Iyohaichish 119 - Ashiri Aeuitaknup Iyohaichish Yona 1897

119. Iyohaichish. Arep.

Arep.

¹ OUPEKA no ruhu otta okai, Ehoba koro tuitak otta apkash utara anak ne anunuke ne.

² Shinuma koro ekambaktep shikkashima wa Keutum ebitta ani Shinuma hunara utara anak ne anunuke ne ruwe ne.

³ Ruwe un, nei utara anak ne oheugep shomo ikichi wa okai, Shinuma kon ruhu otta apkash ruwe ne na.

⁴ Chi utara shiarikiki no shikkashima kuni ne, Aokai anak ne ipawetenge sange wa un kashpaotte nisa ruwe ne.

⁵ Aa, E koro ekambakbe ashikkashimare kuni ne E kon ruhu aashte wa an humi!

⁶ Kuani anak ne obitta no okai E koro ikashpaotte eyaikoshiramshuiba yak anak ne, Shomo ku yainikoroshma kusu ne na.

⁷ Kuani anak ne E koro oupeka esanniyo-hi eyaihannokkara ita, Oupeka keutum ani E koyaiiraige ash kusu ne na.

⁸ Kuani E koro ekambakbe shikkashima kusu ne: Aa, iteki ara en emaka wa en kore.

Bet.

Bet.

⁹ Peure ainu anak ne hemanda ani kon ruhu ashkannere kusu ne ruwe he an? E koro itak an korachi koyairamatte ani aki kusu ne na.

¹⁰ Kuani ramu-osshi wano E hunara ash nisa: Neum poka, E koro ikashpaotte iteki ku ehaita kuni ne kara wa en kore.

¹¹ Kuani ika E epeka no wen-be ku ki kuni ne, E koro itak ku keutum ta eumashnu wa an na.

¹² Aa Ehoba, Aokai anak ne anunuke ne: E koro ekambakbe en epakashnu wa en kore.

¹³ Kuani ku paro ani obitta no okai E paro orowa no san aesanniyop assuru ashte ruwe ne.

¹⁴ Obitta no okai aeoteknup ku enupetne korachi, Kuani E koro ipawetenge oma ru enupetne nisa ruwe ne.

¹⁵ Kuani E koro ipawetenge ku ramepakari, Aige, E kon ruhu koyairamatte kusu ne na.

¹⁶ Kuani yaikota E koro san irenga eyainupetnere kusu ne: Samata, E koro itak shomo ku oira kusu ne na.

Gimeru.

Gimeru.

¹⁷ A en shiknure kuni ne, E koro uitek guru pirikare wa en kore; Yakun, E koro itak ku shikkashima kusu he na.

¹⁸ E koro tuitak ta okai iyokunnure ambe ku nukara kuni ne, Ku goro shiki maka wa en kore.

¹⁹ Moshiri kata payekai guru ku ne: En otta iteki E koro ikashpaotte nuina wa en kore.

²⁰ Ramma E koro aesanniyop eyaikatekara gusu Ku ramat anak ne pereke ruwe ne.

²¹ E koro ikashpaotte otereke Aiyoitakushi pakesara utara Aokai anak ne kopa-shirota nisa ruwe ne.

²² Yainikoroshma ambe newa iyesapse-i en orowa no oyakta ande wa en kore; E koro ekambakbe ku shikkashina nisa ruwe ne gusu ne na.

²³ Moshiri esapane utara rok wa en ohaigekara, Awa, E koro uitek guru anak ne E koro ipawetenge ramepakari nisa ruwe ne na.

²⁴ E koro ekambakbe ne yakka ku enupetnep ne, Nei ambe anak ne tura no ku ukoramkorohe ne ruwe ne na.

Daret.

Daret.

²⁵ Ku ramat anak ne koponchi kotuk: E koro itak an korachi en shiknure wa en kore.

²⁶ Kuani anak ne ku apkash ru sarare, aige, Aokai en ko-ese itak nisa; Nekon ka newa, E koro ekambakbe en epakashnu wa en kore.

²⁷ E koro ipawetenge ruhu en eramande wa en kore: Yakun, E koro aiyokunnure ikip ku ramepakari kusu ne na.

