II Yoannes 1 - Ashiri Aeuitaknup Iyohaichish Yona 1897

¹ Ekashi anak ne son no ku omap anunge wa an shiwentep koro poho utara tura kane orota kambi omande na; ouse kuani patek shomo ne, koroka, son no ambe eraman obitta no okai utara ka e omap ruwe ne;

² tambe anak ne un oshiketa oshiroma wa ramma pakno un tura no okai sonep rengap gusu an ambe ne ruwe ne:

³ irenga hemhem, aerampokiwenbe hemhem, itomo hemhem, son no, omap an no, Michi ne Kamui newa Michi koro Poho Yesu Kiristo orowa no an wa un tura no okai kusu ne na.

⁴ Michi orowa no akore ikashpaotte nei no e koro poho tumuta okai utara anak ne son no apkash wa okahi ani an ambe ku nukan nisa ruwe ne gusu, shi no ku nupetne ruwe ne.

⁵ Orowa, tane akoro shiwentep, onishnishi ku ki-hi; ashiri ikashpaotte aokai gusu ku nuye korachi shomo ne, koroka, atpake wano chikorobe ne, nei ambe anak ne, uweutashpa uweomap ash ambe ne ruwe ne.

⁶ Shinuma ki ikashpaotte nei no apkash ambe anak ne, tambe anak omap ambe ne. Otta apkash kuni gusu an atpake wano echi nu ikashpaotte tambe ne ruwe ne na.

⁷ Inne no okai kokandama ki utara anak ne moshiri orota araki wa okai, Yesu Kiristo ainu netoba koro wa ek sekoro ambe shomo pushpusu utara tambe ne ruwe ne. Tambe anak kokandama ki guru ne, nei a anti-kiristo ne ruwe tapan na.

⁸ Aki okere okaibe shomo aturainu, koroka, pummaha obitta echi koro kuni ne yaikota yaitubare yan.

⁹ Nen ne yakka iki wa Kiristo koro epakashi otta oshiroma shomoki gurʼanak ne, Kamui koro shomoki ruwe ne: Shinuma koro epakashi otta oshiroma gurʼanak ne, Shinuma anak Michi hemhem Poho hemhem kon ruwe ne na.

¹⁰ Nen ka e orun araki wa tap epakashnu ambe koro shomoki chiki, iteki e kot chisei ta akunge, iteki shinuma rangarap yan:

¹¹ inambe gusu ne yakun nei guru korangarap ki gurʼanak ne shinuma koro wen ikip tura ki ruwe ne gusu ne na.

¹² Aokai gusu ku nuye kuni inne okaibe an koroka, kambi newa sumi ani shomo ku ki na: shui, poron no eani nupetne kuni gusu e orun ku arapa wa uwenitomom no ku ye kuni ku chipachipa ruwe ne.

¹³ E koro anumge an turesh koro poho anak ne e korangarap ki na.