Iyohaichish 84 - Ashiri Aeuitaknup Iyohaichish Yona 1897

84. Iyohaichish.

Shinotcha esapane guru gusu; Gittet gusu. Kora poho kara iyohaichish.

¹ AA topaha koro Ehoba, E koro kash anak ne nep eramasu humi!

² Ku ramat anak ne Ehoba koro kash gusu eyaikatekara, ruwe newa, ramurai ruwe ne; Ku sambe newa ku kam anak ne ishu Kamui gusu ehaukashu ruwe ne.

³ Ruwe un, amam-e-chikap anak ne yaikota gusu chisei pa, Kapap chikap ne yakka koro poho ande kuni yaikota gusu ushike pa nisa, Nei ambe anak ne Aa topaha koro Ehoba, En esapane Kamui, ku goro Kamui, E koro yange set ne ruwe ne.

⁴ E kot chisei ta oshiroma utara anak ne anunuke ne: Ramne to nei utara anak ne E koiramye na. [Sera.]

⁵ E oshiketa kiroro koro gurʼanak ne anunuke ne; Shinuma koro keutum ta nei para-ru an ruwe ne gusu ne na.

⁶ Nei utara Chish pinnai kush wa wakka purupuruge-i ne kara; Ruwe newa, aro-tunash apto anak ne nunuke ambe ani kamure ruwe ne.

⁷ Kiroro wano kiroro pakno nei utara paye, Pishno pishno Zion otta an Kamui kotchaketa araki ruwe ne.

⁸ Aa topaha koro Kamui ne Ehoba, ku ki inonno-itak nu wa en kore: Aa Yakob koro Kamui ikokanu wa en kore. [Sera.]

⁹ Aa chikoro kikhumbe ne Kamui, ingara yan, E koro kashi-aota guru koro nanuhu orun ingara.

¹⁰ Shine toho uturu E kot chisei ta an i anak ne wan hotne to kasu no pirika ruwe ne. Wen-buri an kash otta oshiroma kasu no Ku goro Kamui kot chisei apa pungine a-i ku konoburu ruwe ne.

¹¹ Inambe gusu ne yakun, Ehoba ne Kamui anak ne chup ne, kikhumbe ne ruwe ne: Ehoba anak ne irenga newa nupeki koropare kusu ne: Oupeka no apkash utara gusu nep pirikap ne yakka koropare kusu ne ruwe ne.

¹² Aa topaha koro Ehoba, E otta eyaikopashte gurʼanak ne anunuke ne ruwe ne.