II Korintos 12 - Ashiri Aeuitaknup Iyohaichish Yona 1897

12 Ik.

¹ Aepirikare kunip shomo ne a yakka, nekon a ka ku yaiomonnure ruwe ne; koroka, Utarapa orowa no an anukarape tane ku ye.

² Kiristo oshiketa shine ainu ku eamkiri, ine pa ikashima wan pa etoko (netobake oshiketa an hene ne ya ku eramushkare; netobake soigeta an hene ne ya ku eramushkare; Kamui eraman), nei a an guru anak ne re ikinne an kando orun auk nisa ruwe ne.

³ Awa, nei no an ainu ku eamkiri (netobake oshiketa an hene ne ya, netobake sak no an hene ne ya ku eramushkare; Kamui eraman),

⁴ nei guru anak ne Paradaisos orun auk wa ainu ye koro ikashpaotte oterekep ne ari an ye eaikap an itak nu nisa ruwe ne.

⁵ Nei a an guru ankushkerai ku yaiomonnure kusu ne: koroka, ku katchakbe gusu moshima yaikota gusu shomo ku yaiomonnure kusu ne na.

⁶ Inambe gusu ne yakun, ku yaiomonnure rusui yakka, haita guru shomo ku ne; son no ambe ku ye kusu ne gusu ne na: koroka, nei no shomo ku ki ruwe ne, a en nukara wa an ambe hene en orowa no nu ambe kasu no hene, ikineipeka ika nenka en esanniyo kuni gusu ne na.

⁷ Orowa, nei anukarabe shiri porobe an ikkeu ne gusu-tambe gusu, iteki mashkin no a en aeyairiknare kuni ne, en shirikik gusu kam oshiketa nit ai, Satan koro auitekbe, a en kore nisa, tambe anak iteki mashkin no ku yairiknare kuni gusu an ambe ne ruwe ne.

⁸ Tap ambe anak en orowa no oyakta aomande kuni ue re shuine Utarapa ku koramkon nisa.

⁹ Aige; — Ku sange irenga aokai gusu upak no an ambe ne: Ku kiroro anak ne katchakbe oshiketa aeramushinnere ruwe ne gusu ne na, ari an itak ani Shinuma en orun ye nisa ruwe ne. Tambe gusu, Kiristo koro kiroro en kashike apiraspare kuni ne, shi no yaikopuntek no ku katchakbe gusu ku yaiomonnure kushki na.

¹⁰ Tambe gusu, Kiristo korʼirenga ankushtapne kuani katchakbe gusu, aeiwendep gusu, aeishiramnep gusu, aepokbap gusu, yairamkoiki ambe gusu ku enupetne ruwe ne: inambe gusu ne yakun, katchak no ku an ita, nei ita anak ku kiroroashnu ruwe ne gusu ne na.

¹¹ Ramat-sakbe ku ne okere: nei no ku an kuni ne echi ikichi okai; echi utara orowa no a en aashte kunip ku ne: inambe gusu ne yakun, kuani nep ka aeramu kunip shomo ku ne a yakka, iyotta pase apostoro utara pokashnu an ambe shomo ku ne ruwe ne gusu ne na.

¹² Son no newa shirosh ani hemhem, iyokunnurep ani hemhem, kiroro ani hemhem, Apostoro gusu an shirosh anak ne obitta no an yaiyupupu aoma wa echi tumugeta aki nisa ruwe ne.

¹³ Kuani yaikota echi tumugeta an wa shomo echi iramu-ikurukurure moshima an ika gusu, nep ika an gusu moshima okai karisia pokta echi pokashnu ruwe he an? Tap an wenbe gusu ramuhauge no irenga usaraye wa en kore yan.

¹⁴ Ingaraʼan, tambe anak ne kuani echi orun ku ek kuni re ikinne an etokooiki okere an ambe ne ruwe ne; awa, shomo echi iramu-ikurukurure ash kusu ne: inambe gusu ne yakun, echi korobe shomo ku ehunara, koroka, echi ku ehunara shiriki ruwe ne: poho utara anak ne eshikop utara gusu okaibe eumashnu kuni ambe shomo ne, koroka, eshikop anak poho utara gusu eumashnu kunip ne ruwe ne gusu ne na.

¹⁵ Orowa, echi koro keutum gusu kuani ara yaikopuntek no ku eiwange hemhem ki, a en eiwangere kuni hemhem ku ki kusu ne. Naa eikaun no kuani echi omap ash yakun, naa pokashnu no a en omap an ruwe he an?

¹⁶ Koroka, nei no an yan, kuani yaikota ani echi shike pasere shomoki nisa; koroka, ki-kat-korobe ku ne ruwe ne gusu, imokbe ani echi uina ash nisa ruwe ne na.

¹⁷ Echi orun ku payere utara tumuge un nen ka an guru ankushtapne kuani echi kokandama wa yaiepirikare nisa ruwe he an?

¹⁸ Titus ku onishnishi nisa, orowa, shinuma tura nei iriwak ne guru ku omande Titus anak ne echi kokandama wa eyaiepirikare nisa ruwe he an? Ukorachi an Ramat otta shomo chi apkash ash ya? Ukorachi an kochihi otta shomo apkash ash ruwe he an?

¹⁹ Chi utara tap ramma-kane echi utara gusu yaiyapapu ash ruwe ne ari echi ramu. Kamui teksamata okai wa Kiristo oshiketa chi ye ruwe ne. Koroka, aeomap utara, obitta no okaibe anak echi aroshikire ash gusu nep ruwe ne.

²⁰ Ikineipeka ku ek ita anak ne nekon a ka shomo ku kon rusui nei no echi anukara, samata, shomo echi kon rusui nei no a en nukara kuni ambe ku ishitoma ruwe ne; ikineipeka nekon a ka ika upaore ambe hene, eyaitunnap hene, kinrakarape hene, sakayo hene, ohaigekara ambe hene, pinu no itakbe hene, pittarane ambe hene, achatchari ambe hene an na;

²¹ ikineipeka ika kanna echi otta ku ek ita, ku goro Kamui anak ne echi shik-samata en yainikoroshmare hine, tap etokota katpak ki wa ikichi turu ushbe newa hoiyop newa ramupekere ambe newa eyaikokatpak shomo ki nei utara tumuge un inne no okai utara gusu ku yaituwashkarap gusu ne na.