²⁸ Ku ramat shingi wa nin ruwe ne: E koro itak an korachi en tumashnure wa en kore.

²⁹ En orowa no shungep oyakta ande wa, Pirika irenga sange hine E koro tuitak en kore.

³⁰ Kuani anak ne son no an ruhu ku numge nisa: E koro aesanniyo-hi en kotchaketa ku ande okere na.

³¹ Kuani E koro ipawetenge shikkashima: Aa Ehoba, nekon ka newa, iteki en yainikoroshmare wa en kore.

³² E koro ikashpaotte oma ruhu otta ku hoyupu kusu ne, Nei i orota Aokai ku goro sambe porore kusu ne na.

He.

He.

³³ Aa Ehoba, E koro ekambakbe oma ruhu en epakashnu wa en kore; Yakun, okese pakno nei ambe ku shikkashima kusu ne na.

³⁴ En wayashnure wa en kore, yakun, E koro tuitak ku shikkashima kusu ne; Ruwe newa ramu-osshi wano nei ambe ku shikkashima ruwe ne kusu ne na

³⁵ E koro ikashpaotte oma ru otta en apkashte wa en kore; Inambe gusu ne yakun, nei ambe ku enupetne ruwe ne gusu ne na.

³⁶ E koro ipawetenge orun ku keutum epekare wa, Shomo yaikoshipuinere-hi otta hosari kuni ne kara wa en kore.

³⁷ Ku shikihi anak ne raka-isambe shomo nukara kuni ne kara wa en kore, Orowa, E kon ruhu otta en shiknure wa en kore.

³⁸ E koishitoma wa an E koro uitek guru gusu E koro itak ashte wa en kore.

³⁹ Ku koishitoma yainikoroshma ambe en haitare wa en kore; E koro aesanniyo ambe pirika ruwe ne gusu ne na.

⁴⁰ Ingarʼan, E koro ipawetenge ku eyaikatekara nisa; E koro oupeka ambe gusu en shiknure wa en kore.

Wau.

Wau.

⁴¹ Aa Ehoba, en erampokiwen ne yakka ki wa en kore, E koro itak an korachi en kashiobiuki poka ki wa en kore.

⁴² Yak anak ne en wenkurashpa guru otta ese itak ku ki kusu ne; E korʼitak ku eyaikopashte ruwe ne gusu ne na.

⁴³ Samata, E korʼitak ku paro wano iteki ara etaye wa en kore; E koro aisanniyo-hi ku echipachipa ruwe ne gusu ne na.

⁴⁴ Nei no nei chiki, ramma kane otusashuishiri pakno E koro tuitak ku shikkashima kusu ne na.

⁴⁵ Orowa, ku rengaine ku apkash kusu ne; E koro ipawetenge ku hunara nisa ruwe ne gusu ne na.

⁴⁶ Orowa shui, Moshiri esapane utara kotchaketa E koro ekambakbe gusu ku ye, Aige, shomo ku yainikoroshma kusu ne.

⁴⁷ Orowa, ku omap, Gusu eyainupetnere ikashpaotte enupetne kusu ne.

⁴⁸ Ku omap E koro ikashpaotte orun ku tekehe ne yakka ku yange kusu ne; Orowa, E koro ekambakbe eyaikoshiramshuiba ku ki kusu ne na.

Sain.

Sain.

⁴⁹ Gusu chipachipa kuni ne kara E koro uitek guru orun asange itak eshkarun wa en kore.

⁵⁰ Tambe anak ne ku yairamkoiki ita an en omaoma ambe ne: E koro itak en shiknure nisa ruwe ne gusu ne na.

⁵¹ Pakesara utara anak ne poron no en esapse nisa: Yakka E tuitak shomo ku otereke nisa ruwe ne.

⁵² Aa Ehoba, E koro fushko ne okai aesanniyo-hi ku eshkarun nisa, Aige, ku yaiomaoma nisa ruwe ne.

⁵³ E koro tuitak emaka wen utara gusu Kuani shiri kinrakara ruwe ne.

