II Korintos 1 - Ashiri Aeuitaknup Iyohaichish Yona 1897

1 Ik.

¹ Kamui irenga ankushkerai Kiristo Yesu koro Apostoro ne Pauros, akoro iriwak ne guru Timoteos tura Korintos kotan ta an Kamui karisia otta hene Akaya moshirʼebitta ta okai ashkanne utara otta hene kambi omande na:

² chikoro Michi ne Kamui newa Utarapa ne Yesu Kiristo orowa no irenga newa itomo echi gusu an na.

³ Chikoro Utarapa ne Yesu Kiristo koro Kamui newa Michi, rampoken newa obitta no okai omaoma ambe koro Michihi airamye an na;

⁴ ani chi utara Kamui orowa no aomaoma an nunuke ambe ari, nep aeramchuptek utara chi omaoma eashkai kuni ne, nep aeramchuptekbe chi ki a yakka Shinuma un omaoma ruwe ne.

⁵ Inambe gusu ne yakun, Kiristo ki aeyairamshitnere ambe un gusu nuye an no an korachi, tambe nei no chi ki omaoma ambe poka Kiristo gusu nuye an no an ruwe ne gusu na.

⁶ Koroka, chi utara anak ne aeramchuptekka chiki echi aomaoma kuni gusu hene echi kashiaobiuki kuni gusu hene an ambe ne; shui, chi utara aomaoma an chiki, nei ambe anak chi utara poka iki ukorachi an aeramchuptekbe echi ramu-shiroma no eyaishipororere kuni gusu an omaoma ambe ne ruwe ne gusu ne na:

⁷ echi utara gusu chi iki chipachipa ambe anak ne tumashnu ne; echi utara utura aeyairamchuptekka an korachi aomaoma kusu ne sekorʼambe eraman ruwe ne gusu ne na.

⁸ Inambe gusu ne yakun, iriwak utara, Asia moshiri ta iki aeramchuptekbe gusu an orushpe echi erampeutek-hi chi utara kopan ruwe ne; eshiporore kiroro isam pakno yupke no a un shirikirapte an, tane rai kushki sekoro yainu pakno an ambe ne:

⁹ ruwe un, chi utara yaikota yai-oshiketa rai kuni aesanniyo-hi an a an, tambe anak chi utara yaiotta yaiekopashte shomoki no, rai guru hetopo-shiknure Kamui eyaikopashte ash kuni gusu ne ambe ne:

¹⁰ Shinuma anak ne ene poro rai ambe orowa no un ohaitare nisa, shui ohaitare kusu ne na: Shinuma naa un kaobiuki kuni ne, gusu chi utara echipachipa shiriki okai ash;

¹¹ echi utara ne yakka, koramkoro ki hine utura ikashiu ruwe ne; tambe anak, inne utara ankushkerai aikrap a un koropare an gusu, chi utara gusu inne utara yaiiraige ki kuni gusu an ambe ne ruwe ne na.

¹² Chi ki yaiomonnure ika anak ne chikoro keutum iki paweteshu ambe ne, Kamui orowa no an ashkanne ambe newa sonep gusu, kam oma wayashnu-hi ani shomo ne, koroka, Kamui irenga ani moshirʼotta ikip iki, makangane echi utara otta ikichi nisa ruwe ne gusu ne na.

¹³ Awa, echi utara orooitak hemhem eraman hemhem moshima nep ne yakka echi gusu shomo chi nuye ruwe ne; aige, okese pakno echi utara nei ambe eraman kuni ku chipachipa ruwe ne:

¹⁴ aine, Utarapa ne Yesu toho ta echi utara gusu chi utara yaiomonnure korachi chi utara ne yakka echi utara gusu yaiomonnure kuni ne, echi utara poka sereke gusu en eraman ruwe ne gusu ne na.

¹⁵ Orowa, tap ku eishokoro wa echi utara naa shine irenga akore kuni ne nei etokota echi orun ku oman kuni ku ramu nisa:

¹⁶ aige, echi koro kotan akush chiki Makedonia moshiri ta arapa, orowa shui, Makedonia wano arapa yakun echi orun ek hine Yudea moshiri orun oman gusu a en payekaire kuni gusu ne na.

¹⁷ Tambe gusu, nei no ku ramu ita anak ne koshne keutum ku sange nisa ruwe he an? Ku ramuoshitchiu chiki, en otta “ruwe un,” “ruwe un,” “shomo,” “shomo,” ani an ambe an gusu kam esanniyo wa ku ramuoshitchiu ruwe he an?

¹⁸ Koroka, Kamui anak ne sonep ne gusu echi orun chi ye itak anak ne, “ruwe un,” newa “shomo,” ari an itak ambe shomo ne ruwe ne.

¹⁹ Inambe gusu ne yakun, echi utara tumugeta kuani newa Siruanos newa Timoteos ne chi utara orowa no aeupaskuma Kamui koro Poho Yesu Kiristo anak ne, “ruwe un” newa “shomo” ari an itak ani an ambe shomo ne, koroka, Shinuma gusu “ruwe un” ari an ambe ani ne ruwe ne gusu ne na.

²⁰ Inambe gusu ne yakun, Kamui eitakamkire ambe anak ne nei oro pakno inne ne a yakka, Shinuma oshiketa nei ambe anak “ruwe un” ne ruwe ne gusu ne na: tambe gusu chi utara gusu Kamui arakuru ankushkerai, Shinuma gusu ne yakka “Amen” ari an ambe an ruwe ne na.

²¹ Orosama, echi utara tura no Kiristo gusu un roshkire hemhem ki, un kashiota hemhem ki guru anak ne Kamui ne ruwe ne;

²² Shinuma anak ne un otta han omare, aine, chikoro sambe oshiketa Ramat emkoso kore nisa ruwe ne.

²³ Koroka, kuani anak ne Korintos orun shomo ek ambe anak ne echi eramu-hauge ash gusu an ambe ne sekoro ku keutum kata Kamui ku konishuk wa ipaweteshure ruwe ne.

²⁴ Chi utara anak ne echi eishokoro amde enishpane shomoki, koroka, echi nupetne kuni ikashui utara chi ne: eishokor-i an gusu echi roshki ruwe ne gusu ne na.