I Korintos 1 - Ashiri Aeuitaknup Iyohaichish Yona 1897

1 Ik.

¹ Kamui irenga ankushkerai Yesu Kiristo koro Apostoro ne kuni gusu anishuk Pauros newa akoro iriwak ne Sostenes anak ne Korintos machiya ta an Kamui karisia orun,

² Kiristo Yesu otta aashkannere, ashkanne utara ne kuni gusu anishuk, inan ita ne yakka nei utara newa chikoro Utarapa ne Yesu Kiristo konishuk utara orun:

³ echi utara orun chikoro Michi ne Kamui newa Utarapa ne Yesu Kiristo orowa no irenga newa itomo an na.

⁴ Ramma kane echi utara gusu, Kiristo Yesu oshiketa echi otta akoropare Kamui irenga gusu, ku goro Kamui otta koyaiiraige ash na;

⁵ tambe nep ne yakka otta Shinuma gusu echi aoteknure; nep itak otta ne yakka, nep eraman-i otta ne yakka ne:

⁶ echi utara oshiketa Kiristo gusu an paweteshu ambe anak ne atumashnure wa an korachi ne:

⁷ tambe gusu, nep eikrap gusu ne yakka shomo echi ehaita ruwe ne; chikoro Utarapa ne Yesu Kiristo anukara kuni ambe echi untere wa okai ruwe ne;

⁸ echi utara anak ne chikoro Utarapa ne Yesu Kiristo toho ta wen-buri sak no ka okai kuni ne Shinuma anak okese pakno echi tumashnure kusu ne na.

⁹ Kamui anak ne ikipniukeshbe ne, Shinuma ankushkerai koro Poho chikoro Utarapa ne Yesu Kiristo tura no iki kuni a un hotuyekara an na.

¹⁰ Iriwak utara, echi utara obitta shine itak sange, aige, echi tumugeta utumkush keutum isam kuni ne, chikoro Utarapa ne Yesu Kiristo kon reihei ankushkeraipo echi onishnishi ash ruwe ne; koroka, echi utara shine keutum koro, aige, shine esanniyop ki hine ukoiram no aeramushinnere gusu aki na.

¹¹ Inambe gusu ne yakun, ku iriwak utara, echi tumugeta upaore an sekoro Kroe chisei un utara orowa no echi utara gusu a en eramande an na.

¹² Tan ikkewehe an na, pishno pishno echi ye hawe ene ani :— Kuani anak ne Pauros otta an; kuani anak Aporros otta an; Kuani anak ne Kepas otta an; kuani anak ne Kiristo otta an, ari an itak ani echi ye ruwe ne.

¹³ Kiristo anak ne auwekopire an ruwe he an? Echi utara gusu Pauros anak ne utasa chikuni otta akungi kokikkik nisa ruwe he an? Shui, Pauros kon reihei otta baptisma echi kore an a?

¹⁴ Krispos newa Gaios moshima echi tumuge ta okai utara baptisma echi kore ash shomoki gusu Kamui ku koyaiiraige ruwe ne;

¹⁵ ikineipeka ku kon reihei otta baptisma a en kore na sekoro ika echi ye kuni gusu ne na.

¹⁶ Shui, Stepanos uni un utara otta baptisma ku kore nisa: nei utara moshima otta baptisma ku kore guru an ya ku eramushkare.

¹⁷ Inambe gusu ne yakun, baptisma kore kuni ne Kiristo anak ne en omande shomoki; koroka, Pirika shongo eupaskuma kuni gusu en omande nisa ruwe ne: itak wayashnu ambe ani shomo ne, ikineipeka Kiristo koro utasap ika arakasakte kuni gusu ne na.

¹⁸ Inambe gusu ne yakun, utasap gusu an itak anak ne aisamka korʼan utara gusu haita ambe ne; koroka, kashiaobiuki korʼan chi utara gusu anak Kamui koro kiroro ne ruwe ne.

¹⁹ Inambe gusu ne yakun, ene chieshinnuye wa an na. Kuani anak ne wayashnu utara koro wayashnu ambe ku isamka kusu ne, Orowa, eramush utara koro eramushbe ku emaka kusu ne na.

²⁰ Wayashnu guru neita an a? kambi-nuye guru neita an a? Tan ainu ikiri ta upahunara guru neita an a? Kamui anak ne moshiri gusu an wayashnu ambe ani aeramu-isambe ne kara shomoki nisa ruwe he an?

²¹ Inambe gusu ne yakun, Kamui koro wayashnu-hi ankushtapne moshiri anak ne yaikota koro wayashnu ambe ani Kamui eamkiri shomoki nisa ruwe ne gusu, Kamui anak ne upaskuma aeramusakbe ani eishokoro utara kashiobiuki kuni pirika irenga sange nisa ruwe ne.

²² Inambe gusu ne yakun, Yudea un utara anak ne shirosh hunara, orowa, Herenes un utara wayashnu ambe hunara ruwe ne gusu ne na:

²³ koroka, chi utara anak ne utasa chikuni otta akungi-kokikkik Kiristo eupaskuma ash, tambe anak Yudea un utara gusu aureepetchiurep ne, orowa, Oya utara gusu aeramusambe ne ruwe ne;

²⁴ koroka, anishuk wa okai utara gusu, Yudea un utara ne yakka Herenes un utara ne yakka, Kiristo anak ne Kamui koro kiroro ne, Kamui wayashnu ambe ne ruwe ne.

²⁵ Inambe gusu ne yakun, Kamui koro ramusakbe anak ne utara kasu no wayashnu ambe ne; orowa, Kamui okirasapbe anak ne utara kasu no okirashnu ambe ne ruwe ne gusu ne na.

²⁶ Inambe gusu ne yakun, iriwak utara, otta echi aenishuk ambe ingarʼan, kam gusu wayashnu utara inne no shomo ne, inne no okai mondum koro utara shomo ne,

²⁷ inne no okai nupuru utara shomo ne ruwe ne: koroka, wayashnu utara yainikoroshmare kuni gusu Kamui anak ne moshiri ta okai ramuisambe numge nisa; orowa, kiroroashnu okaibe yainikoroshmare kuni ne Kamui anak ne kirorosakbe numge nisa ruwe ne na;

²⁸ orowa, an okaibe isamka kuni ne Kamui, tan moshirʼun nupanbe newa aepange okaibe, — nei isam okaibe numge nisa ruwe ne:

²⁹ tambe anak nep kam ne yakka iteki Kamui tek-samata yaiomonnure kuni gusu an ap ne ruwe ne.

³⁰ Koroka, Shinuma ankushtapne echi utara anak ne Yesu Kiristo oshiketa okai hine un gusu Kamui orowa no wayashnu ambe, oupeka ambe,

³¹ ashkanne ambe, kikiaraye ambe ne akara, chieshinnuye wa an korachi an ambe nep :— Yaiomonnure guru Utarapa otta yaiomonnurere yan.