma koro irenga anak ne seenne raka isam no a en koropare ruwe ne sekoro anukara; koroka, obitta no okai nei utara kasu no kuani naa poron no ku monraige nisa ruwe ne na: yakka, kuani shomo ne, koroka, a en koropare Kamui irenga iki ruwe ne.

¹¹ Tambe gusu, nei ambe kuani ne a yakka, nei utara ne a yakka, nei no upaskuma chiki, orowa, nei no echi eishokon nisa ruwe ne na.

¹² Aige, Kiristo anak ne rai orowa no hetopo-ashiknure okere ari an ambe aeupaskuma chiki, nekon a echi tumugeta an sereke utara anak ne rai orowa no hetopo-shiknu ambe isam ari itak ya?

¹³ Koroka, rai orowa no hetopo-shiknu ambe isam chiki Kiristo anak ne shomo hetopo-a-shiknure na:

¹⁴ orowa, Kiristo shomo hetopo-a-shiknure chiki, chi eupaskuma ambe anak ne raka isam, samata, aeishokor-i ne yakka raka isam ruwe ne.

¹⁵ Ruwe un, chi utara anak ne Kamui gusu shunge paweteshu utara ne kuni anukara ruwe ne; inambe gusu ne yakun, Kamui anak ne Kiristo hetopo-shiknure nisa ruwe ne sekorʼorushpe gusu Kamui koro paweteshu utara chi ne: aige, rai utara hetopo-a-shiknure shomoki chiki, Shinuma anak shomo Kiristo hetopo-shiknure nisa ruwe ne gusu ne na.

¹⁶ Inambe gusu ne yakun, rai utara shomo hetopo-a-shiknure chiki, Kiristo ne yakka shomo hetopo-a-shiknure ruwe ne:

¹⁷ orowa, Kiristo anak no shomo hetopo-a-shiknure yakun echi koro eishokor-i anak raka-sakbe ne; echi chikokatpak oshiketa tane poka echi okai ruwe ne na.

¹⁸ Orosama, Kiristo oshiketa mokoro utara aisamka okere ruwe ne.

¹⁹ Aige, tane an ishu-i rapoke patek Kiristo gusu chipachipa chiki, obitta no okai moshima utara kasu no shi no eyaisambepokash utara chi ne ruwe ne na.

²⁰ Koroka, tane Kiristo anak ne rai orowa no hetopo-a-shiknure, mokoro wa okai utara koro atpake an aro-ibehe ne ruwe ne.

²¹ Ainu gusu rai ambe an korachi, ainu gusu rai guru hetopo-a-shiknure ambe ne yakka an ruwe ne.

²² Adam gusu utara obitta rai korachi, Kiristo gusu utara obitta ashiknure kusu ne gusu ne na.

²³ Koroka, utara ebitta nei ikiri an korachi ne: hoshiki no Kiristo; orowa no, Shinuma ek ita,

²⁴ Kiristo koro utara ne ruwe ne. Orowa no shiokere-i an, nei ita Shinuma Michi ne Kamui otta moshiri koropare kusu ne, nei ita Shinuma obitta no okai esapane-i hene obitta no okai mondum hene kiroro hene isamka kusu ne a an na.

²⁵ Orowa, Shinuma epokba obitta no okai utara ani koro chikiri choropoketa aande pakno esapane kusu ne gusu ne na.

²⁶ Iyotta okaketa aisamka kuni epokbap anak ne rai-ambe ne ruwe ne.

²⁷ Inambe gusu ne yakun, obitta no okaibe itaknure wa koro chikiri choropoketa ande kusu ne gusu ne na. Koroka, obitta no okaibe itaknure ari an itak ani ye chiki, Shinuma orowa no obitta no okaibe itaknurere guru anak ne umoshma no a an ruwe ne sekorʼambe aeramu ambe ne ruwe tapan na.

²⁸ Orowa, obitta no okaibe Shinuma orowa no aitaknure chiki, nei ita Poho anak obitta no okaibe itaknurere guru otta yaikota yai-itakanure kusu ne, Kamui anak ne obitta no okaibe otta esapanep ne kuni gusu ne na.

²⁹ Shomo ne chiki, rai-guru gusu baptisma akore utara anak ne nekon a ki kusu ne ya? Rai-guru hetopo-a-shiknure shomoki yakun, hemanda nei utara gusu baptisma akore ruwe he an?

³⁰ Nep gusu ramma ayaikikipi otta chi utara ne yakka okai ya?

³¹ Iriwak utara, Chikoro Utarapa ne Yesu Kiristo otta echi utara rengap ani ku yaikopuntek gusu, kesto ku rai ruwe ne,

³² ani an ambe ani ku ye ruwe ne. Ainu korachi Epesos kotan ta chikoikip tura ku koiki yakka, nep a en epirikarep an a? Rai-guru hetopo-ashiknure shomoki chiki, hetak, nishatta rai ash kusu ne gusu ibe hemhem ki iku hemhem ki yanro.

³³ Iteki aeyaikokandama yan; wen utara tura ukookai ambe anak ne pirika buri wendep ne ruwe ne.