⁵⁴ Ku payekai chisei E koro ekambakbe ku shinotcha ki nisa ruwe ne.

⁵⁵ Aa Ehoba, ʼanchikara ta E reihei ku eshkarun, Aige, E koro tuitak ku shikkashima nisa ruwe ne.

⁵⁶ E koro ipawetenge ku shikkashima nisa ruwe ne wa gusu, Tap okaibe ku kon ruwe ne na.

Chet.

Chet.

⁵⁷ Ehoba anak ne ku korobe ne: E koro itak ku shikkashima kusu ne sekoro ku ye nisa ruwe ne.

⁵⁸ Ramu-osshi wano E koro irenga ku koramkon nisa: E koro itak an korachi pirika irenga sange wa en kore.

⁵⁹ Kuani ku apkash ruhu ku yainu nisa, Aige, E koro ekambakbe orun ku chikiri hosarire nisa ruwe ne.

⁶⁰ Kuani E koro ikashpaotte shikkashima kuni ne, Untere shomoki no yaikimatekka nisa ruwe ne.

⁶¹ Wen utara koro tush en kokarase, Koroka, E koro tuitak shomo ku oira nisa ruwe ne.

⁶² E ki oupeka aesanniyo-hi gusu: Kuani an noshiketa ku hopuni wa e koyaiiraige ash kusu ne na?

⁶³ E koishitoma obitta no okai utara newa,. E koro ipawetenge shikkashima utara utarasam ku ne ruwe ne.

⁶⁴ Aa Ehoba, moshiri anak ne E koro rampoken ani eshik ruwe ne. E koro ekambakbe en epakashnu wa en kore.

Tet.

Tet.

⁶⁵ Aa Ehoba, E koro itak an korachi, Aokai anak ne E koro uitek guru orun pirika irenga sange nisa ruwe ne.

⁶⁶ Okaibe pirika no en esanniyore wa en eramande wa en kore; E koro ikashpaotte Aokai en eishokore nisa ruwe ne gusu ne na.

⁶⁷ A en shirikirapte etokota kuani ru turainu nisa; Koroka, tane anak ne E koro itak ku shikkashima ruwe ne.

⁶⁸ Aokai anak ne pirika wa, pirikap ki ruwe ne. E koro ekambakbe en epakashnu wa en koi e.

⁶⁹ Pakesara utara anak ne en epeka no shunge oshke nisa: Ramu-osshi wano e koro ipawetenge ku shikkashima kusu ne na.

⁷⁰ Nei utara koro keutum anak ne shum korachi mimush; Koroka, kuani anak ne e koro tuitak enupetne kusu ne na.

⁷¹ Ani a en shirikirap ambe anak ne kuani gusu pirika ruwe ne; Nei ambe anak E koro ekambakbe ku eyaihannokkara kuni gusu an ambe ne na.

⁷² E paro sange tuitak anak ne kuani gusu Shiri inne kongani newa shirokani kasu no pirika ruwe ne na.

Yod.

Yod.

⁷³ E koro tekehe en kara wa en ashte nisa: E koro ikashpaotte ku eyaihannokkara kuni ne oramush keutum en kore.

⁷⁴ E koishitoma utara anak ne en nukara wa yaikopuntek kusu ne; E koro itak gusu ku chipachipa nisa ruwe ne gusu ne na.

⁷⁵ Aa Ehoba, E koro aesanniyo-hi anak ne oupekap ne sekoro ku eraman,

⁷⁶ Nekon ka newa, E koro uitek guru orun san E korʼitak nei no, Omap-an-ramuhauge kore hine en omaoma wa en kore.

⁷⁷ A en shiknure kuni ne ramuhauge wa en erampokiwen wa en kore: E koro tuitak ku enupetne ruwe ne gusu ne na.

⁷⁸ Pakesara utara yainikoroshmare wa en kore, nei utara shunge wa en hokushte nisa ruwe ne gusu ne na. Kuani anak ne E koro ipawetenge ku ramepakari kusu ne.

⁷⁹ E koishitoma utara en orun hosarire, Yakun, E koro ekambakbe eraman ruwe ne kusu ne na.

