II Korintos 4 - Ashiri Aeuitaknup Iyohaichish Yona 1897

4 Ik.

¹ Tambe gusu, chi utara anak ne tan yaishieiwangere gusu an kunip koro wa okai gusu, aerampokiwen wa akore korachi shomo ramurai ruwe ne:

² koroka, anuina wa okai gusu yainikoroshma kuni ambe chi emaka wa, irarabe gusu apkash shomoki, samata, Kamui itak shunge no eiwange shomoki ruwe ne; koroka, sonep nukare gusu Kamui tek-samata obitta no okai utara koro keutum otta yaikota yaiashte ruwe ne.

³ Koroka, chi ye pirika shongo akamure chiki, aisamka korʼan utara gusu akamure ruwe ne:

⁴ tan moshiri gusu an Kamui anak ne eumbipka utara koro keutum shiknakte nisa ruwe ne; Kamui nokaha ne Kiristo koro nupeki otta an pirika shongo oma pekere anak naa shomo nei utara orun hetuku kuni gusu ne na.

⁵ Inambe gusu ne yakun, chi utara anak ne yaieupas-kuma shomoki, koroka, Kiristo Yesu anak Utarapa ne korachi an orushpe eupaskuma ki, samata, Yesu korʼirenga gusu chi utara anak echi koro uitek utara chi ne sekorʼambe eupaskuma ruwe ne gusu ne na.

⁶ Yesu Kiristo koro nanuhu otta Kamui nupeki gusu an eramanbe oma pekere koropare kuni gusu chikoro keutum ta pekere kotomka Kamui anak ne kunne-i wano pekere at kusu ne, ari an itak ani ye Kamui ne ruwe ne gusu ne na.

⁷ Koroka, nei shiri poro kiroro anak ne un orowa no shomo ne, Kamui orowa no an kuni gusu, toitoi op oshiketa chi utara tan ikoro kon ruwe ne;

⁸ hunak peka wano ne yakka aeurarapa an a yakka, shomo yairamkoiki ruwe ne; keutum chiutumashbare an a yakka, shomo ramu-nin; aekeseamba an a yakka, shomo akohoppa an;

⁹ ahachire an a yakka, shomo aisamka an na;

¹⁰ Yesu koro inotu poka chikon netobake oshiketa anukara kuni ne, ramma kane akon netobake otta Yesu araige ambe sei shiri an ruwe ne.

¹¹ Yesu koro inotu poka chikoro rai kuni kam oshiketa anukara kuni ne, ishu wa okai chi utara anak ne ramma kane Yesu rengap gusu rai-i orota aekoshi shiriki an ruwe ne.

¹² Tambe gusu rai ambe anak ne un onnaigeta iki ruwe ne, koroka, inotu anak ne echi onnaigeta iki shiriki.

¹³ Koroka, ukorachi an eishokor-i oma ramat chikoro hine ene ene chieshinnuye wa an korachi, — Ku eishokon nisa, tambe gusu ku ye ruwe ne; chi utara ne yakka eishokoro, tambe gusu itak ne yakka ki ruwe ne;

¹⁴ Utarapa ne Yesu hetopo-shiknurep anak ne Yesu tura un hetopo-shiknure poka ki hine echi tura no un yange kushki ambe chi eraman shiriki okai ruwe ne.

¹⁵ Inambe gusu ne yakun, obitta no okaibe anak ne echi rengap gusu an ambe ne, tambe anak nei irenga inne utara gusu naa nuye an no akara wa Kamui arakuru ankushkerai koyaiiraige ambe aporore kuni gusu an ambe ne ruwe ne.

¹⁶ Tambe gusu chi utara shomo ramu-rai; koroka, chikoro soige an ainu anak ne munin koran a yakka, onnaigeta an ainu anak ne to pishno ashirikara an ruwe ne.

¹⁷ Inambe gusu ne yakun, irukai patek an kushki chikoro koshne aeramchuptekbe anak ne chi utara gusu naa kasu no kasu no an aokere shomoki pase arakuru kan ruwe ne;

¹⁸ aine, chi utara anak ne anukara okaibe orun ingara shomoki, koroka, shomo anukara okaibe orun ingan ruwe ne: inambe gusu ne yakun, anukara okaibe anak ne aokere kunip ne; koroka, anukara shomoki okaibe anak aokere shomoki kusu ne na.