II Korintos 5 - Ashiri Aeuitaknup Iyohaichish Yona 1897

5 Ik.

¹ Chikoro kash ne toitoi oma chisei isam yakun, isam shomoki kando oshiketa Kamui orowa no akarape an, teke ani shomo akarape chisei an ari an ambe chi eraman ruwe ne gusu ne na.

² Inambe gusu ne yakun, son no newa chi utara oromande hine kando orowa no an chisei ani aeyaitomchiure kuni eyaikatekara ruwe ne:

³ aine, aeyaitomchiure chiki atusa korachi shomo anukan na.

⁴ Son no poka tan kash oshiketa okai chi utara anak ne pase no ashikere wa oromande; tambe anak ashirarayere rusuibe gusu shomo ne, koroka, kashi chiutomchiure rusuibe gusu ne, aige, rai kuni ambe anak ne inotu ani aruki kuni gusu ne na.

⁵ Tap an ambe gusu un kara guru anak ne Kamui ne ruwe ne, aige, Shinuma anak Ramat emkoso un kore nisa ruwe ne na.

⁶ Tambe gusu ramma rametok koro, aige, koro uni ne netobake ta okai rapoketa, Utarapa wa eoyake an ari an ambe chi eraman (inambe gusu ne yakun,

⁷ chi utara anak ne nukarabe gusu shomo ne koroka eishokor-i gusu apkash ash ruwe ne); chi utara rametok koro ari ku ye,

⁸ aige, netobake ande wa Utarapa tura unita an rusui ruwe ne.

⁹ Tambe gusu, unita ne yakka, oyakta an yakka Shinuma nupetnere kuni ne iki rusui ruwe ne.

¹⁰ Inambe gusu ne yakun, chi utara anak ne netobake ani chi kichi okaibe gusu, pirikap hene wenbe hene, nei okaibe gusu a un koropare kunip uina kuni ne, pishno pishno Kiristo koro koipishi gusu an amset kotchaketa anukara kusu ne gusu ne na.

¹¹ Tambe gusu, Utarapa ashitoma ambe eraman gusu, chi utara anak ne ainu utara onishnishi ruwe ne a koroka, Kamui otta aeyainukare an na; aine, echi koro keutum ta ne yakka a un aeyainukare kuni ambe ku chipachipa ruwe ne.

¹² Chi utara anak ne kanna-shui echi otta yaieamkire shiri shomo ki, koroka, soige wa yaiomonnure wa keutum ta iki shomoki utara orun ese itak echi ki eashkai kuni ne,

¹³ echi utara yaiomonnure ika akore ruwe ne. Chi utara chiitasare yakun, nei ambe anak Kamui gusu an ambe ne; shui, yaieashirikara yakun, echi utara gusu ne ruwe ne.

¹⁴ Inambe gusu ne yakun, Kiristo koro omap ambe anak ne un ekarire ruwe ne; Shinen anak ne obitta no okai utara gusu rai nisa, tambe gusu obitta no okai utara rai okere ruwe ne ari chi esanniyo ash ruwe ne;

¹⁵ awa, shiknu wa okai utara anak ne tewa no yaikota gusu ishu shomoki, koroka, nei utara kotchane rai wa hetopo-shiknu guru gusu ishu kuni ne Shinuma anak obitta no okai utara kotchane rai nisa ruwe ne.

¹⁶ Tambe gusu, tewa no poka, chi utara anak ne kam gusu an ainu eamkiri shomoki: aige, kam gusu an Kiristo chi eamkiri nisa a yakka, tane anak ne nei no chi eamkiri shomoki ruwe ne gusu ne na.

¹⁷ Tambe gusu, inan ne yakka Kiristo oshiketa an chiki, shinuma anak ashiripe ne: fushko okaibe paye wa isama; ingarʼan, ashiripe ne akan nisa ruwe ne.

¹⁸ Koroka, obitta no okaibe Kamui orowa no an ambe ne, awa, Shinuma anak ne Kiristo gusu yaikota epeka un eramuritenka, aige, nei aeramuritenka koeyaishi-eiwangere-hi un kore nisa ruwe ne na;

¹⁹ nei ambe anak ene an ambe ne, — Kamui anak Kiristo oshiketa an wa yai otta moshiri eramuritenka shiriki an, awa, moshiri koro ohaita buri shomo esanniyo; aige, ramuritenka gusu an itak un shikkashimare nisa ruwe ne.

²⁰ Tambe gusu, chi utara anak ne Kiristo gusu ateshkara utara chi ne, Kamui chi utara ani onishnishi shiriki korachi nep.

²¹ Chikokatpak eramushkare guru anak ne chi utara gusu akokatpakbe ne akara; tambe anak ne chi utara shinuma oshiketa Kamui oupeka ambe ne akara kuni gusu ne na.