Iyohaichish 138 - Ashiri Aeuitaknup Iyohaichish Yona 1897

138. Iyohaichish.

Dabid kara iyohaichish.

¹ RAMUOSSHI wano E koyaiiraige ash na: Kamui utara kotchaketa E orun iramyep ku shinotcha ki kusu ne.

² E koro Ashkanne kenru oropeka ku ongami, Orowa, E koro omap-an-ramuhauge irenga newa sonep gusu E kon reihei orun ku koyaiiraige ash kusu ne: E kon reihei kasu no E korʼitak E pasere nisa ruwe ne gusu ne na.

³ E konishuk toho ta Aokai en koese, Ku keutum E tumashnure wa en omaoma nisa ruwe ne.

⁴ Aa Ehoba, obitta no okai moshiri shikkashima utara E koyaiiraige kusu ne, Nei utara E paroho sange itak nu nisa ruwe ne gusu ne na.

⁵ Ruwe ne wa, nei utara anak ne Ehoba iki buri gusu shinotcha ki kusu ne; Ehoba nupeki porope ne ruwe ne gusu ne na.

⁶ Ehoba anak ne pase ne a yakka, Shinuma irapokkari utara orun koingan ruwe ne: Koroka, ehangeko no an ushike wano pakesara utara nukan ruwe ne.

⁷ Kuani anak ne yairamhekomo ambe kush wa apkash yakka, Aokai ku sambe shiturire kusu ne; Aokai anak ne en epokba utara kinrakarape orun E teke koturi, Aige, E shimon teke en kashiobiuki kusu ne.

⁸ En gusu an orushpe anak ne Ehoba okere kusu ne: Aa Ehoba, E koro rampoken otusashuishiri pakno an; Yaikota E teke ki ikip iteki emaka wa en kore.