³⁴ Oupeka an no mosh wa iteki katpak ki: an utara anak ne Kamui eramushkare ruwe ne gusu ne na: echi utara ayainikoroshmare kuni gusu tambe ku ye ruwe ne.

³⁵ Koroka, rai-guru hembara hetopo-a-shiknure ya? Orowa, nekon a netobake koro wa araki ya? ani ye guru an nangoro.

³⁶ Ramusak guru, aokai yaikota e etoitap anak ne rai shomoki chiki ashiknure shomoki ruwe ne.

³⁷ Orowa, e etoitap anak ne okaketa an kusu ne a netobake shomo ne, ouse atusa piyehe num ne, mungi hene moshima okaibe hene ne ruwe ne; koroka,

³⁸ Kamui rengaine nei ambe otta netobake kore, pishno an piye num otta kon netobake koropare ruwe tapan na.

³⁹ Obitta ne okai kam anak ne ukorachi an kam shomo ne; koroka, ainu kam an, moshima chikoikip kam ka an, chiri kam ka an, chep korobe ne yakka an ruwe ne.

⁴⁰ Kando un netobake ka okai, toi kata an netobake okai; koroka, kando umbe koro nupeki anak ne shinep ne, toi kata an okaibe koro nupeki moshimap ne ruwe ne.

⁴¹ Tokap chup nupeki an, moshima okai kunne chup nupeki an, shui, nochiu nupeki an ruwe ne; nupeki gusu nochiu anak ne uweshinnai ruwe ne.

⁴² Rai-guru hetopo-a-shiknure-i ne yakka nei no an ruwe ne.

⁴³ Munin kunip ne wa aetoita; shomo munin kunip hetopo-a-shiknure: akoatcha an no aetoita; nupeki an no hetopo-a-shiknure:

⁴⁴ katchak an no aetoita; kiroro an no hetopo-a-shiknure: rengaine an nepkoro netobake ne aetoita; ramat umbe ne hetopo-ashiknure. Rengaine an nepkoro netobake an chiki, ramat un netobake ne yakka an ruwe ne.

⁴⁵ Ene anuye wa an korachi :— Hoshike no an Ainu ne Adam anak ne shiknu ramat ne. Iyoshi no an Adam anak shiknure ramat ne ruwe ne.

⁴⁶ Koroka, Ramat umbe anak ne hoshiki no an ap shomo ne; nei rengaine an nepkoro an ap hoshiki no an ambe ne ruwe ne; orowa no,

⁴⁷ Ramat umbe an ruwe ne. Hoshiki no an ainu anak ne toi orowa no an wa toi-ushbe ne; tutanu an ainu kando orowa no an ambe ne.

⁴⁸ Toi-ushbe an korachi, moshima okai toi-ushbe ne yakka ene ani ne; orowa, nei kando umbe an korachi, moshima okai kando umbe shem korachi ne.

⁴⁹ Orowa, toi-ush guru koro nokaha chi koro wa sei korachi, kando un guru koro nokaha ne yakka a sei kusu ne na.

⁵⁰ Iriwak utara, tambe ku ye :— Kam newa kem anak ne Kamui moshiri eikeshkoro eaikap ruwe ne; samata, munin kunip anak ne shomo muninbe eikeshkoro shomoki ruwe ne.

⁵¹ Ingara yan, mukke an ap echi nure ash na :— Obitta no okai chi utara anak ne mokoro shomoki kusu ne, koroka, ekushkonna, shine shik inraprapu otta, okaketa rappa hau aashte ita anak ne, chi utara aitasare no akara kusu ne;

⁵² inambe gusu ne yakun, nei rappa humi aashte wa rai utara anak iteki munin kuni-hi otta hetopo-a-shiknure,

⁵³ orowa, chi utara aitasare kusu ne gusu ne na. Tan munin kuni an ambe anak ne shomo munin kunip utomchiure, tan rai kuni ambe anak shomo rai-ambe kunip utomchiure etokush ruwe ne gusu ne na.

⁵⁴ Koroka, tan munin kuni okaibe anak ne shomo muninbe ani mire, orowa tan rai kuni ambe shomo rai-ambe utomchiure chiki, nei ita :— Rai-i aannokara wa aisamka sekorʼan itak auweomare kusu ne gusu ne a ambe ne ruwe ne.

⁵⁵ Aa rai-ambe, E koro annokara kuni mondum neita an ruwe?

⁵⁶ Aa rai-ambe, e koro ai nei ita an ruwe he an? Rai-ambe koro ai anak ne katpak ne;

⁵⁷ katpak koro kiroro anak tuitak ne: koroka, chikoro Utarapa ne Yesu Kiristo gusu un annokare Kamui otta koyaiiraige na.

⁵⁸ Tambe gusu, ku omap an iriwak ne utara, kiroro atte wa moimoyege shomoki no okai yan, ramma Utarapa gusu ki kuni ikip kara yan; Utarapa gusu ki kuni ikip shomo raka-sakbe ne sekoro ku eraman ruwe ne gusu ne na.