Iyohaichish 37 - Ashiri Aeuitaknup Iyohaichish Yona 1897

37. Iyohaichish.

Dabid karape.

¹ WENBE ikichi utara gusu iteki keutum yaiseisekka yan, Oheuge-buri ikichi utara gusu iteki ikoitupa yan.

² Inamhe gusu ne yakun, nei utara anak ne mun korachi chashnu no aotuyeba, Fukinani kina nei no shumumge kusu ne gusu ne na.

³ Ehoba eyaikopashte wa pirikap ki yan; Orowa, moshiri kata oshiroma wa sone ambe ibe kusu ne.

⁴ Shui Ehoba gusu yai yainuchattekka yan; Yakun, e keutum koramkorobe akore kusu ne na.

⁵ E apkash ru Ehoba shikkashimare yan; Shinuma gusu eyaikopashte, yakun, Shinuma nei ambe kara kusu ne.

⁶ Orowa, e koro oupeka-i pekere korachi Shinuma atte, E koro esanniyop tokap noshike korachi atte kusu ne na.

⁷ Ehoba gusu mo no okai, ramushiroma no Shinuma etere yan: Kon ru otta eyaiepirikare guru gusu, Wen aesanniyop hetukure guru gusu, iteki keutum yaiseisekka yan.

⁸ Iteki irushka, kinrakarape emaka yan: Iteki keutum yaiseisekka, nei ambe anak ne ouse wen-buri hetukurep ne ruwe ne.

⁹ Inambe gusu ne yakun, wenbe ikichi utara anak ne aotuyeba kusu ne: Koroka, Ehoba orun ingara utara anak ne, nei utara anak toitoi eikeshkoro kusu ne.

¹⁰ Naa pon no shiri an chiki wen utara isam kusu ne: Ruwe un, Aokai anak ne tomte no nei guru an i hunara, yakka, isam kusu ne na.

¹¹ Koroka, ramu-rotcha utara anak ne toitoi eikeshkoro kusu ne; Orowa, nuye an no an itomo gusu yainuchattek kusu ne.

¹² Wen utara anak ne oupeka utara gusu wenbe oshke wa, Koro nimaki ari shinuma orun nirewewe ruwe ne.

¹³ Utarapa anak ne shinuma emina kusu ne, Shinuma koro toho ek shiri an i nukan ruwe ne gusu ne na.

¹⁴ Otek-sak guru newa irapokkarai guru hachire, Ruhu otta oupeka utara ronnu kuni ne; Wen utara anak ne rangetam etaye, koro ku koreuba nisa ruwe ne:

¹⁵ Nei utara koro ibetam anak ne yaikota koro sambe otke, Koro ku akaye kusu ne na.

¹⁶ Inne wen utara koro nuye an no an okaibe kasu no Oupeka utara pon no patek koro ambe anak ne naa pirika ruwe ne.

¹⁷ Wen utara koro amunin akaye kusu ne: Koroka, Ehoba anak ne oupeka utara ashtere ruwe ne.

¹⁸ Ehoba anak ne aeramushinne okai utara koro toho eraman: Nei utara eikeshkorope ramma pakno an kusu ne.

¹⁹ Wenbe an ita anak ne nei utara shomo yainikoroshma kusu ne: Orowa, heman toho ta aeramushinne kusu ne na.

²⁰ Koroka, wen utara anak ne aisamka kusu ne, Orowa, Ehoba epokba utara anak ne areshpa chikoikip mimushbe ukorachi ne: Nei utara aisamka kusu ne; shupuya nepkoro isam kusu ne na.

²¹ Wen utara anak ne shose uk wa shomo hoshipire: Koroka, oupeka utara anak irenga sange wa kore ruwe ne.

²² Shinuma orowa no anunuke utara anak ne toitoi eikeshkoro kusu ne; Orowa, Shinuma iyoitakushi utara anak ne aushtekka kusu ne na.

²³ Ehoba anak ne ainu oman-i ashte; Orowa, nei guru anak ne Shinuma kon ruhu enupetne ruwe ne.

²⁴ Shinuma hachiri yakka shomo aemaka kusu ne: Ehoba anak ne koro teke punire ruwe ne gusu ne na.

²⁵ Upen guru ku ne, awa, tane ku on ne ruwe ne; Yakka, oupeka guru aemaka-hi hene, Shinuma koro santek aep shikaobiukiyara ambe hene, shomo ku nukan nisa.

²⁶ To ebitta shinuma irenga sange wa okaibe erusa; Orowa, shinuma koro santek anunuke ambe ne ruwe ne.

²⁷ Wenbe eshishi wa pirikap ki; Aige, ramma pakno oshiroma yan.

²⁸ Inambe gusu ne yakun, Ehoba anak ne aesanniyop omap wa, Koro ashkanne utara shomo emaka; Nei utara anak ne ramma pakno akoshiratki shiri okai: Koroka, wen utara koro santek anak ne aotuyeba kusu ne na.

²⁹ Oupeka utara anak ne toitoi eikeshkoro wa, Ramma pakno oshiroma kusu ne na.

³⁰ Oupeka utara koro paroho anak ne wayashnup ye, Koro parumbe anak ne aesanniyop itak ruwe ne.

³¹ Koro Kamui tuitak anak ne Shinuma koro keutum ta an; Koro chinika anak oshitteshu shomoki ruwe ne.

³² Wen utara anak ne oupeka utara shiruwande, Raige kuni gusu hunara ruwe ne.

³³ Nei guru koro teke ta Ehoba anak ne shinuma ande shomoki, Shui, akoipishi ita shomo akokatpakte kusu ne na.

³⁴ Ehoba gusu echipachipa wa kon ruhu shikkashima yan, Yakun, echi ariknare wa toitoi aeikeshkore kusu ne: Wen utara aotuyeba ita, aokai nei ambe nukara kusu ne na.

³⁵ Wen utara poro kiroro koro hine, Koro toi otta shukup wa tapkanni kara fu chikuni nei no shipiraspa-i ku nukan nisa ruwe ne.

³⁶ Koroka, akush wa paye, awa, ingarʼan, isama: Ruwe un, ku hunara yakka apa eaikap nisa ruwe ne na.

³⁷ Aeramushinne guru ingara, oupeka guru orun nukara yan: Nei guru okese-i anak ne itomo ne ruwe ne gusu ne na.

³⁸ Ohaitap ki utara anak, ukoiramno aisamka kusu ne: Wen utara okese-i anak ne aotuye kusu ne.

³⁹ Koroka, oupeka utara kashiobiuki ambe anak ne Ehoba otta an: Shinuma anak ne yairamhekomo ambe an ita nei utara koro kiroroashnu chashi ne ruwe ne.

⁴⁰ Orowa, Ehoba anak ne nei utara ikashiu wa kashiobiuki ruwe ne: Wen utara orowa no ohaitare wa kashiobiuki, Shinuma gusu nei utara eyaikopashte nisa ruwe ne gusu ne na.