⁸⁰ Shomo ku yainikoroshma kuni ne, E koro ekambakbe orun ku keutum eramushinnere wa en kore.

Kap.

Kap.

⁸¹ E koro kashiobiuki-hi ku kon rusui wa ku ramurai ruwe ne: E koro itak ku chipachipa ruwe ne.

⁸² Hembara Aokai anak ne en omaoma kusu ne ya? sekoro ku ye rapoketa, E koro itak gusu ku shikihi nin ruwe ne.

⁸³ Kuani anak ne shupuya ta an kapu-pukuru nei no ku an; Yakka, E koro ekambakbe shomo ku oira ruwe ne.

⁸⁴ E koro uitek guru toho hembakbe an a? Hembara Aokai anak ne en epokba utara esanniyo wa panakte ruwe he an?

⁸⁵ Kuani gusu pakesara utara shui ohori nisa, Nei utara anak ne E ki tuitak nei no shomo ki utara ne ruwe ne.

⁸⁶ Obitta no okai E koro ikashpaotte anak ne son no ambe ne: Nei utara shunge wa en epokba ruwe ne; nekon a poka en kaohiuki wa en kore.

⁸⁷ Naanihungo nei utara moshiri ka wa en isamka; Koroka, kuani E koro ipawetenge shomo ku emaka nisa ruwe ne.

⁸⁸ E koro omap-an-ramuhauge-hi an korachi en shiknure wa en kore; Yak anak ne E paro sange ipawetenge ku shikka-shima kusu ne na.

Ramed.

Ramed.

⁸⁹ Aa Ehoba, otusashuishiri pakno, E koro itak kando otta aashte wa an na.

⁹⁰ E koro sonep anak ne otusashuishiri pakno okai ainu ikiri otta an: Aokai anak ne moshiri ashte, aige, an ruwe ne.

⁹¹ E esanniyop korachi tanto ne yakka nei ambe okai; Obitta no okaibe E koro uitek guru korobe ne ruwe ne gusu ne na.

⁹² Kuani anak ne E koro tuitak shomo enupetne yak anak ne, Yairamhekomo wa ku isam kusu ne na.

⁹³ Samma pakno E koro ipawetenge shomo ku oira kusu ne; Nei ambe ani aokai anak ne en shiknure nisa ruwe ne gusu ne na.

⁹⁴ Kuani anak ne E korobe ne, en kaobiuki wa en kore; E koro ipawetenge ku hunara nisa ruwe ne gusu ne na.

⁹⁵ En isamka kuni ne wen utara anak ne en ehuye nisa; Aine, kuani anak ne E koro ekambakbe ramepakari kusu ne na.

⁹⁶ Obitta no okai aeramushinne ambe okese-i ku nukan nisa; E koro ikashpaotte shi no sap ruwe ne na.

Mem.

Mem.

⁹⁷ Aa E koro tuitak ku omap humi! Tokap ebitta nei ambe ku ramepakari ruwe ne.

⁹⁸ E koro ikashpaotte anak ne en epokba utara kasu no en wayashnure nisa ruwe ne, Ramma nei ambe en otta an ruwe ne na.

⁹⁹ Obitta no okai en epakashnu utara kasu no ku wayashnu ruwe ne; E koro ipawetenge ku ramepakari ruwe ne gusu ne na.

¹⁰⁰ Pa poro utara kasu no ku oramush ruwe ne, E koro ipawetenge ku shikkashima ilisa ruwe ne gusu ne na.

¹⁰¹ E koro tuitak ku shikkashima kuni ne, Obitta no okai wen ruhu otta shomo ku chikiri ku apkashte nisa ruwe ne na.

¹⁰² E koro aesanniyo-hi shomo ku eshishi; Aokai en epakashnu nisa ruwe ne gusu ne na.

¹⁰³ Ku parumbe gusu E koro itak hemanda shisak humi! Ku paro otta soyai ninge kasu no ne.

¹⁰⁴ E koro ipawetenge ankushkerai ku wayashnu ne: Tambe gusu obitta no okai wen-buri ku etunne ruwe ne na.

Nun.

Nun.

