II Timoteos 2 - Ashiri Aeuitaknup Iyohaichish Yona 1897

2 Ik.

¹ Tambe gusu ku poho ne aokai, Kiristo Yesu oshiketa an irenga otta yaitumashnure yan.

² Orowa, inne paweteshu utara tumugeta en otta e nu okere okaibe, epakashnu eashkai sone an moshima utara otta ne yakka shikashimare yan.

³ Kiristo Yesu koro pirika tumikoro guru korachi uturu wenbe eyairamshitne yan.

⁴ Nep tumi-koro gusu iki guru ne yakka tan moshiri ta ishu kuni gusu an okaibe gusu shomo yainishomapte ruwe ne; tambe anak ne tumi-koro guru gusu shinuma sapaha nuye guru nupetnere kuni gusu ne na.

⁵ Samata, nei shinot gusu ukirorowande guru an chiki, ikashpaotte nei no iki shomoki yakun,

⁶ sapa-umbe shomo aunu ruwe ne Monraige wa etoita gurʼanak ne hoshiki no nei hetuku ibehe ibe kunip ne.

⁷ Ku ye itak esanniyo yan; nep ne yakka gusu Utarapa anak ne e eramande kusu ne gusu ne na.

⁸ Ku iki shongo nei no an, Dabid sanikiri ne, rai-i orowa no hetopo-shiknu Yesu Kiristo eshkarun yan:

⁹ nei shongo gusu wen-buri ki guru korachi a en tupetupe wenbe eyairamshitne wa an na; koroka, Kamui itak anak ne atupetupe shomoki ruwe ne.

¹⁰ Tambe gusu, anumge wa okai utara gusu obitta no okaibe ku eyaishiporore ruwe ne, nei utara ne yakka Kiristo Yesu tura otusashuishiri pakno an arakuru ne kashiobiuki ambe akore kuni gusu ne na.

¹¹ Nei aye itak ambe sonep ne: inambe gusu ne yakun, Shinuma tura no chi rai yakun, Shinuma tura no shiknu ash ne yakka ki kusu ne;

¹² yaishiporore yakun, Shinuma tura no epungine kusu ne; Shinuma eshikashke ash yakun, Shinuma un eshikashke ne yakka ki kusu ne:

¹³ chi utara anak ne sone ambe shomo ne a yakka, Shinuma ramma sonep ne; Shinuma yai-eshikashke eaikap ruwe ne gusu ne na.

¹⁴ Tapan okaibe gusu nei utara eshkarunde yan, aige, ani eyaiepirikare eaikapbe, nu utara oheugere kuni itak gusu upahunara ambe nei utara itek iki kuni ne Utarapa kotchaketa kashpaotte yan.

¹⁵ Oupeka no sone an itak koro, yainikoroshma kuni ika sak no an monraige guru nepkoro, Kamui iramye nei no an guru korachi yaikoropare kuni ne shiarikiki no iki yan.

¹⁶ Koroka, momok an oha-hawe eshishi yan: inambe gusu ne yakun, nei okaibe anak ne shomo Kamui kooripakbe gusu naa iki kuni okaibe ne,

¹⁷ orowa, koro itak anak ne nini shipirasa korachi shipiraspa ruwe ne:

¹⁸ nei utara tumugeta Humenaios newa Piritos okai ruwe ne; nei utara anak ne sonep gusu ohaita, aige, hetopo-a-shiknure ambe anak ne aokere ruwe ne sekoro ye hine sereke okai utara eishokor-i hokushte ruwe ne.

¹⁹ Yakka. Kamui koro nishuwamne asamaha aatte wa an, aige, tan han aomare an na; — Utarapa anak ne yaikota koro utara eraman; orowa, Utarapa reihei ye obitta no okai utara oupeka-sakbe orowa no shikiru yan.

²⁰ Koro chisei onnaigeta ouse kongani op newa shirokani op patek okai shomo ne, koroka, chikuni op newa toitoi op ne yakka okai; samata, momokbe gusu aeiwange kunip okai, aeoripakbe gusu aeiwange kuni ambe okai ruwe ne.

²¹ Tambe gusu, ainu anak ne nei okaibe gusu yaituru-sakte chiki, shinuma anak aeoripakbe kuni gusu an op ne, ashkannep ne, kon Nishpa orowa no aeiwange kuni oupakbe ne, nep pirika ikip gusu aetokooiki kunip ne akara kusu ne na.

²² Koroka, upen guru iki rusui wen-buri eshishi hine turu-sak sarabe wano Utarapa konishuk utara tura, oupeka ambe hemhem, eishokor-i hemhem, omap ambe hemhem, itomo irenga hemhem keseamba yan.

²³ Koroka, ramu-sak, aerampeutekbe an upahunara ambe eshishi yan, e eraman korachi, nei okaibe anak ne ukoiki ambe hopunire ruwe ne na.

²⁴ Orowa, Utarapa koro usshiune guru anak ne ukoiki kunip shomo ne, koroka, obitta no okai utara epeka rotcha wa an, epakashnu eashkai no an, wenbe gusu eyaishiporore wa an,

²⁵ ramu-shiroma no yaiatte wa epokba utara pakashnu kuni an guru ne kunip ne ruwe ne; Kamui anak ne nei utara yaikokatpakte wa sonep eramande, orowa,

²⁶ nei utara yaieashirikara hine nitne Kamui atte akbe aohaitare, aine, Kamui irenga ankushkerai shinuma ani auk kuni gusu ne na.