II Timoteos 4 - Ashiri Aeuitaknup Iyohaichish Yona 1897

4 Ik.

¹ Kamui shik-samata hemhem, shiknu guru ne yakka rai guru ne yakka koipishi Kiristo Yesu shik-samata hemhem, samata, Shinuma ek kusu ne a ambe newa koro moshiri ankushtapne e onishnishi ash na;

² nei itak eupaskuma yan; pakihi pirika ita ne yakka, pirika pakihi isam ita ne yakka ramma-kane iki yan; shi no ramu-shiporore wa epakashnu tura koipishi wa esanniyo,

³ pakashnu, onishnishi yan. Inambe gusu ne yakun, nei utara anak ne nisashnu an epakashi kopange pakihi ek kusu ne; koroka, mayaige kisara koro hine yaikota koro iki rusui keutura kopakeat epakashnu utara yaikota gusu roshki kusu ne;

⁴ orowa, sonep orowa no koro kisara hosari hine uwepekere orun atte kusu ne.

⁵ Koroka, nep ne yakka gusu yairamatte yan, enishte yan, pirika shongo eupaskuma guru ki kuni ikip ki yan, otta yaishieiwangere ambe uweomare yan.

⁶ Inambe gusu ne yakun, tane kuani a en ayange okere, ku oman kuni a-i epa nisa ruwe ne.

⁷ Pirika ukoiki ambe ku ki okere, pakno ku hoyupu kuni-hi ku oman okere aeishokor-i ku shikkashima nisa ruwe ne; tewa no en gusu oupeka sapa-umbe eumashnu wa an;

⁸ oupeka no koipishi ki Utarapa nei toho ta nei ambe en kore kusu ne: orowa, en otta patek shomo ne, koroka, Shinuma ek kuni ambe omap obitta no okai utara, otta ne yakka akore kusu ne ruwe ne.

^9-10 Tunashino en orun ek kuni iki yan: inambe gusu ne yakun, Demas anak ne tane okai moshiri omap gusu en emaka wa Tessaroniki orun oman wa isam ruwe ne gusu ne na; orowa, Kureskens anak Garatea otta arapa, Titus anak ne Darmatea otta oman nisa ruwe ne. Roukos patek en tura no an ruwe ne.

¹¹ Markos tura wa ek yan: nei guru anak yaishieiwangere otta en gusu raka an guru ne ruwe ne gusu ne na.

¹² Koroka, Epesos otta Tikikos ku omande nisa.

¹³ Troas kotan ta an Karpos otta ku hoppa mipihi; samata, kambi-sosh, orowa makangane anuye kambi,

¹⁴ e ek chiki koro wa en kore yan. Fure-kani kik guru ne Areksandros anak ne shi no en wende nisa ruwe ne; Utarapa anak ne shinuma ki ikip esanniyo wa koropare kusu ne:

¹⁵ aokai ne yakka nei guru gusu yaitubare yan: inambe gusu ne yakun, shinuma earikimre chi ki itak shisamchashnure nisa ruwe ne na.

¹⁶ Atpake an ku iki kikikara itak ku sange ita anak ne en tura shinen poka shomo iki, koroka, obitta en emaka nisa ruwe ne: tap ambe ika nei utara epeka wa aesanniyo kuni ku koramkoro.

¹⁷ Koroka, Utarapa anak ne en samaketa an, awa, en tumashnure nisa ruwe ne; tambe anak ku ankushkerai nei orushpe naa irammakaka aashte kuni, samata, obitta no okai Oya un utara inu kuni ne aki na: orowa nei shishi paro wa a en ohaitare nisa ruwe ne na.

¹⁸ Utarapa anak ne pishno no an wen ikip orowa no en ohaitare kusu ne, orowa, kando un moshiri gusu en kashiobiuki kusu ne: otusashuishiri wano otusashuishiri pakno Shinuma orun arakuru an na. Amen.

¹⁹ Priskas newa Akiras newa Onesiporos koro uni un utara tura ekap yan.

²⁰ Erastos anak ne Korintos kotan ta riya nisa: koroka, Tropimos tashum wa gusu Miretos kotan ta ku hoppa nisa ruwe ne.

²¹ Mata etokota ek kuni ne shiarikiki no iki yan. Eubouros e ekap na; Pondes ka, Rinos ka, Kraudia ne yakka obitta no okai iriwak utara tura e ekap ruwe ne.

²² Utarapa e kon ramat tura no an kuni akoramkoro. Irenga e tura no an kuni ku koramkon na.