II Tessaronike 2 - Ashiri Aeuitaknup Iyohaichish Yona 1897

2 Ik.

¹ Iriwak utara, chikoro Utarapa ne Yesu Kiristo ek kusu ne a arabe newa Shinuma orun chi utara uwekarapa ash ambe newa gusu echi koramkoro ash ruwe ne;

² tambe anak Utarapa toho tane an sekorobe gusu iteki echi keutura autumashire tunash, ramat ani ne yakka, itak ani ne yakka, un orowa no aette kambi ani ne yakka, iteki keutum chiukopoyere kuni

³ an arabe ne; nep ne yakka gusu iteki inan guru ne yakka echi kokandamare yan: inambe gusu ne yakun, hoshiki no eyaikoemaka arabe an, samata, nei a chikokatpak ainu, nei a aisamka ambe poho anukara shomoki chiki,

⁴ nei toho shomo an ruwe ne; nei guru anak ne obitta no okai Kamui aporosep okkeukashi hene ongami kunip okkeukashi hene yairiknare epokbap ne; Kamui kora kenru ta a kane yaikota Kamui ne kara pakno poka iki guru ne ruwe ne.

⁵ Kuani naa echi tura no ku an rapoketa tap okaibe gusu echi nure ash nisa sekorʼambe echi eshkarun shomoki ruwe he an?

⁶ Nei guru yaikota koro pakihi ta anukare kuni ne tane shinuma shinnatush ambe echi eraman ruwe ne.

⁷ Inambe gusu ne yakun, ikashpaotte otereke mukkep anak ne tane monraige shiri-ki: ouse nei guru oyake un auk pakno shinnatushbe an ruwe ne.

⁸ Orowa, okake an koro, Utarapa ne Yesu anak koro paro oma heisepa ani raige wa iki koro ek wa an arabe ani isamka nei ikashpaotte otereke guru anukare kusu ne na;

⁹ aige, nei utara anak ne kashiaobiuki kuni ne sonep omap ambe shomo uina nisa ruwe ne gusu,

¹⁰ nei guru anak ne Satan iki-hi korachi, usa okai kiroro newa shiroshi newa shunge iyokonnurep, samata, aisamka kuni gusu an utara gusu usa okai kokandama arabe newa oupeka-sakbe koro wa ek ruwe ne.

¹¹ Nei utara anak ne shungep eishokoro kuni ne, tambe gusu Kamui nei utara orun ouhaitap ikichi kuni arabe omande ruwe ne:

¹² tambe anak ne sonep eishokoro shomoki wa oupeka-sakbe enupetne obitta no okai utara akoipishi kuni gusu an ap ne ruwe ne.

¹³ Koroka, Utarapa orowa no aomap an iriwak utara, atpake wano Kamui anak ne Ramat ashkannere ambe newa sonep eishokoro ambe otta echi numge wa kashiobiuki gusu, ramma-kane echi utara gusu Kamui koyaiiraige kunip chi ne ruwe ne;

¹⁴ chikoro Utarapa ne Yesu Kiristo koro nupeki akore kuni ne, Shinuma anak ne chikoro pirika shongo ankushkerai tata otta echi nishuk nisa ruwe ne.

¹⁵ Tambe gusu iriwak utara, tumashnu no roshki, orowa, itak ani hene ne ya chi nuye kambi ani hene ne ya aepakashnu oina shikkashima yan.

¹⁶ Tane chikoro Utarapa ne Yesu Kiristo yaikota hemhem un omap wa irenga ankushkerai otusashiri pakno an omaoma ambe newa pirika chipachipa ambe un koropare chikoro Michi ne Kamui hemhem anak ne,

¹⁷ echi koro sambe omaoma hine obitta no okai pirika ikip newa itak otta roshkire kuni akoramkon na.