Iyohaichish 147 - Ashiri Aeuitaknup Iyohaichish Yona 1897

147. Iyohaichish.

¹ YAH ramye yan. Chikoro Kamui orun iramye shinotcha iki ambe anak ne pirikap ne ruwe ne; Aekiroro ambe ne, iramye-i anak ne shisakbe ne ruwe ne.

² Ehoba anak ne Yerusarem ashte; Israeru aemakbap uwekarapare ruwe ne.

³ Sambe oknatara utara iwangere, Koro piri kokarakari ruwe ne.

⁴ Shinuma anak ne nochiu ipishki; Otta obitta reikore ruwe ne.

⁵ Chikoro Utarapa poro ne, koro kiroro tumashnu; Koro ramepakari mondum apakari eaikapbe ne ruwe ne.

⁶ Ehoba anak ne ramu-rotcha utara nitatpa: Wen utara shiri-kohachire ruwe ne.

⁷ Yaiiraige wa Ehoba orun shinotcha ki, Koto kashike chikoro Kamui koiramye yan:

⁸ Shinuma anak ne nishkuru ani kando kamure, Toitoi gusu apto etoko-oiki, Nupuri kata mun shipiraspare ruwe ne.

⁹ Chikoikip otta e kuni aep kore, Hawe ash pon kapachiri otta ne yakka aep koropare ruwe ne.

¹⁰ Umma kiroro gusu yainuchattek shomoki Ainu chikiri enupetne shomoki ruwe ne.

¹¹ Ehoba koishitoma Shinuma enupetne; Shinuma koro rampoken gusu chipachipa utara enupetne ruwe ne na.

¹² Aa Yerusarem, Ehoba ramye yan; Aa Zion, e koro Kamui reika yan.

¹³ Shinuma anak ne e koro apa sakma tumashnure nisa; E oshiketa okai e koro poho utara nunuke nisa ruwe ne.

¹⁴ E koro moshirita itomo irenga shipiraspare; Ibe-ush am am ani e shikte nisa ruwe ne.

¹⁵ Shinuma anak ne moshiri kata koro ikashpaotte sange; Shinuma korʼitak ara pikan no hoyupu ruwe ne.

¹⁶ Wata korachi upas sange; Uina korachi retatʼtaskoro chari.

¹⁷ Uibe nepkoro koro konru osura; Shinuma mean-i kotchaketa ash eashkai guru inan guru ne ya?

¹⁸ Koro itak sange wa nei ambe rure: Koro rera ashte, orowa, wakka san ruwe ne.

¹⁹ Yakob orun koro itak nukare, Israeru orun koro ekambakbe newa esanniyop nukare ruwe ne.

²⁰ Moshima okai moshiri uirup gusu nei no Shinuma ki shomoki nisa: Shinuma koro esanniyop gusu anak, nei utara erampeutek ruwe ne. Yah ramye yan.