I Korintos 14 - Ashiri Aeuitaknup Iyohaichish Yona 1897

14 Ik.

¹ Omap ambe keseamba yan; yakka, makangane uweingara ki eashkai kuni ne ramuosshi wano ramat unbe kon rusui no okai yan.

² Inambe gusu ne yakun, oya un itak ani ye gurʼanak ne ainu utara otta itak shomoki, koroka, Kamui otta itak ruwe ne, ainu anak ne itak inu shomoki ruwe ne, koroka, ramat ani mukkep ye ruwe ne.

³ Uweingara ki guru anak ne aroshikire gusu hemhem, aomaoma gusu hemhem, onishnishi gusu hemhem ki ruwe ne.

⁴ Oya un itak ani ye gurʼanak ne yairoshkire ruwe ne, koroka, uweingara ki guru anak ne karisia roshkire ruwe ne.

⁵ Echi utara obitta oya un itak ani ye yak pirika, koroka, makangane echi uweingara kuni ku kon rusui ruwe ne: aine, karisia aroshikire kuni ne itak itasare shomoki yakun uweingara ki guru anak ne oya un itak ani ye guru kasu no pirika ruwe ne.

⁶ Koroka, tane iriwak utara, ku ek ita oya un itak ani ye, aige, anukarape gusu hene, eramushbe gusu hene, uweingarape gusu hene, epakashnu ambe gusu hene ku iki shomoki yakun hemanda echi epirikare ash kusu ne ya?

⁷ Inotu sak no an okaibe poka, fuyetop yakka, koto yakka, humi aashte ita, uweshinnai no rek shomoki chiki, hemanda ani aashte hawe arekte hawe araman an a?

⁸ Inambe gusu ne yakun, nei rappa anak ne utomutne hawe asange yakun, tumi gusu yaishipini guru nen ne ruwe he an?

⁹ Tambe nei no echi utara poka, aeramu kuni isaika an itak ani itak ye shomoki chiki, aye orushpe hunna eraman kusu ne ya? kiyannakun, rera otta aye-hi nep koro an na.

¹⁰ Moshiri otta inne no okai uweshinnai no an hawe an, aige, ikkewe sak no an hawe isam nangoro.

¹¹ Tambe gusu itak hawe ikkeu ku erampeutek chiki; itak sange guru gusu oya kotan un guru korachi ku nu, orowa, itak sange guru ne yakka en gusu oya kotan un guru korachi ne nangoro.

¹² Tambe nei no echi utara ne yakka ramat unbe gusu seisek keutum koro wa gusu, echi iki hine karisia ashte kuni ne hunara yan.

¹³ Tambe gusu, oya un itak ani ye guru anak ne nei itak itasare kuni ne inonno itak akirero.

¹⁴ Inambe gusu ne yakun, oya un itak ani ku inonno itak chiki, ku ramat inonno-itak ruwe ne, a koroka, ku eraman mondum anak ibehe sak ruwe ne na.

¹⁵ Yakun, nekon ne ya? Kuani anak ne ramat ani ne yakka, eraman mondum ne yakka, inonno-itak ku ki kusu ne; ramat ani ne yakka, eraman mondum ani ne yakka, shinotcha ku ki kusu ne na.

¹⁶ Ramat ani e nunuke chiki, eram-sak nepkoro an guru e ye itak ikkeu erampeutek gusu, nekon a iki wa e koyaiiraige ita shinuma anak ne Amen ari itak ya?

¹⁷ Eani anak ne pirika no yaiiraige ki a koroka, moshima an guru anak ne aashte shomoki ruwe ne.

¹⁸ Echi utara obitta kasu no inne no okai oya un itak ani ku itak gusu Kamui ku koyaiiraige ash na:

¹⁹ yakka, karisia tumta nei chiki Oya un itak ani shine ichi man itak ani aye-hi kasu no, ani moshima utaia epakashnu gusu ashikne aeraman no an itak ani ku ye kuni ku konoburu ruwe ne.

