Iyohaichish 10 - Ashiri Aeuitaknup Iyohaichish Yona 1897

10. Iyohaichish.

¹ AA Ehoba, nep gusu Aokai anak ne ehangeko no an ushiketa ash a? Nep gusu yairamhekomo an i ta Aokai yainuinak ruwe he an?

² Wen utara pakesara wa otek-sak guru shiarikiki no keseamba ruwe ne; Yaikota oshke esanniyop ani aeyaiewendere ruwe ne na.

³ Wen utara anak ne koro keutum ta ki rusuibe eyaiyomonnure, Orowa, yaikoshipuinere guru nunuke wa Ehoba eangesh ruwe ne gusu ne na.

⁴ Wen guru anak ne sancha otta pakesara iporo epukitara, Shinuma nei ambe shomo hunara kusu ne, sekoro itak. Kamui isama kunak ramma yainu ruwe ne na.

⁵ Hembara ne yakka koro ki buri yupke ruwe ne; E ki esanniyop anak shi no ri wa shinuma nukara eaikap ruwe ne: Aeramshitnere utara gusu shinuma orun hussa shiukosamba ruwe ne na.

⁶ Koro keutumta, kuani amoimoigere shomoki: Otusashuishiri pakno a en awende shomoki kusu ne, sekoro itak.

⁷ Koro paro anak ne koatchap newa shungep newa chinishteramukorep ani aeshik wa an: Koro parumbe choropoketa irarape newa raka-isambe an ruwe ne.

⁸ Kotan otta shinuma yongororo kusu ne, Nuina ushiketa turu-sak guru keweuk: Orowa, katchak utara kopiuki ruwe ne.

⁹ Koro chisei ta shishi anak ne yongororo korachi nei guru ne yakka nuina ushiketa yongororo: Otek-sak guru koiki gusu yongororo: Koro ya otta animba chiki, otek-sak guru kishima ruwe ne.

¹⁰ Shinuma hotku-hotku wa ikkeu komo, Koro okirashnu utara gusu katchak utara anak ne aanno-hachire ruwe ne.

¹¹ Koro keutum ta, Kamui anak ne oira nisa ruwe ne: Shinuma koro nanuhu nuina wa ramma pakno shomo nukara kusu ne, ani itak.

¹² Aa Ehoba, hopuni; Aa Kamui, E tekehe puni: Iteki otek-sak guru oira wa en kore.

¹³ Hemanda gusu wen guru anak ne Kamui eangesh wa, Aokai shomo nei ambe hunara kusu ne, ari ani itak ani keutum ta itak ya?

¹⁴ Aokai inganʼnisa ruwe ne; E tekehe otta shikkashima kuni gusu Aokai irarape newa kinrakarape nukan ruwe ne: Katchak guru anak ne Aokai gusu eyaikopashte: Eshikop sak guru Aokai kashiobiuki nisa ruwe ne.

¹⁵ Wen guru koro amunin kaye wa en kore; Wen guru koro wen-buri obitta isam pakno Aokai hunara kusu ne na.

¹⁶ Ehoba anak ne otusashuishiri wano otusashuishiri pakno moshiri Esapanep ne: Moshiri uirup anak ne Shinuma koro moshiri orowa no aisamka ruwe ne.

¹⁷ Aa Ehoba, Aokai anak ne otek-sak guru konrusuibe nu nisa ruwe ne; Aokai anak nei utara koro keutum tumashnure, orowa, otta kisara ikokanu kusu ne na:

¹⁸ Moshiri kata an guru tewa no iteki ishitomare kuni gusu, Eshikop sak guru newa aeyairamkoikire utara gusu ipishi ki kusu ne na.