Iyohaichish 24 - Ashiri Aeuitaknup Iyohaichish Yona 1897

24. Iyohaichish.

Dabid kara Iyohaichish.

¹ MOSHIRI newa moshiri aeshikbe kane Ehoba ne korobe; Ingi-moshiri newa otta oshiroma utara Shinuma korobe ne.

² Shinuma anak nei ambe atui kata asama ande, Poro pesambe kata nei ambe atte nisa ruwe ne.

³ Ehoba koro huru hemesu kusu ne guru nen ne ruwe? Shinuma koro ashkanne ushiketa ash kuni guru inan guru ne ruwe he an?

⁴ Turusak tekehe newa ashkanne sambe koro; Keutum ta ohap ramepakari shomoki, Shunge uitaknup shomo ki guru ne ruwe ne.

⁵ Nei guru anak ne Ehoba orowa no kashnukarape uk, Kashiobiuki Kamui wano oupekap akore kusu ne.

⁶ Shinuma hunara sanikiri utara anak ne ene ani ne, Yakob koro Kamui, E koro nanuhu hunara utara ene ani ne ruwe ne. [Sera.]

⁷ Aa apa-ushta ne echi utare, koro sapaha hetari yan; Otusashuishiri pakno an apa-ushta, ahetari wa okai yan; Orowa, nupeki koro Moshiri shikkashimap ahun kusu ne na.

⁸ Nupeki koro moshiri shikkashimap anak ne nen ne ruwe he an? Tumashnu wa kiroroashnu Ehoba ne, Tumi gusu kiroroashnu Ehoba ne ruwe ne.

⁹ Aa apa-ushta ne echi utare, koro sapaha hetari yan; Ruwe un, otusashuishiri pakno an apaha, nei ambe hetari yan; Orowa, nupeki koro Moshiri shikkashimap ahun kusu ne na.

¹⁰ Tap nupeki koro Moshiri shikkashimap anak ne nen ne ruwe he an? Inne tumi-koro utara koro Ehoba ne, Shinuma anak Moshiri shikkashima nupeki koro Kamui ne ruwe tap an na. [Sera.]