II Korintos 10 - Ashiri Aeuitaknup Iyohaichish Yona 1897

10 Ik.

¹ Echi tumugeta an ita yaieoripakka, koroka, tane oyakta an wa echi epeka rametokkoro Pauros ne kuani anak ne, Kiristo gusu an ramushiroma ambe newa rotcha ambe gusu echi onishnishi ash na:

² ruwe un, kara nei no apkash korachi utara chi ne sekoro esanniyo an utara epeka echi tura no ku an ita rametokkorobe ku epukitara kuni ku esanniyo, atte keutum gusu an rametokkorobe shomo ku sange kuni ne ku koramkon na.

³ Inambe gusu ne yakun, chi utara anak ne kam oshiketa an wa apkash yakka,

⁴ kam iki nei no shomo tumichikon ruwe ne (tumi gusu an chi koro eshipopkep anak ne kam orowa no an ambe shomo ne, koroka, kiroroashnu ambe hokushte gusu Kamui tek-samata okirashnup ne ruwe ne);

⁵ aesanniyo ambe newa nep ne yakka Kamui eramushbe epokba ariknare an ri ambe obitta hokushte, samata, obitta no okai yainu-hi Kiristo otta koitaknure kuni ne usshiunere ruwe ne;

⁶ orowa, echi ikichi itaknu ambe auweomare chiki, obitta no okai itakkashi ambe koikemnu gusu etokooiki an ambe ne ruwe ne na.

⁷ Echi utara anak ne echi nan kotpoketa orun ingara shiriki. Kiristo korobe ne sekoro yaioshiketa eishokoro inan guru ne yakka an chiki, yai-tura kanna-shui tambe yaikoshiramshuibarero; shinuma anak ne Kiristo korobe ne-hi korachi, chi utara ne yakka ene ani ne ruwe ne.

⁸ (Echi hokushte gusu shomo ne a koroka echi roshkire ash kuni gusu Utarapa koropare) chi koro mondum gusu nekon a pon no poro no ku yaiomonnure yakka shomo kuani echi yainikoroshmare ash kusu ne:

⁹ tambe anak ku omande kambi ani echi ishitomare noine an ambe shomo a en esanniyo kuni gusu nep ne ruwe ne.

¹⁰ Inambe gusu ne yakun, shinuma ette kambi anak ne pase newa yupkep ne: koroka, koro tumama kat anak katchakbe ne, koro itak nep ne aramu kunip shomo ne ruwe ne, ani nei utara ye ruwe ne gusu ne na.

¹¹ Nei no shiriki an gurʼanak ne, chi utara oyakta an wa kambi kata anuye wa an itak an nei no, echi tura okai ita ne yakka nei no ikichi utara chi ne ruwe ne sekoro esanniyorero.

¹² Inambe gusu ne yakun, chi utara anak ne yaikota yaiashte sereke an utara tura ukonukara hene tura no okai wa aesanniyo kuni hene ki rusui kashpa utara shomo chi ne: koroka, nei utara yaihekota anak ne utashpa yaikota yaiuwepakari hemhem ki, yai tura yaiuweukonukara hemhem ki hine eramsakbe ne ruwe ne.

¹³ Chi utara anak ne yaiomonnure kashpa shomo chi ki kusu ne, koroka, echi orun poka epa kuni pakno Kamui un gusu koimek wa kore aepakari nei no an ikiri korachi ki kusu ne gusu ne na.

¹⁴ Inambe gusu ne yakun, chi utara anak ne echi oro pakno shomo epa nei no, mashkin no yaituriri kashpa korachi shomo ne ruwe ne: echi oro pakno poka Kiristo koro pirika shongo oshiketa hoshiki araki ash nisa ruwe ne gusu ne na:

¹⁵ moshima utara iki ikip gusu eetasa poron no yaiomonnure shomoki; koroka, echi eishokor-i attep shukup korachi, chi utara ikichi ikiri nei no naa nuye an no an ambe hetukure, gusu echi tumta a un porore kuni chipachipa ash ruwe ne;

¹⁶ tambe anak ne echi eikushketa okai ushike ta pirika shongo eupaskuma ash hine moshima utara iki ikiri chi teksamata etokooiki ambe gusu shomo yaiomonnure kuni gusu an ambe ne ruwe ne. Koroka, yaiomonnure guru an chiki,

¹⁷ Utarapa gusu yaiomonnurero.

¹⁸ Inambe gusu ne yakun, yaihekota yaiashte gurʼanak ne auwande wa iramye kunip shomo ne, koroka, Utarapa ashtep anak ne airamye an ua.