II Petros 3 - Ashiri Aeuitaknup Iyohaichish Yona 1897

3 Ik.

¹ Aomap an utara, tambe anak ne echi utara gusu tu ikinne an ku nuye kambi ne ruwe ne; orowa, nei tup otta echi eshkarunde wa echi koro so ne an keutum ku chiukopoyere na;

² ashkanne uweingara utara etokota ye itak hene echi eshkarun, samata, echi koro Apostoro utara gusu an Utarapa newa Kashiobiukip sange ikashpaotte hene echi eshkarun kuni ambe ne:

³ tambe hoshiki no uonnere yan, okese an toho ta eoya-itak ki utara araki, orowa, yaikota koro ibeporore an keutum nei no kara wa eoya-itak ki,

⁴ aige, ene itak kusu ne-hi; — Shinuma ek kuni eitakamkire ambe hunakta an a? inambe gusu ne yakun, ekashi utara mokonnoye orowa no, moshiri akara heashi wano, nep ne yakka ramma-ramma an na,

⁵ ari an itak ani itak kusu ne. Nei utara anak ne hokamginʼno tambe oira, Kamui itak an gusu, fushko wano kando an, orowa, wakka orowa no etuk, wakka oshiketa roshki toitoi ka an na;

⁶ nei okaibe ari nei rapoketa an raoshiri anak ne wakka ani akamure wa aisamka:

⁷ koroka, tane okai kando, toitoi tura kane, nei shinep ne an itak ari, akoipishi kuni toho, Kamui koatcha utara aisamka kuni toho pakno ashikkashima wa abe gusu aande wa an na

⁸ Koroka, aomap an utara, tan shine ambe iteki oira yan; Utarapa otta shine to anak ne ashikne shine wan hotne pa ukorachi ne, orowa, ashikne shine wan hotne pa anak shine to korachi ne ruwe ne.

⁹ Okai utara esanniyo korachi Utarapa anak ne koro eitakamkire gusu moire shomo ne; koroka, nen ne yakka aisamka kuni ambe Shinuma konoburu shomoki no, utara obitta yaikokatpak kuni ambe konoburu wa, echi utara gusu ramushiporore ruwe ne na.

¹⁰ Koroka, Utarapa tobo anak ne ikka guru korachi ek kusu ne; nei ita kando anak ne poro humi ashte wa isama, orowa, kando orunbe shiri seisek wa nin, orowa, toitoi hene otta okai ikip hene auhuyeka wa aisamka kusu ne na.

¹¹ Tap korachi tap okaibe nin wa aisamka kuni ambe ne sekoro chi eraman gusu, turu-sak no moshiri koishu hene ki,

¹² Kamui ko-oripak hene ki, gusu kando uhuye wa nin, kando orunbe shiri seisek wa ru Kamui toho ek kuni ambe shi no chipachipa hine ehuye hene ki wa, nekon a okai utara chi ne kunip etokosh ruwe he an?

¹³ Koroka, Shinuma ki eitakamkire ambe nei no, otta oupeka ambe oshiroma ashiri kando ashiri toitoi chi ehuye korʼan ruwe ne.

¹⁴ Tambe gusu, aomap an utara, tap okaibe echi ehuye wa okai gusu, echi utara anak ne Shinuma tek-samata echi sak no, piri isam no, itomo an no anukara kuni ne shiarikiki no kara yan.

¹⁵ Orowa, chikoro Utarapa ramu-shiporore-hi anak ne kashiobiuki ambe ne sekoro esanniyo yan; chikoro omap an iriwak ne Pauros ne yakka orota akore wayashnu-i korachi echi gusu nuye nei no ki yan; Shinuma anak ne obitta nuye kambi kata poka tap okaibe gusu ye na;

¹⁶ nei oshiketa eramuhokamba orushpe okai, aine, erampeutek wa utumashire utara anak ne yaikota isamka gusu moshima okai Kamui kambi poka oheugere korachi, nei ambe ne yakka oheugere ruwe ne.

¹⁷ Tambe gusu, aomap an utara, echi utara anak ne etoko wano eraman gusu, ikineipeka, katpak koro utara koro ohaitap ani aekira wa, yaikota koro utumashi shomoki ambe iteki autumashire kuni ne yaitubare yan.

¹⁸ Koroka, chikoro Utarapa newa un Kashiobiukip ne Yesu Kiristo gusu an irenga newa eramushbe oshiketa shukup yan. Shinuma orota tane ne yakka otusashuishiri pakno ne yakka nupeki an na. Amen.