II Petros 2 - Ashiri Aeuitaknup Iyohaichish Yona 1897

Ik

¹ Koroka, nei utara tumugeta shunge uweingara utara ka hopumba nisa ruwe ne; tambe nei no, chashnu no an aisamka-i yaikoropare, orowa no nei utara hok Nishpa poka eshikashke, Kamui orushpe ohoge yainu ambe nuina no ahupte shunge epakashnu utara echi tumugeta ne yakka hopumba kusu ne na.

² Orowa, inne utara anak ne nei utara koro ramupekere iki buri kara kusu ne; tambe gusu, nei utara okai gusu son no an ruhu anak ne akoatcha kusu ne na.

³ Orowa, yaikoshipuinere ki wa shiwayashnure itak ani echi iraugetupa kusu ne; nei utara gusu an aesanniyop anak ne fushko wano tane poka tere shomoki, koro aisamka-i mokoro shomoki ruwe ne.

⁴ Inambe gusu ne yakun, Kamui anak ne katpak ki hauturumbe honnere shomoki koroka, akoipishi kuni gusu ashikkasmimare wa Tartaros otta an kunne shui orun okeuba chiki,

⁵ orowa, fushko moshiri honnere shomoki koroka, shomo Kamui ko-oripak raoshiri uirup gusu pesambe hetukure ita, oupekap eupaskuma Noa newa tura no okai ara wa niu ne utara shiknure chiki; samata,

⁶ shomo Kamui ko-oripak no moshiri koishu utara pakashnu gusu Sodom newa Gomorra kotan uina ne kara hine wentoikantoi akokiru wa panakte; aige,

⁷ ohaita utara koro ramupekere iki buri gusu shi

⁸ no yaioknatara wa an oupeka Rot kashiobiuki (inambe gusu ne yakun, nei oupeka guru anak ne nei utara tumugeta oshiroma hine, nukara hene ki inu hene ki wa, kesto-kesto nei utara ohaita ikip gusu, kon ramat iuninkare nisa ruwe ne na):

⁹ Utarapa anak ne Kamui ko-oripak utara akoramnukara-i ohaitare katu eraman, samata, koipishi toho pakno apanakte kuni gusu oupeka sak utara shikkashima katu eraman;

¹⁰ makangane turu-ushbe kam eikaunu no apkash hene ki, enishpane ambe etunne hene ki utara otta kara katu Utarapa eraman ruwe ne. Wen rametok koro, keutum eikaunu no ki wa nupeki ambe koatcha wa shomo tusushke ruwe ne;

¹¹ koroka, Kamui hauturumbe anak ne, nei utara kasu no naa tumashnu wa kiroro koro yakka, nei utara gusu Utarapa kotchaketa koatcha akoipishi itak sange shomoki ruwe ne.

¹² Koroka, tan utara anak ramu-sakbe, chikoikip nepkoro gusu aki kuni an buri koro wa akoiki hene ki a wende hene ki kuni ne hekatu erampeutekbe koatcha, tan utara auak ne, koro ki oupeka sak pummaha gusu aewende,

¹³ iwende ki wa son no poka awende kusu ne na; tokap to ta ko ibesam kuni ambe aenupetnerep ne sekoro yainu, echi newa piri-ushbe, echi tura no marapto ki ita echi koro omap gusu an marapto ko ibesam ruwe ne;

¹⁴ koro shikihi anak ne omoinu ani aeshik; katpak okakeanka eaikap; utumashi keutum shiren; koro sarabe yaikoshipuinere shiri ki; aiyoitakushi poho; oupeka ruhu emaka,

¹⁵ aige, oupeka sakbe iki gusu an pummaha konoburu Beor poho Beraam kon ru otta apkash wa,

¹⁶ ru turainu nisa ruwe ne; koroka, Shinuma anak ne yaikota ki ohaita buri gusu apakashnu nisa ruwe ne: shomo-itak roba anak ne, ainu hau sange hine nei uweingara guru kon ramusakbe hattoki nisa ruwe ne na.

¹⁷ Tan utara anak ne wakka sak shimpui ne, rerashui pashte rakura ne; nei utara gusu kurokok kunnep aenmashnu wa an na.

¹⁸ Inambe gusu ne yakun, raka-sak ashipushkere wa an ambe sange hine, wenbe ki wa ishu utara orowa no ohaitare shiri okai utara, ramupekere ambe ani, kara oma ibeporore otta shiren ruwe ne gusu ne na;

¹⁹ yaikota aisamka gusu an ambe otta yaiusshiunere wa okai rapoketa, rengaine an raondum koropare kuni eitakamkire ruwe ne; inambe gusu ne yakun, orowa no aannokara gusu anak ne,

²⁰ nei ambe otta ausshiunere wa an na. Nei utara anak ne Utarapa newa Kashiobiukip ne Yesu Kiristo eramu-an-i gusu moshiri turu-ushbe aohaitare okaketa, shui nei ambe gusu akishima wa aannokara chiki, atpake an katuhu kasu no iyoshi no an katuhu anak nei utara gusu naa wenbe ne ruwe ne gusu ne na.

²¹ Inambe gusu ne yakun, oupeka an ruhu eraman orowa no, orota akoropare ashkanne ikashpaotte emaka ambe kasu no, nei ambe atpaketa shomo eraman kuni i anak naa pirika ruwe ne na.

²² Nei utara gusu nei son no an itak-maukushtep korachi an na:— Seta anak ne yaikota sange eatup orun hosari, afuraye okere matne buta anak yachi oshiketa yaikirukiru gusu hosari ruwe tapan na.