I Korintos 10 - Ashiri Aeuitaknup Iyohaichish Yona 1897

10 Ik.

¹ Iriwak utara, chikoro shinrit utara anak ne obitta nishkuru choropoketa okai, obitta atui tumu kush wa paye; atui otta ne yakka nishkuru otta ne yakka obitta Mose orun baptisma akore;

² obitta une no an ramat oma aep ibe;

³ obitta une no an ramat oma iku ambe iku sekorʼambe echi erampeutek kuni ku kopan:

⁴ nei utara anak koro oshi paye ramat oma Watara otta iku nisa ruwe ne gusu ne na, nei Watara anak Kiristo ne ruwe ne.

⁵ Yakka, nei utara poro sereke Kamui aenupetne shomoki; awa, nup otta aisamka nisa ruwe ne.

⁶ Tap okaibe anak ne nei utara iki nei no chi utara iteki wenbe iki rusui kuni ne un gusu hetuku kochihi ne ruwe ne.

⁷ Utara anak ne ibe gusu hene iku gusu hene rok, orowa shinot gusu hopumba nisa ruwe ne, sekoro chieshinnuye wa an korachi, iteki potoki kon no okai yan.

⁸ Shui, nei utara tumugeta okai utara hoiyo iki wa shine to ta ni man nin ne utara ikashima san sen nin ne utara ekot: nei utara iki korachi iteki hoiyo ki yanro.

⁹ Shui, Utarapa koramnukara wa gusu okokko ani aronnu utara nei no, iteki Utarapa koramnukara yanro.

¹⁰ Orowa shui, oromam wa isamka kunip ani aisamka utara nei no iteki echi oromam yan.

¹¹ Tap okaibe nei utara otta hetukup anak ne kochihi nei no an ambe ne: orowa, otta moshiri okese-hi an chi utara gusu, un epakashnu kuni gusu chieshinnuye wa okai ruwe ne.

¹² Tambe gusu, ash korʼan sekoro yainu guru, iteki hachiri kuni ne yaitubare yan.

¹³ Ainu sei eaikap ikoramnukara-hi echi utara gusu isama; koroka, Kamui anak ne sonep ne, echi yaishiporore eashkai kasu no echi utara akoramnukara kuni ramuoshma shomoki kusu ne: koroka, echi yaishiporore eashkai kuni ne nei koramnukara-hi tura ohaitare kuni ushi kan ruwe ne gusu ne na.

¹⁴ Tambe gusu, ku omap utara potoki emaka yan.

¹⁵ Wayashnu utara otta korachi ku ye ruwe ne; ku ye itak esanniyo yan.

¹⁶ Chi nunuke ash shinnunuke an itangi anak ne Kiristo koro kemihi gusu an ukotura ikichi ambe shomo ne ruwe he an? Chi meshpa ash pantak anak ne Kiristo kon netobake gusu an ukotura ikichi ambe shomo ne ruwe he an?

¹⁷ Chi utara inne a yakka, shine pantak ne, shine netobake ne ruwe ne: inambe gusu ne yakun, chi utara obitta shine pantak eimek wa ibe ruwe ne gusu ne na.

¹⁸ Kam gusu an Israeru un utara ingarʼan: ayangep ibe utara anak ne yange-set tura ikichi utara shomo ne ruwe he an?

¹⁹ Yakun, nekon a ku ye ya? Potoki otta ayangep anak ne nep ka ne aramu? Samata, potoki anak ne nep ka ne aramu ya?

²⁰ Koroka, Oya uirup yange yangep gusu ne chiki, Kamui otta ayange ambe shomo ne, nitne kamui otta ayangep ne: aige, echi utara anak ne nitne kamui tura ukokicbi ambe ku kopan ruwe ne.

²¹ Utarapa koro itangi newa nitnep koro itangi tup ne kane echi iku eaikap: Utarapa koro set unbe newa nitnep koro set unbe tup ne kane echi ibe eaikap ruwe ne.

²² Shui, Utarapa eyaitunnapte chi ki mwe he an? Shinuma kasu no chi utara anak ne okirashnu ruwe he an?

²³ Nep ne yakka an okaibe ikashpaotte kopakeat a yakka, obitta no okaibe auina gusu pirika shomo ne. Nep ne yakka an okaibe ikashpaotte kopakeat a koroka, obitta utara roshkire shomo ki ruwe ne.

²⁴ Inan guru ne yakka yaiepirikare gusu iteki esanniyo yan,

²⁵ koroka, aota an guru esanniyo yan. Nep ne yakka kam eiyok ushita eiyokbe ibe yan, aine, koro keutum gusu iteki nei ambe gusu uwepekennu;

²⁶ inambe gusu ne yakun, toitoi newa otta okai aeshikbe obitta Utarapa korope ne.

²⁷ Eishokoro shomoki no an guru anak ne ibe gusu echi eahunge, aige, echi oman chiki, nep ne yakka echi kotchaketa aandep ibe yan,

²⁸ orowa, keutum gusu iteki uwepekennu yan. Koroka, tambe anak ne ayange okerep ne, ari nenka e otta ye chiki, nei ambe e nure guru gusu hemhem, keutum gusu hemhem iteki nei ambe ibe yan:

²⁹ keutura gusu ku ye, awa, e korobe gusu shomo ne, koroka, nei guru gusu ne; inambe gusu ne yakun, Hemanda gusu moshima guru koro keutum ani ku ahonnere an ambe akoipishi ruwe he an?

³⁰ Kuani anak ne irenga ku goro gusu ibe chiki, gusu ku yaiiraige ki ambe ankushtapne hemanda gusu a en ohaigekara an ruwe he an?

³¹ Tambe gusu echi ibe hene ki iku hene ki nep ne yakka echi ki a yakka, obitta no Kamui

³² nupeki gusu ikichi yan. Yudea un utara gusu ne yakka Herenes un utara gusu ne yakka Kamui koro karisia gusu ne yakka iteki ureepetchiure ambe ande yan:

³³ Kuani anak ne nep ne yakka gusu obitta no okai utara nupetnere korachi nep, aine, utara kashiaobiuki gusu inne no okai utara epirikare kuni esanniyo wa yaikota eyaiepirikare ambe shomo yainu korachi ne ruwe ne na.