II Timoteos 1 - Ashiri Aeuitaknup Iyohaichish Yona 1897

1 Ik.

¹ Kiristo Yesu oshiketa an inotu akore kuni eitakamkire an korachi Kamui irenga ankushkerai Kiristo Yesu koro Apostoro ne Pauros ku ne anak ne, ku omap an poho Timoteos otta kambi omande na:

² irenga hemhem rampoken hemhem itomo hemhem Michi ne Kamui newa chikoro Utarapa ne Kiristo Yesu orowa no an kuni akoramkon na.

³ Tokap ne yakka kunne ne yakka echi nukan rusui hine okere shomoki no ramma echi eshkarun wa ku inonno-itak, aige, ku goro ekashi utara wano aotke-otke shomo ne an keutum ani otta ku yaishieiwangere Kamui ku yaiiraige na,

⁴ echi nupe ku eshkarun wa shiri ku nupetne kuni ne nei no ku ki na;

⁵ orowa, e onnaigeta an kankapkapeka sak eishokor-i a en eshkarunde an; hoshiki no nei ambe anak ne e koro huchi Rois newa e koro habo Euneike oshiketa an; orowa, e onnaigeta ne yakka an sekoro ku eishokon ruwe ne.

⁶ Tapan ikkewehe an gusu, ku teke e kashi-ta ku ande ankushkerai Kamui orowa akore ambe e paraparasere kuni ne e eshkarunde ash ruwe ne.

⁷ Inambe gusu ne yakun, Kamui anak ne ishitoma kuni gusu an ramat un kore shomoki, koroka, kiroro newa omap ambe newa keutum yaieashirikara kuni ramat un kore nisa ruwe ne.

⁸ Tambe gusu chikoro Utarapa gusu an paweteshu ambe hene, Shinuma gusu upakashnu chisei ta an guru ne kuani gusu hene iteki yainikoroshma yan: koroka, Kamui kiroro nei no an pirika shongo tura wenbe gusu eyairamkoiki yan;

⁹ Shinuma anak ne un kashiobiuki nisa, ashkanne nushuk ambe ani un tak, iki ikip nei no an korachi shomo ne, koroka, otusashuishiri an pakihi etokota Kiristo Yesu oshiketa okai wa un kore Shinuma yaikota koro keutura newa irenga an korachi nep;

¹⁰ aige, nei ambe anak ne chikoro un Kashiobiukip ne Kiristo Yesu ek-hi ani anukare nisa ruwe ne; Shinuma anak ne rai ambe isamka wa pirika shongo ankushkerai inotu newa shomo muninbe sarare nisa ruwe ne;

¹¹ nei ambe gusu eupaskuma ki guru, Apostoro ne guru, epakashnu guru ne kuni akara ainu ku ne ruwe ne.

¹² Tap ambe gusu obitta no tan okaibe ku eramushitne wa an: yakka ku yainikoroshma shomoki ruwe ne; inambe gusu ne yakun, ku eishokoro okere guru ku eamkiri, orowa, ku shikkashima re okaibe Shinuma nei toho gusu epungine eashkaibe ne sekoro ku eishokon ruwe ne gusu ne na.

¹³ En orowa no e nu okere nisashnu an itak katuhu gusu anak, Kiristo Yesu oshiketa an eishokor-i atte ambe newa omap ambe ani shikkashima yan.

¹⁴ Aokai ashikkashimare okere pirika ambe gusu anak, e onnaigeta oshiroma wa an Ashkanne Ramat ankushkerai epungine yan.

¹⁵ Tambe e eraman, Asia moshiri ta okai utara obitta en orowa no hosari okere; nei utara tumugeta Pugeros newa Herraogones okai ruwe ne.

¹⁶ Onesiporos koro uni un utara Utarapa erampokiwen wa kore kuni ku koramkoro; inambe gusu ne yakun, shinuma anak ne kanna-kanna en sambe shiturire nisa, orowa,

¹⁷ ku shinkop gusu shomo yainikoroshma ki; koroka, Roma kotan ta an ita irammakaka en hunara hine

¹⁸ en pa nisa ruwe ne (Utarapa toho ta Utarapa anak ne shinuma erampokiwen wa kore kuni ku koramkoro); samata, Epesos kotan ta hempak inne okaibe ani shinuma en gusu yaishieiwangere ambe aokai pirika no eraman ruwe ne na.