Iyohaichish 148 - Ashiri Aeuitaknup Iyohaichish Yona 1897

148. Iyohaichish.

¹ YAH ramye yan. Kando wano Ehoba ramye yan: Ri ushiketa Shinuma ramye yan.

² Koro hauturun utara, Shinuma ramye yan. Koro topaha utara, ramye yan.

³ Tokap chup newa kunne chup Shinuma ramye yan: Nupeki o nochiu Shinuma ramye yan.

⁴ Kando un kando, Shinuma ramye yan, Shui kando kashiketa an wakka ne yakka nei no ki yan.

⁵ Nei okaibe anak ne Ehoba reihei ramye kusu ne: Shinuma ikashpaotte wa nei okaibe akan nisa ruwe ne gusu ne na.

⁶ Otusashuishiri pakno Shinuma nei okaibe ashte: Shomo aohaita kuni ekambakbe sange nisa ruwe ne.

⁷ Toitoi wano Ehoba ramye yan: Rep un porobe ne yakka, ooho-i ne yakka Shinuma ramye yan.

⁸ Abe newa kaukau, upas newa paha; Itasayupkep ne yakka Shinuma itak uweomare ruwe ne:

⁹ Nupuri newa obitta no okai huru, Ibe o chikuni newa shungu:

¹⁰ Chikoikip newa obitta no okai shiknup; Reye wa arapap newa hopumba chikap:

¹¹ Moshiri shikkashima utara newa obitta no okai uirup; Esapane utara poho newa koipishi ki utara:

¹² Upen okkai upen matnep, Ekashi newa poho utara:

¹³ Ehoba reihei ramye yanro; Shinuma reihei patek apasere: Toitoi newa kando kashike Shinuma nupeki an ruwe ne gusu ne na.

¹⁴ Shinuma anak ne koro utara gusu kirawe hopunire, Obitta no okai koro ashkanne utara ki ramyep ne: Shinuma ehange no okai Israeru sanikiri utara sangep ne. Yah ramye yan.