¹⁰⁵ E koro itak anak ne ku chikiri gusu an ratchako ne, Ku apkash ru gusu an pekere ne ruwe ne,

¹⁰⁶ E koro oupeka aesanniyo-hi ku shikkashima kusu ne sekoro, Shiyuppa no ku ekambakte wa ramuoshitchiu nisa ruwe ne.

¹⁰⁷ Kuani poro no shirikirap wa an: Aa Ehoba, E korʼitak an korachi en shiknure wa en kore.

¹⁰⁸ Aa Ehoba, nekon ka newa, ku paroho wano rengaine asange ayangep uk hemhem ki, E koro aesanniyo-hi en epakashnu hemhem ki wa en kore.

¹⁰⁹ Ku ramat anak ne ramma kane ku teke ta an; Yakka E koro tuitak shomo ku oira ruwe ne.

¹¹⁰ Wen utara anak ne kuani gusu akbe yokore; Yakka, E koro ipawetenge shomo ku ehaita ruwe ne na.

¹¹¹ Ramma pakno eikeshkorobe gusu E koro ipawetenge ku uina; Nei ambe anak ne ku koro keutum nupetnere ruwe ne gusu ne na.

¹¹² E koro ekambakbe shikkashima kuni ne keutum ku atte, Otusashuishiri pakno, ramma pakno poka nei no ku ki kusu ne na.

Samek.

Samek.

¹¹³ Tu keutum o guru ku etunne ruwe ne; Koroka, E koro tuitak ku omap ruwe ne na.

¹¹⁴ Aokai anak ne ku numne ushike ne, ku koro kikhumbe E ne: E korʼitak gusu ku chipachipa ruwe ne.

¹¹⁵ Ku goro Kamui ikashpaotte ku shikkashima eashkai kuni ne: Wen-buri ikichi utara, en orowa no oyake un paye yan.

¹¹⁶ Ku shiknu kuni gusu, E korʼitak an korachi en nitata wa en kore; Orowa, ku chipachipa kuni ambe gusu iteki en yainikoroshmare wa en kore.

¹¹⁷ En nitata wa en kore, yakun a en kashiobiuki kusu ne, Aige, ramma kani E koro ekambakbe ku esanniyo kusu ne na.

¹¹⁸ E koro ekambakbe ohaita obitta no okai utara Aokai anak ne nanu isamka ruwe ne; Nei utara koro shunge anak ne raka sakbe ne ruwe ne gusu ne na.

¹¹⁹ Aokai anak ne moshiri kata an obitta no okai wen utara kani turu korachi isamka ruwe ne: Tambe gusu E koro ekambakbe ku omap ruwe ne.

¹²⁰ E koishitoma gusu ku kam anak ne tusushke ruwe ne; Orowa, E koro aesanniyo-hi gusu ku ishitoma ruwe ne.

Ain.

Ain.

¹²¹ Kuani anak ne esanniyo wa oupekap ki nisa: En keshke utara gusu iteki en ande wa en kore.

¹²² E koro uitek guru pirikare gusu koro iyuturu oma guru yaikara wa en kore: Orowa, pakesara utara iteki en keshke kuni ne kara wa en kore.

¹²³ E koro kashiobiuki-hi gusu hemhem, E koro oupeka itak gusu hemhem ku shikihi nin ruwe ne.

¹²⁴ E koro rampoken an korachi E koro uitek guru otta ki, Orowa, E koro ekambakbe en epakashnu wa en kore.

¹²⁵ E koro uitek guru ku ne, oramush keutum en kore; Yakun, E koro ekambakbe ku eraman ruwe ne kusu ne na

¹²⁶ Tane Ehoba monraige kuni paki ne; Nei utara E koro tuitak raka sakte nisa ruwe ne.

¹²⁷ Tambe gusu, kongani kasu no, ruwe newa, pirika no aturu-sakte kongani kasu no, E koro ikashpaotte ku omap ruwe ne.

¹²⁸ Tambe gusu nep ne yakka epeka no an obitta no okai E koro ipawetenge oupeka ambe ne sekoro ku esanniyo; Orowa, nep okai wen-buri ne yakka ku etunne ruwe ne na.