²⁰ Iriwak utara, keutum gusu iteki pon utara ramkoro yan: yakka wenbe gusu aiai korachi okai, koroka,

²¹ keutum gusu rupne utara nei no okai yan. Tuitak kata ene chieshinnuye wa an na :— Oya un itak koro utara ani, Oya un utara koro papush ani, kuani tan uirup otta ku itak kusu ne; aige, nei no iki yakka i en nu shomoki kusu ne, sekoro Utarapa ye ruwe ne.

²² Tambe gusu, Oya un itak ani aye-hi anak ne shirosh-i ne ruwe ne, eishokoro okere utara gusu shomo ne, koroka, eishokoro shomoki utara gusu an ap ne.

²³ Tambe gusu karisia un utara obitta uwekarapa wa okai ita, aige, obitta oya un itak ani ye yakun, aine, eram-sak guru hene eishokoro shomoki guru hene ahup chiki, echi utara chiitasare ruwe ne, ari nei utara ye shomoki ruwe he an?

²⁴ Koroka, utara obitta uweingara chiki, aine, eishokoro shomoki guru hene, eram-sak guru hene, ahun yakun, shinuma obitta no okai utara gusu akokatpakte, obitta no okai utara gusu akoipishi ruwe ne;

²⁵ keutum ta aeshinap anak ne asarare an; aige, nei guru nanu shirikamu wa Kamui koongami hine nei Kamui echi tumugeta an kunak ye kusu ne na.

²⁶ Yakun, nekon a iriwak utara? Echi utara uwekarapa ita pishno pishno iyohaiochish an, epakashi an, aeramandep an, oya itak an, itak itasare ambe an. Nep ne yakka utara ashte gusu aki kuni kara yan.

²⁷ Nenka oya itak ani ye guru an chiki, tun hene, iyotta inne ne yakun, ren hene uwokari no kire yan:

²⁸ samata, Shinen itak itasarare yan: koroka, itak itasare guru isam chiki, nei karisia tumta shinuma mo no an kuni ki yan; samata, yaiotta hene Kamui otta hene itakte yan.

²⁹ Orowa, uweingara utara tun ren range itakte, aige, moshima okai utara nei itak uwandere yan.

³⁰ Koroka nei samaketa a guru otta aeramandep an chiki, hoshiki no an guru mo no an yak pirika.

³¹ Inambe gusu ne yakun, echi utara obitta shinen shinen ne uweingara ki eashkai, aige, obitta no okai utara aepashnu wa aonishnishi kuni gusu ne na,

³² orowa, uweingara kuni gusu an ramat anak ne uweingara utara aitaknure ruwe ne;

³³ inambe gusu ne yakun, Kamui anak ne achatchari ambe koro Kamui shomo ne, itomo koro Kamui ne, ashkanne utara ne obitta no okai karisia otta an korachi nep ne ruwe ne.

³⁴ Karisia onnaigeta shiwentep anak ne mo no an yak pirika: nei utara ye kuni shomo aeramuoshma, koroka, tuitak ta aye-hi korachi, nei utara aitaknurere yan ari an ambe an ruwe ne gusu ne na.

³⁵ Orowa, nei utara nepka nu rusui chiki, koro uni ta koro hoku otta uwepekennu yak pirika: inambe gusu ne yakun, karisia oshiketa shiwentep ye-hi anak ne yainikoroshma ambe ne ruwe ne gusu ne na.

³⁶ Hemanda? Kamui itak anak ne echi utara orowa no san ambe ne ruwe he an? Shui, echi utara orun patek nei ambe ek nisa ruwe he an?

³⁷ Koroka, nenka uweingara guru hene ne, ramat un guru hene ne kuni yaiyainu guru an chiki, echi orun ku nuye okaibe anak Utarapa ikashpaotte ne sekoro eraman no an yak pirika.

³⁸ Koroka, nenka erampeutek guru an chiki erampeutek no an yan.

³⁹ Tambe gusu, ku iriwak utara, uweingara kuni ambe shiarikiki no hunara yan, aige, oya un itak ani ye ambe iteki hattoki.

⁴⁰ Koroka, nep ne yakka irammakaka ikiri an no aki kuni iki yan.