Iyohaichish 55 - Ashiri Aeuitaknup Iyohaichish Yona 1897

55. Iyohaichish.

Shinotcha esapane guru gusu; ka oma arektep. Dabid kara Maskir.

¹ AA Kamui, ku ki inonno-itak nu wa en kore; Iteki ku koramkorobe otta yainuina wa en kore.

² En orun ikokanu bine ese wa en kore. Ku iunin wa gusu shini eaikap, orowa, ku nuwap;

³ En epokba guru koro hawe gusu, Wen utara en ramushitnere gusu ne na; Nei utara en kashiketa irarape omare, Irushka wa en keshke ruwe ne gusu ne na.

⁴ En onnaigeta ku keutum anak ne iunin, Rai-i gusu ku ishitoma ruwe ne.

⁵ Ku kimatek wa ku tusushke, Ishitoma ambe en kamure ruwe ne.

⁶ Orowa, kusuwep nei no tekkup ku gorohumi, sekoro ku ye nisa! Yakun, ku hopuni wa arapa hine, ku shini kusu ne na.

⁷ Tuima no an ushike orun ku arapa wa, Nup otta ku reushi kusu ne na. [Sera.]

⁸ Yupke rera newa itasayupkep gusu, Tunashino ayaishishire ushi orun ku arapa.

⁹ Aa Utarapa, nei utara isamka wa koro parumbe pereba wa en kore: Nei machiya otta niwen iki ambe newa sakayo ku nukan nisa ruwe ne gusu ne na,

¹⁰ Tokap-to ta hene kunne-to ta tane nei utara anak ne machiya tumama kata paye: Wen-buri newa irarape anak nei oshiketa okai ruwe ne.

¹¹ Wen-buri anak ne nei oshiketa an: Chinishteramukorep newa shungep anak ne koro machiya un ru wano shomo paye.

¹² En kosakayokara guru anak ne en epokba guru shomo ne; Nei no ne yakun yaishiporore eashkai: Shui, en epeka no yaiporore gurʼ anak ne en etunne guru shomo ne; Nei no ne yakun, shinuma otta ku yainuina kusu ne na.

¹³ Koroka, eani ne, en eirepak ainu ne, En tura no an guru, ku ikateomare nimaraha ne ruwe ne.

¹⁴ Ukoiram no chi utara ramuhauge ukoramkoro shiriki okai, Awa, inne utatʼ tura no Kamui kora kenru orun apkash nisa ruwe ne.

¹⁵ Ekushkonna rai ambe anak ne nei utara otta hetukure, Shiknu rapoketa Sheo orun arangere yan: Inambe gusu ne yakun, wenbe anak ne nei oshiroma-i ta an, nei onnaigeta an ruwe ne gusu ne na.

¹⁶ Koroka, kuani anak Kamui otta ku konishuk kusu ne: Aige, Ehoba anak ne en kashiobiuki kusu ne na:

¹⁷ Onuman hene, kunneiwano hene, tokap noshiketa hene, ku oroman wa nuwap ku ki kusu ne: Orowa, shinuma ku hawe nu kusu ne na.

¹⁸ Tumi ku goro ita anak ne, Shinuma itomo sange wa ku ramat kikiraye nisa ruwe ne; Inne utara en kopiuki nisa ruwe ne gusu ne na.

¹⁹ Kamui anak ne nu wa anrapokikara ki kusu ne, Shinuma fushko wano an ap ne, [Sera.] Nei utara chiitasare shomoki, Kamui ko-oripak shomoki ruwe ne.

²⁰ Nei guru anak ne itomo koro guru kopiuki gusu teke turi nisa; Aki uitaknup koatcha nisa ruwe ne na.

²¹ Koro paroho anak ne kiripu korachi teshnatara ruwe ne, Koroka, keutum ta tumi an: Koro itak anak ne shum kasu no hapuru ruwe ne, Yakka, aetaye an rangetam nepkoro ne ruwe ne na.

²² Ehoba kata e koro ashikerep omare, yakun, Shinuma echi koshiratki kusu ne: Oupeka utara ramma pakno shomo amoimoyegere kuni ne Shinuma ki kusu ne na.

²³ Koroka Aokai, Aa Kamui, nei utara aisamka kuni ne nei shui oro range kusu ne: Kemnure rusui newa shungep ki utara anak ne shiknu kuni toho nimara pakno shomo okai kusu ne; Koroka, kuani anak ne Aokai orun yaikopashte kusu ne na.