Pe.

Pe.

¹²⁹ E sange ipawetenge anak ne iyokunnurep ne; Tambe gusu, ku ramat anak ne nei okaibe shikkashima ruwe ne.

¹³⁰ E koro itak sarare-i anak ne pekereka shiriki; Wayasap utara wayashnure ruwe ne.

¹³¹ Ku parakayashte wa tashmak-tashmak ku ki nisa; E koro ikashpaotte ku eyaikatekara nisa ruwe ne gusu ne na.

¹³² E kon reihei ko-omap utara orun Aokai ki nisa ruwe ne korachi, En orun hosari hine pirika irenga sange wa en kore.

¹³³ Ku goro chikiri E korʼitak orun omande wa en kore; Orowa nep irarape ne yakka iteki en esapanere kuni ne kara wa en kore.

¹³⁴ Ainu keshke-i orowa no en kikiraye wa en kore: Yakun, E koro ipawetenge ku shikkashima kusu ne na.

¹³⁵ E koro uitek guru otta E nanuhu here atte wa en kore; Orowa, E koro ekambakbe en epakashnu wa en kore.

¹³⁶ Nei utara E koro tuitak shikkashima shomoki ruwe ne gusu, Ku shikihi pet korachi nupe yaikorange ruwe ne.

Tsade.

Tsade.

¹³⁷ Aa Ehoba, Aokai anak ne oupeka ne, Esanniyo E ki chiki oupeka no E ki ruwe ne.

¹³⁸ Aokai shi no sonep ki wa Oupeka no E koro ekambakbe kashpaotte nisa ruwe ne.

¹³⁹ En keshke utara E koro itak oira nisa ruwe ne gusu, Seisek mau keutum ku koro wa ku yai-isamka ki ruwe ne.

¹⁴⁰ E koro itak anak ne shi no aturu-sakbe ne, Tambe gusu E koro uitek guru nei ambe omap ruwe ne.

¹⁴¹ Kuani anak ne ponbe ne wa aeankeshbe ne: Yakka, E koro ipawetenge shomo ku oira ruwe ne.

¹⁴² E koro oupeka-i anak ne otusashuishiri pakno an oupeka ambe ne, Orowa, E koro tuitak anak ne sonep ne ruwe ne.

¹⁴³ Ku yairamhekomo wa yairamshitnere ruwe ne: Yakka, E koro ikashpaotte ku enupetne ruwe ne na.

¹⁴⁴ E sange ipawetenge otusashuishiri pakno oupekap ne: En wayashnure wa en kore, yakun ku shiknu kusu ne na.

Kop.

Kop.

¹⁴⁵ Ramu-osshi wano E konishuk, awa, Aa Ehoba, ene orun ese wa en kore. Kuani E koro ekambakbe ku shikkashima kusu ne na.

¹⁴⁶ E orun ku konishuk, awa, en kaobiuki wa en kore, Yakun, E koro ekambakbe ku koitaknu kusu ne.

¹⁴⁷ Aro kunnei nisat ta hawe ku ashte nisa: E koro itak gusu ku chipachipa nisa.

¹⁴⁸ E koro itak ku ramepakari kuni gusu, Ku shikihi anak ne makke wa an ruwe ne.

¹⁴⁹ E koro omap an-ramuhauge-i sange wa ku hawe nu wa en kore: Aa Ehoba, Aokai esanniyo-hi nei no en shiknure wa en kore.

¹⁵⁰ Wen-buri noshpa wa paye utara anak ne karange no araki korʼan; E koro tuitak orowa no ehangeko no okai ruwe ne.

¹⁵¹ Aa Ehoba, Aokai ehange no an; Obitta no okai E koro ikashpaotte anak ne sonep ne ruwe ne.

¹⁵² Aokai anak ne otusashuishiri pakno E koro ekambakbe ashte nisa ruwe ne sekoro, Fushkotoi wano ku eraman ruwe ne na.

Resh.

Resh.

¹⁵³ Ku yairamchuptek ambe esanniyo wa en kashiobiuki wa en kore; E koro tuitak shomo ku oira ruwe ne gusu ne na.

