II Korintos 7 - Ashiri Aeuitaknup Iyohaichish Yona 1897

7 Ik.

¹ Tambe gusu, iriwak utara, tan eitakamkire ambe chikoro wa okai gusu, kam newa ramat otta an obitta no okai turu gusu yaituru-sakte yanro, aine, Kamui koishitoma wa ashkanne ambe eramushinnere ki.

² Un gusu echi koro sambe sarare yan; chi utara anak ne inan guru ne yakka shomo wende, inan guru ne yakka shomo koisamka, inan guru ne yakka kokandama gusu yaiepirikare ambe shomo chi ki ruwe ne.

³ Tap ambe ku ye-hi anak ne echi akokatpakte gusu shomo ne: inambe gusu ne yakun, teeda ku ye-hi korachi, utura rai utura shiknu kuni gusu, echi utara anak ne chikoro keutum ta okai ruwe ne gusu ne na.

⁴ Echi epeka ku ye itak anak ne shiri rametokkorobe ne, echi ankushkerai ku yaiomonnure ambe anak ne poro ruwe ne: aomaoma ambe ani kuani aeshikte wa an, obitta no okai chi ikichi eramchuptekbe tumta nupetnep eika ruwe ne na.

⁵ Inambe gusu ne yakun, chi utara anak ne Makedonia orota araki wa okai yakka chikoro kam gusu shini ushike isam a koroka nei i wa ne yakka eramchuptekka ambe an; soigeta ukoiki an, onnaigeta ishitomap an ruwe ne gusu ne na.

⁶ Yakka, yaieoripakka utara omaoma Kamui anak ne, Titus ek-hi ani un omaoma ruwe ne;

⁷ ouse shinuma ek ambe ani patek shomo ne, koroka, ari shinuma echi ankushkerai aomaoma ambe, echi ki eyaikatekara ambe, echi yaituwashkarap ambe, en gusu echi seisek mau keutum koro ambe un nure shiriki ambe gusu ne yakka ne; nei ambe gusu naa mashkin ku nupetne ruwe ne.

⁸ Ku omande kambi gusu kuani echi oknatare ash, awa, teeda ku eyaikopash a yakka tane shomo ruwe ne; nei kambi anak echi oknatare nisa sekorʼambe ku nukara, koroka, ouse an pakihi uturu patek ne ruwe ne na.

⁹ Echi utara anak ne aoknatare gusu ku nupetne shomoki koroka echi ayaikokatpakte pakno echi aoknatare ambe ku enupetne ruwe ne: inambe gusu ne yakun, un gusu nep ne yakka shomo echi akoisamka kuni ne, Kamui kooripak korachi echi aoknatare an.

¹⁰ Kamui kooripak an oknatara ambe anak ne kashiaobiuki kuni gusu an yaikokatpakbe hetukure, aige, nei ambe gusu yaikopash ushike isam ruwe ne: koroka, moshiri gusu an oknatara ambe anak ne rai ambe hetukure ruwe ne.

¹¹ Inambe gusu ne yakun, tapne an ambe ingarʼan, Kamui kooripak nei no echi aoknatare gusu anak ne, echi tumugeta nep yuptek no echi iki humi! ruwe un, nep kikikara ambe! ruwe un, nep kinrakara ambe! ruwe un, nep ishitoma ambe! ruwe un, nep eyaikatekara ambe! ruwe un, nep seisek mau keutum! ruwe un, nep ikemnu ambe humi! nep ne yakka nei orushpe gusu echi utara anak ne turu-sakbe ne sekoro echi yaiashte nisa ruwe ne.

¹² Tambe gusu kuani anak ne echi orun kambi ku omande nisa a yakka, wenbe iki guru gusu hene, akoiwende guru gusu hene shomo ku nuye, koroka, un gusu yuptek no echi ikichi ambe anak ne Kamui shik-samata echi orun anukara kuni gusu nep ne.

¹³ Tambe gusu, chi utara anak ne aomaoma okere: aige, aomaoma shiriki rapoketa Titus iki nupetne ambe gusu, chi utara naa shiri nupetne ash nisa ruwe ne, obitta no okai echi utara gusu Shinuma kon ramat shiturire nisa ruwe ne gusu ne na.

¹⁴ Nep ne yakka epeka echi utara gusu shinuma ankushkerai ku yaiomonnure yakun shomo a en yainikoroshmare nisa ruwe ne; koroka, sonep ani obitta no okaibe echi otta chi ye korachi, Titus kotchaketa ku ki yaiomonnure ambe ne yakka sonep ne anukan nisa ruwe ne.

¹⁵ Orowa shinuma onnaigeta an omap ambe anak ne echi utara gusu naa nuye an no an; aige, echi utara anak ne hemanda ishitoma wa tusushke hine shinuma uk, aine, echi obitta no iki koitaknu ambe eshkarun ruwe ne gusu ne na.

¹⁶ Nep ne yakka gusu echi ankushtapne ku ramuritetke gusu ku nupetne ruwe ne na.