¹⁵⁴ En gusu en shirine ye wa en kikiraye wa en kore: E koro itak an korachi en shiknure wa en kore.

¹⁵⁵ Kashiobiuki ambe anak ne wen utara orowa no ehangeko no an ruwe ne; Nei utara E koro ekambakbe shomo hunara ruwe ne gusu ne na.

¹⁵⁶ Aa Ehoba, E koro ramuhauge an rampoken anak ne poro ruwe ne: E koro aesanniyo-hi nei no en shiknure wa en kore.

¹⁵⁷ En keshke utara newa en epokba utara anak ne inne ruwe ne; Yakka E sange ipawetenge shomo ku ehaita ruwe ne.

¹⁵⁸ Kuani nei kokandama ki utara ku nukara wa yairamoknatara ruwe ne; Nei utara E koro itak shomo shikkashima ruwe ne gusu ne na.

¹⁵⁹ Hemanda kuani E koro ipawetenge ko-omap ya esanniyo wa en kore; Aa Ehoba, E koro omap-an-ramubauge-hi an korachi en shiknure wa en kore.

¹⁶⁰ E koro itak aesanniyo chiki sonep ne; Orowa, pishno no okai E koro oupeka aesanniyo ambe anak ne otusashuishiri pakno an shiriki ruwe ne.

Shin.

Shin.

¹⁶¹ Ikkewe sakno moshiri esapane utara en keshke nisa; Koroka, ku keutum anak ne E koro itak koishitoma wa an ruwe ne na.

¹⁶² Poron no okaibe pa guru korachi, E koro itak ku enupetne ruwe ne.

¹⁶³ Kuani anak ne shungep etunne wa kowen ruwe ne; Aige, E koro tuitak ku omap shiriki.

¹⁶⁴ Shine to ta arawan-shuine E koiramye ash, E koro oupeka aesanniyo ambe an ruwe ne gusu ne na.

¹⁶⁵ E koro tuitak ko-omap utara anak ne poro itomo irenga kon ruwe ne; Aige, nei utara gusu ureepetchiu ika isam ruwe ne na.

¹⁶⁶ Aa Ehoba, E koro kashiobiuki-hi gusu ku chipachipa nisa; Awa, E koro tuitak ku shikkashima nisa ruwe ne.

¹⁶⁷ Ku ramat anak ne E koro ekambakbe shikkashima nisa; Orowa, shi no shiarikiki no nei ambe ko-omap nisa ruwe ne na.

¹⁶⁸ E koro ekambakbe newa ipawetenge ku shikkashima nisa; Obitta no okai ku apkash-i E kotchaketa okai ruwe ne gusu ne na.

Tau.

Tau.

¹⁶⁹ Aa Ehoba, ku ashte hawe E kotchaketa ek kuni ne kara wa en kore: E koro itak an korachi en wayashnure wa en kore.

¹⁷⁰ Ku ki koramkoro itak E kotchaketa ek kuni ne kara wa en kore: E koro itak an korachi en kashiobiuki wa en kore.

¹⁷¹ Ku papush wano iramyep sangere wa en kore; Aokai anak ne E koro ekambakbe en epakashnu ruwe ne gusu ne na.

¹⁷² E koro itak gusu ku parumbe shinotcha kire wa en kore; Obitta no okai E koro ikashpaotte oupekap ne ruwe ne gusu ne na.

¹⁷³ E koro tekehe en kaobiuki kuni gusu etokookire wa en kore; E koro ipawetenge ku numge nisa ruwe ne gusu ne na.

¹⁷⁴ Aa Ehoba, E koro kashiobiuki-hi gusu ku eyaikatakara nisa; Aige, E tuitak ku enupetne shiriki.

¹⁷⁵ Ku ramat shiknure, yakun E koiramye ash kusu ne; Orowa, E koro aesanniyo ambe en kashiobiukire wa en kore.

¹⁷⁶ Bu turainu hitsuji nei no kuani ru turainu nisa ruwe ne; E koro uitek guru hunara wa en kore; E koro ipawetenge shomo ku oira ruwe ne gusu ne na.